ސަމާލުވޭ! އަންނަ މަހު ބިލުތައް ބޮޑުވާނެ ކަމަަށް ސްޓެލްކޯ އަދި ފެނަކައިން ބުނެފި!
އަންނަ މަހު ފެންބިލުތަކާއި ކަރަންޓު ބިލުތައް ބޮޑުވާނެ ކަމަށް ފެނަކަ އަދި ސްޓެލްކޯ އިން ބުނެފިއެވެ.
އެންވަޔަރަމަންޓް މިނިސްޓްރީގައި މިއަދު މެންދުރު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސްޓެލްކޯގެ ޖެނެރަލް މެނޭޖަރު ހުސައިން ފަހުމީ ވިދާޅުވީ އެ ކުންފުނިން ބެލި ބެލުމުން ގޭބިސީތަކުން ކަރަންޓް ބޭނުންކުރި މިންވަރު އިތުރުވެފައިވާ ތަން ފެންނަމުންދާ ކަމަށެވެ.
އެހެންކަމުން ކަރަންޓު ބިލުތައް ބޮޑުވުމާއި ގުޅިގެން މާލޭގެ 700 އެއްހާ ގޭބިސިތަކާއި ފިހާރަތަކަށް ޒިޔާރަތްކޮށް ސާވޭ ތަކެއް ހެދި ކަމަށް ވެސް ފަހުމީ ވިދާޅުވިއެވެ.
"އަންދާޒާ ކުރެވެނީ ޖުލައިމަހު ލިބޭ ބިލްވެސް ބޮޑުވާނެކަމަށް. އެއީ ސަބަބަކީ ހަމަ އަޅުގަނޑުމެންގެ ކޮންސަމްޕްޝަން ޕެޓާންއަކަށް ނެތް މާބޮޑު ބަދަލެއް އައިސްފައެއް،" ފަހުމީ ވިދާޅުވި އެވެ.
ކަރަންޓް ބޭނުންކުރާއިރު ބޭނުންވާވަރަށްވުރެ އިތުރަށް ކަރަންޓު ބޭނުންނުކުރުމަށް އިލްތިމާސްކުރައްވަމުން ފަހުމީ ވިދާޅުވީ ކުދިކުދި ކަންތައްތައް ރަނގަޅުކޮށްލައިގެން ކަރަންްޓު ބޭނުންކުރެވޭ ވަރު އިގްތިސާދު ކުރެވޭނެކަމަށެވެ.
މިބައްދަލުވުމުގައި ވާހަަކަ ދައްކަވަމުން ފެނަކަ ކޯޕަރޭޝަންގެ ޑެޕިއުޓީ ޑިރެކްޓަރު އަހުމަދު ނަޖާހު ވިދާޅުވީ ކަރަންޓް ބިލް ބޮޑުވަނީ އަޅުގަނޑުމެން ކަރަންޓަށް ދޭން ޖެހޭ ސަމާލުކަން ނުދެވިގެން ކަމަށާއި ކޮންމެ އަހަރަކުވެސް ކަރަންޓު ބިލް ބޮޑުވެގެން ޝަކުވާ އަންނަނީ މާޗް، އޭޕްރީލް އަދި މޭ މަހު ކަމަށެވެ. ނަމަވެސް މިއަހަރު އެޝަކުވާ ނާންނަ ކަމަށާއި އެއީ ހީވާގޮތުގައި މިއަހަރުގެ އޭޕްރީލް/މޭ/ޖޫން މަހަށް ސަރުކާރުން 40 ޕަސެންޓްގެ ޑިސްކައުންޓެއް ދީފައިވުމުން ކަމަށް ވެސް ނަޖާހް ވިދާޅުވިއެވެ.
Ads by STO
