ކޮވިޑް19: ސެޕްޓެމްބަރާ ހަަމައަށް އެމެރިކާ ގައި އިތުރު 100000 މީހުން މަރުވެދާނެ
ސެޕްޓެމްބަރު މަހުގެ ކުރިން އެމެރިކާ ގައި ކޮވިޑް19 ޖެހިގެން އިތުރު 100،000 މީހުން މަރުވެދާނެ ކަމުގެ ބިރު ހަވާޑް ޔުނިވާސިޓީގެ މާހިރަކު ދީފިއެވެ. އެމެރިކާ ގައި މަރުވާ މީހުންގެ އަދަދު ދެ ގުނަ އިތުރުވެދާނެ ކަމުގެ އިންޒާރު ދީފައިވަނީ ހަވާޑް ގްލޯބަލް ހެލްތް އިންސްޓިއިޓް ގެ ޑިރެކްޓާ ޑރ. އާޝީޝް ޖާ އެވެ.
މިހާތަނަށް އެމެރިކާ ގައި 116,034 މީހަކު މަރުވެފައިވާއިރު، ކޮވިޑް19 ގައި އެންމެ ގިނަ ބަޔަކު މަރުވެފައިވަނީ ވެސް އެމެރިކާ ގައެވެ.
އެންބީސީ ގައި ވާހަކަދައްކަވަމުން ޑރ. އާޝީޝް ވިދާޅުވީ މިހާރުވެސް އެމެރިކާ ގައި ދުވާލެއްގެ މައްޗަށް 800 އާ 1000 އާ ދެމެދުގެ އަދަދަކަށް މީހުން މަރުވަމުން އަންނައިރު، އެކަމަށް އަވަސް ހައްލެއް ނުގެނެވިއްޖެނަމަ ކުރިއަށް އޮތް ތިން މަސް ދުވަހުގެ ތެރޭގައި އިތުރު އެއް ލައްކަ މީހުންމަރުވުމަކީ އެކަށީގެންވާ ކަމެއް ކަމަށެވެ.
މީގެ އިތުރުން އާޝީޝް ވަނީ ކުރިއަށް އޮތީ ހޫނު މޫސުން ކަމުގައި ވުމާއެކު، ގިނަ ބަޔަކު ހޫނު މޫސުމުގައި ބީޗު ތަކާއި ތަންތަނަށް ގޮސް އުޅުމުގެ ތެރޭގައި ވައިރަސް އިތުރަށް ފެތުރިގެންދާނެ ކަމުގެ ބިރު އެބައޮތް ކަމަށް ވިދާޅުވެފައެވެ.
