ލޯބި ނުވާއިރު، ލޯބިވެޔޭ ނުބުނޭ! ނޭނގި ހުރެވެސް ތިދެވެނީ ވަރަށް ބޮޑު އަނިޔާއެއް!
ވަރަށް ގިނައިން ވާކަމެކެވެ. ތިމާމީހާ ހިތް އެދޭ ސިފަތަކެއް އަނެކާގެ ކިބައިގައި ހުރިނަމަ، މާގިނަ ވިސްނުންތަކެއް ނުވިސްނާ އެމީހެއް ދެކެ އެވެވެނީ ލޯބިކަމުގައި ނިންމުމެވެ.
އެމީހެއް ގާތުގައި ވެސް އެހެން ބުނެވެއެވެ. އަދި ނަތީޖާއެއްގެ ގޮތުން އެމީހެއްގެ ހިތުގައިވެސް ޚާއްސަ ޙިޔާލުތަކެއް އުފެދި، ދެމީހުންގެ ގުޅުން އެހިސާބުން ބަދަލުވެ ގާތް ވެގެން ދެއެވެ.
ނަމަވެސް ދުވަސްކޮޅެއް ފަހުން އެޙިޔާލުތައް އެއްކޮށް ބަދަލުވާން ފަށައެވެ. "ލޯބި ވެޔޭ" އެބުނާ މީހާ އަށް އެއްގޮތަކަށް ވެސް ވަގުތު ނުދެވުމާއި އެހާ ސަމާލުކަން ދޭން ވެސް ހިތައް ނާރައެވެ. ގިނަ ފަހަރަށް އޭނައާއި އަނގައިން ބުނެލަން ވެސް ވަގުތު ނުދެވުމާއި، އަމިއްލައަށް އިސްވެ ވާހަކަ ނުދެވުން ވެސް ހިމެނެއެވެ.
މިފަދައިން ކަންތައް ކުރުމުން އޭނާއަށް ޝަކުވާ ކުރެވި، ޝައްކު ކުރެވި ދެމީހުންގެ ގުޅުން ހީނަރުވެގެން ދެއެވެ. އަދި ކުރިން "ލޯބިވެޔޭ" ބުނި މީހާއަށް ސަމާލުކަމެއް ނުދެވި އެފަދައިން އަނެއްކާ އެހެން މީހެއްގެ ކިބައިން ވެސް ޚާއްސަ ސިފަތަކެއް ފެނި، އަނެއްކާ ވެސް އެބުނާ ލޯތްބެއް އެހެން މީހެއް ދެކެ ވެވިއްޖެކަމަށް ގަބޫލު ކުރެވެއެވެ.
ނަތީޖާއެއްގެ ގޮތުގައި ތިމާ އެވަރަށް ލޯބިވެޔޭ ބުނި މީހުން ހިތުގައިޖެއްސި، އެމީހުންގެ ދިރިއުޅުން ހިތާމައެެއްގެ ތެރެއަށް ވައްޓާލެވެއެވެ.
މިއީ ހަގީގަތުގައި ކުރެވޭ ވަރަށް ނުރައްކާތެރި ކަމެއް ކަމަށް އެމެރިކަން ސައިކެޓްރިކް އެސޯސިއޭޝަންގެ ޑޮކްޓަރެެއް ކަމަށްވާ ޑރ. މިޝޭލް ވެބަރ ވަނީ ބުނެފައެވެ.
ޑރ. މިޝޭލް ބުނި ގޮތުގައި މީހެއްގެ ހުންނަ ޚާއްސަ ސިފަތަކެއް ކަމުގޮސްގެން އެމީހެއް ދެކެ "ލޯބިވާ ކަމަށް" އެހާ އަވަހަށް ބުނާކަށް ނުވާނެއެވެ. އެއިރުން ބޭނުންނުވެ ހުރެ ވެސް އެކުޅެވެނީ އެހެން މީހެއްގެ އިހުސާސްތަކާއެވެ. އަދި އޭގެ ނަތީޖާ ވަރަށް ދެރަ ކަމަށް ވެސް ޑރ. މިޝޭލް ބުނެފައިވެއެވެ.
