މި އަހަރުގެ މިހާތަނަށް 10 ކުއްޖަކު ވަނީ ބްލެކްމެއިލްގެ ޝިކާރައަށް ވެފައި: ފުލުހުން
މި އަހަރުގެ މިހާތަނަށް 10 ކުއްޖަކު ބްލެކްމެއިލްގެ ޝިކާރައަށް ވެފައިވާކަމަށް ފުލުހުން ބުނެފިއެވެ.
ފުލުހުންގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން ޗީޕް ސުޕްރިންޓެންޑެންޓް އޮފް ޕޮލިސް މުޙައްމަދު ބަޝީރު ވިދާޅުވީ މިއަހަރުގެ މިހާތަނަށް 10 ކުޑަކުއްޖަކަށް ބްލެކްމެއިލް ކުރިކަމުގެ މައްސަލަ ހުށަހެޅިފައިވާ ކަމަށެވެ.
މިބައްދަލުވުމުގައި 2017 ވަނަ އަހަރުން ފެށިގެން މިއަހަރުގެ މިހާތަނަށް ކުޑަކުދިންނާއިމެދު ކުރެވޭ އެކިއެކި ބާވަތުގެ ގޯނާތަކާއި އަނިޔާތަކުގެ ތަފާސްހިސާބުތަކުގެ މައުލޫމާތު ފުލުހުން ވަނީ ހާމަކޮށްފައިވެއެވެ. އޭގެ އިތުުރުން މިމުއްދަތުގައި ހުށަހަަޅާފައިވާ ޖިންސީ ގޯނާގެ މައްސަލަތަކުގެ ތަފާސް ހިސާބުތައް ވެސް ހާމަކޮށްފައިވެއެވެ.
އެގޮތުން 2017 އަށް ބަލާއިރު ކުޑަކުދިންނަށް ޖިސްމާނީ އަނިޔާ ދިނުމުގެ 171 މައްސަލައެއް ހުށަހެޅި ތަހުގީގު ކުރެވެމުންދާ ކަމަށާއި 2018 ވަނަ އަހަރު މީގެ 100 މައްސަލަ ހުށަހަޅާފައިވާ ކަމަށާއި 2019 ވަަނަ އަހަރު މީގެ 93 މައްސަލަ ހުށަހެޅިފައިވާއިރު މިއަހަރުގެ މިހާތަނަށް 41 މައްސަލަ ހުށަހަޅާފައިވާ ކަމަށް ބަޝީރު ވިދާޅުވިއެވެ.
ޖިންސީ ގޯނާގެ މައްސަލަތަކަށް ބަލާއިރު 2017 ވަނަ އަހަރު 263 މައްސަލައަކާއި 2018 ވަނަ އަހަރު 250 މީގެ މައްސަލަ ހުށަހެޅިފައިވެއެވެ. އަދި 2019 ވަނަ އަހަރު މިފަދަ 256 މައްސަލަ ހުށަހެޅިފައިވާއިރު މިއަހަރުގެ މިހާތަނަށް މީގެ 158 މައްސަލަ ހުށަހެޅިފައިވެއެވެ.
ކުޑަކުދިންނަށް ބިރުދެއްކުމުގެ މައްސަލަތަކުގެ ތެރެއިން 2017 ވަނަ އަހަރު 38 މައްސަލަ ހުށަހަޅާފައިވެއެވެ. އަދި 2018 ވަނަ އަހަރު މީގެ 45 މައްސަލަ، 2019 ވަނަ އަހަރު 27 މައްސަލަ އަދި މިއަހަރުގެ މިހާތަނަށް މީގެ ފަސް މައްސަލަ ހުށަހަޅާފައިވެއެވެ.
