އެމެރިކާއިން އުފެއްދި ކޮރޯނާވައިރަސް ވެކްސިން 30،000 މީހުންނަށް ޖަހައިގެން ޓެސްޓް ކުރާނެ

އެމެރިކާގެ މޮޑަރނާ ކުންފުނިން ކޮރޯނާވައިރަހުން ދިފާޢުވުމަށް ތައްޔާރުކުރި ވެކްސިން ޓެސްޓްކުރުމުގެ އެންމެ ފަހުބުރުގައި 30،000 މީހުންގެ މެދުގައި ޓެސްޓް ކުރެވޭނެކަމަށް އެ ކުންފުނިން ހާމަ ކޮށްފިއެވެ.

މިކަން ހާމަ ކުރީ އެ ކުންފުނިން ނެރެނު ނޫސްބަޔާނެއްގައެވެ. މި ބަޔާނުގައިވާ ގޮތުން މި ޓެސްޓް ކުރުންތައް މި ފެށޭ ޖުލައި މަސް ތެރޭގައި ފެށުމަށް ވަނީ ތައްޔާރުވެވިފައެވެ. މިއީ ކުރިން މި ޓެސްޓް ކުރުންތައް ފެށުމަށް ކުރިން ތާވަލުކުރި ތާރީޚަށްވުރެ މާ އަވަސް ތާރީޚެކެވެ.

މި ޓެސްޓް ކުރުންތަކާއި ބެހޭގޮތުން މަޢުލޫމާތު ދެއްވަމުން ޑރ. ފައުޗީ މީގެ ކުރިން ހާމަ ކުރެއްވި ގޮތުގައި، އެންމެ ފަހުގެ ޓެސްޓް ކުރުން ތަކުގައި ބޭރުގައުމުތަކުގެ ބައެއް މީހުން ޝާމިލްކުރާނެއެވެ. ނަމަވެސް އެންމެ ފަހުގެ ތައްޔާރީތަކުގެ މަޢުލޫމާތު ހާމަކުރިއިރު މިކަން ހިމަނާފައެއް ނުވެއެވެ. އަދި މިކަމާ ގުޅިގެން ނޫސްވެރިން ސުވާލު ކުރުމުންވެސް މިކަމަށް ސީދާ ޖަވާބެއް ދީފައެއް ނުވެއެވެ. ނަމަވެސް މޮޑަރނާއިން ހާމަ ކުރިގޮތުގައި މިއީ ދުނިޔޭގައި މިހާތަނަށް އެންމެ ފުޅާދާއިރާއެއްގައި ވެކްސިނެއް ޓެސްޓް ކުރެވޭ ފަހަރަށް ވާނެއެވެ. މީގެ ކުރިން އިނގިރޭސިވިލާތުންވަނީ، އެސްޕިރިން ބޭނުންކޮށްގެން ކެންސަރަށް ފަރުވާލިބޭތޯ ބަލަން 11،000 މީހުންގެ މެދުގައި ޓެސްޓް ތަކެއް ކޮށްފައެވެ.