"އަހަރެން ކައިރިއަށް ވެސް މިފަދަ ވަރަށް ގިނަ ކޭސް އައިސްފައިވޭ. ބައެއް މީހުން ގިސްލާފަ ރޮމުން އަހަމުން ގެންދަނީ އޭނާއަށް އެމީހަކު އެހެން ހެދީ ކީއްވެކަން ނުވިސްނޭ ކަމަށް. ލޯބިވެޔޭ ކިޔާފައި އުފާވެރިކަން ދީފަ ފަހުން އަޅާވެސް ނުލާކަމަށް. ބައެއް މީހުން އެމީހުންގެ އަމިއްލަ ނަފްސު ވެސް އެކަންކަމަށް ކުށްވެރިކުރޭ. އެއީ އެމީހަކު ހުންނަ ސިފައާއި ހެދި ނޫނީ އެފަދަ ކަމެއްގެ ސަބަބުންވީ ކަމެއް ކަމަަށް ނޫނީ އޭނާއަށް ލިބޭ އަދަބެއް ކަމަަށް ވެސް ޤަބޫލުކޮށް ވަރަށް ބޮޑަށް އެކަމާއި ހިތާމަ ކުރޭ" ޑރ. މިޝޭލް ބުންޏެވެ.
މީގެއިތުރުން ޑރ. މިޝޭލް ބުނީ އެފަދައިން ހިތުގައި ޖެހިފައި ހުންނަ މީހުންގެ ހިތް ހަގީގަތުގައި އެހުންނަނީ ވަރަށް ބޮޑަށް ހަލާކުވެފައިކަމާއި ވަކިން ޚާއްސަކޮށް ކުރިންވެސް ދިރިއުޅުމުގައި ހިތާމައާއި ނާކާމިޔާބީ އާއި ކުރިމަތިލާން ޖެހުނު މީހަކަށް މިފަދައިން އަނެއްކާ ދިމާވުމުން އެމީހުން ދިރިއުޅުން މަތިން ފޫހިވެ، މީހުންނަށް އިތުބާރު ވެސް ކުރުން ހުއްޓި، ނަފްސާނީ ބަލީގެ ޝިކާރައަކަށް ވެގެންދާ ކަމަށެވެ.
އެފަދައިން ދެރަވާ ގިނަ މީހުންނަށް ހުންނަނީ "ބްރޯކަން ހާޓް ސީންޑްރޯމް" ޖެހިފައި ކަމަށާއި އޭގެ ސަބަބުން ނޭވާލާން އުނދަގޫވެ، މޭގައި ރިއްސުން ފަދަ ކަންކަން ވާނެ ކަމަށެވެ. އަދި އެއުޅެނީ ހާޓް އެޓޭކެއް ޖެހެން ކަމަށް ހީވެ، އެމީހުން އިތުރަށް ހާސްވާ ގޮތްވާނެ ކަމަށް ޑރ. މިޝޭލް ބުނެފައިވެއެވެ.
އެހެންކަމުން ލޯބިވާ ކަމަށް މީހަކު ދެކެ ބުނުމުގެ ކުރިން އެވަނީ ހަގީގަތުގައި ވެސް ލޯބިތޯ، ތިމާއާއި އެމީހަކު ކައިރި ކުރުމަށްފަހު ކުއްލިއަކަަށް ތިމާ އަމިއްލައަށް ބަދަލު ނުވާނެކަން ޔަގީންވުމުން ނޫނީ އެއްވެސް މީހެއް ގާތު އެހެން ނުބުނުމަށާއި "ލޯތްބަކީ" ވަރަށް ވަރުގަދަ ބަހެއް ކަމަށް ވެސް ޑރ. މިޝޭލް ބުނެފައިވެއެވެ.
