ރާކީ ސާވަންތުގެ ފިރިއަކު ހުންނަކަން ބާރްތީ ޔަގީން ކޮށްދީފި
ބޮލީވުޑްގެ ބައެއް ފިލްމުތަކުގައާއި ލަވަތަކުގައި ހަރަކާތްތެރިވެފައިވާ އެކްޓްރެސް ރާކީ ސާވަންތުގެ ފިރިއެއް ހުންނަކަމަށް ކޮމީޑިއަން ބާރްތީ ސިންގް ބުނެފިއެވެ.
"ޑްރާމާ ކުއީން" ގެ ލަގަބު ދީފައިވާ ރާކީ މިހާރު އުޅެނީ ކައިވެނި ކޮށްގެން ކަމަށް މީގެ އަހަރެއްހާ ދުވަސް ކުރިން އޭނާ ވަނީ ބުނެފައެވެ.
ނަމަވެސް އޭނާގެ ފިރިމީހާ ކަމަށް ބުނާ "ރިތޭޝް" އަދި އެއްވެސް މީހަކަށް ފެނިފައިނުވާތީ އާއި ރާކީ އާއި ބައްދަލު ކުރަން އިންޑިއާއަށް ވެސް އައިސްފައި ނުވާތީ، ގިނަ ބަޔަކު ވަނީ ރިތޭޝް އަކީ ހަގީގަތުގައި ވެސް އުޅޭ މީހެއް ކަމާމެދު ޝައްކު ކޮށްފައެވެ.
"ކަލަރސް" ޓީވީން ދައްކަމުންދިޔަ ބިގް ބޮސް 14 ގައި ވެސް ރާކީ ބައިވެރި ވެފައިވާއިރު، އެތަނުގައި ވެސް ރާކީ ވަނީ ރިތޭޝްގެ ވާހަކަ ދައްކާފައެވެ. ނަމަވެސް ބައެއް މީހުންނަށް އޭނާގެ ވާހަކަތައް ވަނީ ޤަބޫލު ނުކުރެވިފައެވެ.
ނަމަވެސް އެޝޯއަށް ބާރްތީ އާއި އޭނަގެ ފިރިމީހާ ހަރްޝް ލިމްބާޗިޔާ ޒިޔާރަތްކުރި ކުރުމުގައި، ރާކީގެ ފިރިއަކު ހަގީގަތުގައި ވެސް ހުންނަކަމަށް އޭނާ ވަނީ ބުނެފައެވެ.
ބާރްތީ ބުނީ ރާކީ އަށް ރިތޭޝް ވީޑިއޯ ކޯލެއް ކޮށްގެން ވާހަކަ ދެއްކިއިރު، އޭނާއަށް ރިތޭޝް ފެނިފައިވާ ކަމަށެވެ.
ރިތޭޝް އެއް ނުވަތަ ރާކީގެ ފިރިއެއް ހުންނަކަމަށް އޭނާގެ އާއިލާގެ ފަރާތުން ވެސް ވަނީ ކުރިން ބުނެފައެވެ. އެގޮތުން ރާކީގެ ބޭބެ ރާކޭޝް ބުނީ އެ ދެ މީހުންގެ ކައިވެނީގެ ހަފްލާއަށް ވެސް އޭނާ ދިޔަ ކަމަށެވެ. ނަމަވެސް އޭނާގެ ވާހަކަވެސް ގިނަ މީހުން ޤަބޫލެއް ނުކުރެއެވެ.
