ކޮވިޑް-19: މުރައިދޫން ކުރިން ފައްސިވެ ރަނގަޅުވީ މީހަކު، 3 މަސް ނުވަނީސް އަލުން ފައްސިވެއްޖެ

ހއ. މުރައިދޫން ކުރިން ކޮވިޑަށް ފައްސިވެ، ބަލިން ރަނގަޅުވީ މީހަކު އަލުން ފައްސިވެއްޖެއެވެ.

Ads by STELCO

"ދެން" އަށް މައުލޫމާތު ދެއްވަމުން މުރައިދޫ ކައުންސިލު ރައީސް އަސްރާރު ޢަބްދުﷲ ވިދާޅުވީ އެމީހާއަކީ ރިސޯޓެއްގައި މަސައްކަތް ކުރި މީހެެއް ކަމަށާއި، މީގެ ކުރިން ވެސް އެމީހާ ކޮވިޑަށް ފައްސިވެ، އެހެން ނަމަވެސް ނޮވެމްބަރު މަސް ތެރޭގައި ބަލިން ރަނގަޅުވި ކަމަަށެވެ.

ކޮވިޑަށް އެމީހާ ފައްސި ވެފައިވާކަން އެނގުނީ މިރޭ ކަމަަށާއި، އެމީހާ މިހާރު ހުރީ ކަރަންޓީނު ކޮށްފައި ކަމަށް ވެސް އަސްރާރު ވިދާޅުވިއެވެ.

ކައުންސިލު ރައީސް ވިދާޅުވީ، ބައްޔަށް ފައްސި ވެފައި ވަނީ ބަލިން ރަނގަޅުވިތާ ތިން މަސް ނުވާ މީހެއް ކަމަށެވެ.

މުރައިދޫ މިވަގުތު އޮތީ މޮނީޓަރިންގެ ހާލަތުގައި ކަމަަށާއި، ރަށުގެ އާއްމު ހާލަތު ރަނގަޅު ކަމަށް ވެސް ކައުންސިލު ރައީސް ވިދާޅުވިއެވެ.