އެމެރިކާއިން ރާއްޖެއަށް ގިނަ އަދަދެއްގެ ޕީޕީއީ ހަދިޔާކޮށްފި

މިތަކެތި ހަވާލުކޮށްދެއްވީ ލަންކާއާއި ރާއްޖެއަށް އެމެރިކާ އެމްބަސީއިން ކަނޑއަޅުއްވާފައި ހުންނަވާ ޑެޕިއުޓީ ޗީފް އޮފް މިޝަން، މާޓިން ކެލީ އެވެ. މިތަކެއްޗާ ހަވާލުވެލެއްވީ ރާއްޖެއިން ލަންކާއަށް ކަނޑައަޅުއްވާފައި ހުންނަވާ ހައި ކޮމިޝަނަރު އުމަރު އަބްދުއްރައްޒާގު އެވެ.

ފޮރިން މިނިސްޓްރީން ބުނީ މިތަކެތީގެ ޖުމުލަ އަގު 150،000 އެމެރިކާ ޑޮލަރަށް އަރާނެ ކަމަށެވެ. މި ހިލޭ އެހީއަކީ ކޮވިޑް19އާ ދެކޮޅަށް ހަނގުރާމަކުރަން އެމެރިކާއިން ގެންގުޅޭ ބައިނަލްއަގްވާމީ އުސޫލު، "އޯލް އޮފް އެމެރިކާ"ގެ ރަމްޒެކެވެ.

މިކަމާ ގުޅޭގޮތުން ޑީސީއެމް ކެލީ ވިދާޅުވީ ރާއްޖެއަށް ސިއްހީ އެހީތެރިކަން ފޯރުކޮށްދިނުމަކީ އެމެރިކާއަށް ލިބޭ ފަހުރެއް ކަމަށެވެ.

"ކޮވިޑް19ގެ ބަލިމަޑުކަން ތަހަމައްލުކުރަމުންދާ މީހުންނަށް ފަރުވާކޮށް، އަޅާލަމުންދާ ރާއްޖޭގެ ސިއްހީ ހިދުމަތްތެރިންނަށް ރައްކާތެރިކަން ފޯރުކޮށްދިނުމަކީ އެމެރިކާއަށް ލިބޭ ފަހުރެއް. މިތަކެތީގެ ސަބަބުން ވައިރަސް އިތުރަށް ފެތުރުނަ ނުދީ އިސް ސަފުގެ ހިދުމަތްތެރިންނަށް ރައްކާތެރިކަން ފޯރުކޮށްދެވޭނެ." ޑީސީއެމް ކެލީ ވިދާޅުވި އެވެ.

ތަކެތީގެ އެހީގެ އިތުރުން ކޮވިޑާ ގުޅުންހުރި ރާއްޖޭގެ އެކި ދާއިރާތަކުގެ ބޭނުންތަކަށް އަމާޒުކޮށްގެން ދެ މިލިއަން ޑޮލަރުގެ އެހީއެއް ވެސް އެމެރިކާއިން ދަނީ ފޯރުކޮށްދެމުންނެވެ.

މިގޮތުން އެހީ ފޯރުކޮށްދޭ ދާއިރާތަކުގެ ތެރޭގައި ކޮވިޑް19އާގުޅުންހުރި ކަންކަމުގައި އިޖުތިމާއީ ރައްކާތެރިކަން ފޯރުކޮށްދިނުމަށާއި ކޮވިޑުން އަރައިގަތުމަށް ސިޔާސަތުތައް ފަރުމާކުރަން ބާރުއެޅުމަށް މަދަނީ ޖަމިއްޔާތަކުން ކުރާ މަސައްކަތްތައް ފުޅާކުރަން އެހީތެރިވުން ހިމެނެ އެވެ. އަދި މިކަމުގެ ތެރޭގައި ކޮވިޑުން އަރައިގަތުމަށް އެޅޭނެ އިގްތިސާދީ ފިޔަވަޅުތައް ކަނޑައެޅުމަށް ދިވެހި ސަރުކާރަށް އެހީތެރިވުން ވެސް ހިމެނެ އެވެ.

ކޮވިޑުގެ ބަލިމަޑުކަން ފެށުނީއްސުރެ އެމެރިކާގެ ސްޓޭޓް ޑިޕާޓްމަންޓާއި ޔޫއެސް އެޖެންސީ ފޮ އިންޓަނޭޝަނަލް ޑިވެލޮޕްމަންޓުން ވަނީ ދުނިޔޭގެ އެކި ގައުމުތަކަށާއި މަދަނީ އަދި ބައިނަލްއަގްވާމީ ޖަމިއްޔާތަކަށް އަމާޒުކޮށް ސިއްހީ، އިންސާނީ، އިގްތިސާދީ އަދި ތަރައްގީގެ އެހީތެރިކަން ފޯރުކޮށްދޭނެ ކަމަށް އިއުލާނުކޮށްފަ އެވެ.

ސިއްހީ ދާއިރާއިން ބައިލެޓްރަލް އެހީ ފޯރުކޮށްދިނުމުގައި އެންމެ ކުރީގައި އުޅޭ ގައުމަކީ ވެސް އެމެރިކާ އެވެ. އެގޮތުން 2009 ވަނަ އަހަރުން ފެށިގެން 100 ބިލިއަން ޑޮލަރުގެ ސިއްހީ އެހީއާއި 70 ބިލިއަން ޑޮލަރުގެ އިންސާނީ އެހީ ދުނިޔޭގެ އެކި ގައުމުތަކަށް އެމެރިކާއިން ވަނީ ފޯރުކޮށްދީފަ އެވެ.