އަދާލަތު ޕާޓީގެ ރައީސެއްގެ ކިބައިގައި ހުންނަން ޖެހޭ ޝަރުތު ތަކުގެ ތެރެއިން "ފިރިހެނަކަށްވުން" އުނިކުރަނީ
އަދާލަތު ޕާޓީގެ ރައީސް އެއްގެ ކިބައިގައި ހުރުން ލާޒިމުކުރާ ޝަރުތުތަކުގެ ތެރެއިން "ފިރިހެނަކަށް ވުން" އުނިކުރަން އިސްލާޙު ހުށަހަޅައިފިއެވެ.
މިކަން އިއުލާނު ކުރައްވަމުން އެޕާޓީގެ ލީޑަރު އަދި ހޯމް މިނިސްޓަރު އިމްރާން ޢަބްދުﷲ މިއަދު ކުރެއްވި ޓްވީޓެއްގައި ވިދާޅުވީ އަދާލަތު ޕާޓީގެ ރައީސް ގެ ކިބައިގައި ހުރުން ލާޒިމު ކުރާ ޝަރުތުގެ ތެރޭގައި "ފިރިހެނަކަށްވުން" ހިމަނާފައި އޮތީ ދީނީ ގޮތުން ލާޒިމުކުރާ ކަމަކަށް ނުވިޔަސް ޕާޓީ އުފެދުނުއިރު ޕާޓީގެ މެންބަރުން ބޭނުން ވަނީ އެގޮތް ކަމަށް އެއިރުގެ ޕާޓީގެ ލީޑަރޝިޕްގައި ތިއްބެވި ބޭފުޅުންނަށް ފެނިވަޑައިގަތުމުން ކަމަށެވެ.
"މިވަގުތު ޕާޓީ ކުރިއަށް ގޮސްފައިވާ މިންވަރަށް ބަލާ، ޕާޓީ އިތުރަށް ހުޅުވާލާ ޕާޓީގެ އެންމެ އިސް ސަފުގައި އަންހެނުންނަށް ހަރަކާތްތެރިވުމަށް އޮތް ފުރުސަތު އިތުރަށް ފަހި ކުރުމަށް، އަދާލަތު ޕާޓީގެ ރައީސްގެ ކިބައިގައި ހުރުން ލާޒިމު ކުރާ ޝަރުތުގެ ތެރެއިން ފިރިހެނަކަށްވުން އުނިކުރަން އިސްލާހު ހުށަހަޅައިފިން" މިނިސްޓަރ އިމްރާން ވިދާޅުވެފަައިވެއެވެ.
މީގެއިތުރުން ވެސް ކުރެއްވި ޓްވީޓެއްގައި ވިދާޅުވެފައިވަނީ، މިގޮތަށް އެމަނިކުފާނު އިސްވެ ހުންނަވާ އިސްލާހު ހުށަހެޅުއްވީ އެޕާޓީގައި ހިމެނޭ ދީނީ ޢިލްމުވެރިންނާވެސް މަޝްވަރާ ކުރުމަށްފަހު، މަޝްވަރާ މަޖިލިސް ގެ ހަތް މެންބަރުންގެ ސޮއެއާއެކު ކަމަށެވެ.
އަދާލަތު ޕާޓީގެ ރައީސްގެ ކިބައިގައި ހުންނަން ޖެހޭ ޝަރުތުތަކުގެ ތެރޭގައި ފިރިހެނަކަށްވުން އުނިކޮށް، އިސްލާހު ކުރަން ނިންމާފައި މިވަނީ، އެޕާޓީގެ ރައީސްކަމަށް އަންހެނަކަށް ވާދަ ނުކުރެވޭނަމަ އެޕާޓީގެ އަސާސީ ޤަވާއިދު އިސްލާހު ކުރަން އަންގާނެ ކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފު ވެސް އިއްޔެ ވިދާޅުވެފައި ވަނިކޮށެވެ.
އިސްލާމް ދީން އެކަމަކަށް ހިއްވަރު ނުދޭ އެއްވެސް ކަމެއް ކުރުމަކަށް މި ރާއްޖޭގައި މިހާރު މާ ބޮޑު ކަމެއް ކުރާކަށް ނުޖެހޭނެ. އެއަށްވުރެ ބޮޑަށް މީސްތަކުން މި ތިބީ މާއްދިއްޔަތަށް ގޮސް ހުސްވެފައި. އާޚިރަތް މަތިން މުޅިން ހަނދާންނެތި ވާ ވަދެ ގެއްލިފައި. ހާދަ ދެރައޭ.