ބިދޭސީންނާ ގުޅޭގޮތުން މާރިޔާ އާއި ޝަމާލު ދެއްކެވި ވާހަކަތަކުގެ ހަގީގަތް ހާމަކުރުމަށް އިދިކޮޅުން ގޮވާލައިފި
ބިދޭސީންނާ ގުޅޭ ގޮތުން މަޖިލީހުގެ ގައުމީ ސަލާމަތާއި ހާރިޖީ ގުޅުންތަކާއި ބެހޭ ކޮމިޓީގައި ވާހަކަ ދައްކަވަމުން ޑިފެންސް މިނިސްޓަރު މާރިޔާ ދީދީ އަދި ޗީފް އޮފް ޑިފެންސް ފޯސް އަބްދުﷲ ޝަމާލު ބިދޭސީންނާ ގުޅޭ ގޮތުން ދެއްކެވި ވާހަކަތަކުގެ ހަގީގަތް ހާމަ ކުރުމަށް އިދިކޮޅު ޕީޕީއެމް/ޕީއެންސީ ކޯލިޝަނުން ގޮވާލައިފިއެވެ.
އެ ކޮމިޓީގައި ވާހަކަ ދައްކަވަމުން މިނިސްޓަރު މާރިޔާ ވިދާޅުވީ ބިދޭސީން، މުޒާހަރާކޮށް ހަމަނުޖެހުން ހިންގަނީ، ހަައްގުތަކެއް ނުލިބިގެން ނޫން ކަމަށާއި، އެކަމުގެ ފަހަތުގައި ފޮރުވިފައިވާ އެހެން ސަބަބުތަކެއްވާކަން ގަބޫލު ކުރައްވާ ކަމަށެވެ.
ހަމަ އެ ކޮމިޓީގައި ވާހަކަ ދައްކަވަމުން ޗީފް އޮފް ޑިފެންސް ފޯސް، ޝަމާލް ވިދާޅުވީ ރާއްޖޭގައި ބިދޭސީންގެ މައްސަލަ އިންތިހާއަށް ބޮޑުވެ، މިހާރު ފެނިގެން ދަނީ އިސްތިއުމާރީ ބޮޑު ބާރަކުން ހިފާފައި އޮތް ގައުމަކުން ވެސް ފެންނާނެ ފަދަ މަންޒަރުތައް ކަމަށެވެ.
މި ވާހަކަތަކާ ގުޅިގެން އިދިކޮޅު ކޯލިޝަނުން ނެރުނު ބަޔާނެއްގައި ވަނީ ކޮމިޓީގައި ވާހަކަ ދައްކަވަމުން، ބިދޭސީން ރާއްޖޭގައި ހަމަނުޖެހުން ހިންގަމުން ދަނީ ކޮންމެހެން މުސާރަ ނުލިބިގެން ނޫން ކަމަށާއި އެކަމުގެ ފަހަތުގައި ފޮރުވިފައިވާ ކަންތައްތަކެއް ވާކަމަށް މާރިޔާ ވިދާޅުވެފައިވާ ކަމަށާއި އެހެން ކަމުން އެކަންތައް ތަކަކީ ކޮބައިކަން ރައްޔިތުންނަށް ހާމަކޮށްދިނުމަކީ މުހިންމު ކަމެއް ކަމުގައި ދެކޭކަމަށެވެ.
އަދި ޤައުމު މިހާރު އޮތީ އިސްތިއުމާރީ ބާރަކުން އަރާ ހިފީމައި އޮންނަ ކަހަލަގޮތަކަށް ކަމަށް، ޗީފް އޮފް ޑިފެންސް ފޯސް ޝަމާލު ވިދާޅުވެފައިވާއިރު އެއީ ކޮންވާހަކަފުޅެއްކަންވެސް ރައްޔިތުންނަށް ތަފްސީލުކޮށްދޭން ޖެހޭނެ ކަމަށް އިދިކޮޅު ކޯލިޝަނުގެ ބަޔާނުގައި ބުނެފައިވެއެވެ.
އިދިކޮޅު ކޯލިޝަނުން ވަނީ މާރިޔާ އަދި ޝަމާލު ދެއްކެވި ވާހަކަތަކުގެ އިތުރަށް ތަފްސީލުކޮށްދެއްވައި، ބިދޭސީން ރާއްޖޭގައި ހަމަނުޖެހުން ހިންގާ އަސްލު ސަބަބު ހާމަކޮށްދިނުމަށް ގޮވާލާފައެވެ. އަދި ރާއްޖޭގައި މަސައްކަތް ކުރާ ބިދޭސީންގެ ފަރާތުން މުޅި ޤައުމަށް ކުރިމަތިވެދާނެ ނުރައްކާތަކުން ސަލާމަތްވެ ތިބުމަށް އަޅަންޖެހޭ ފިޔަވަޅުތައް ހަރުދަނާ ކަމާއި އެކު އެޅުމުގައި ސަލާމަތީ ބާރުތަކުގެ ލަފަޔާއި އިރުޝާދާއި އެކު އަވަސް ކުރުމަށް އިދިކޮޅުން ގޮވާލާފައިވެއެވެ.
