ޙަޤީޤީ ޙާދިޘާ: ފަތުރުވެރިއެއްގެ މަކަރުވެރި ދަލުގައި ޖެހި ދިވެހި ޒުވާނަކަށް އެޗްއައިވީ ޖެހުނު ގޮތުގެ ވާހަކަ
އެއީ 2003 ހިސާބެވެ. އަހަރެންގެ ހަޔާތުގެ އެންމެޒުވާން ދުވަސްވަރެވެ. މަދަރުސީ ހަޔާތް ނިންމާލުމަށްފަހު އަހަރެން އެންމެގަޔާވި މަސައްކަތުގެ ދާއިރާއިން ވަރަށް ރަނގަޅުވަޒީފާއެއް އަހަރެންހޯދީމެވެ. ރިސޯޓެއްގެ ވޯޓަރ ސްޕޯރޓްސް ސްކޫލްގެ ވަޒީފާއެކެވެ. އަހަރެންގެމައިގަނޑު މަސައްކަތަކީ ފަތުރުވެރިންނަށް ވިންޑްސާރފްކުރަން ދަސްކޮށްދިނުމާއި، ބަނާނާބޯޓް ދުއްވުމާއި އަދި ޖެޓްސީ ދުއްވުންފަދަ ކުޅިވަރުތަކުގައި ފަތުރުވެރިންނާއި ބައިވެރިވެ އެމީހުންނާއިއެކު ސަކަރާތުގައި މުޅިދުވާލު އެއްކޮށްހެން ހޭދަކުރުމެވެ. ހަޤީގަތުގައިވެސް އެއީ ވަރަށްމަޖާ ވަޒީފާއެކެވެ. އެހާމެ ލާރިލިބެއެވެ.
މިގޮތުގައި ދެއަހަރެއްހާ ދުވަސްވޭތުވެ ހިނގައްޖެއެވެ. އަހަރެން އާދައިގެމަތިން މަސައްކަތް އޮންނަ ގޮތުން ހެނދުނު ޑިޔުޓީއަށް އައިސް ކަނދުދުއްވާލަފައި އައިސް ގޮނޑުދޮށަށް ރާޅުޖަހާހިސާބުގައި މަޑުކޮށްލައިގެން އިންދައި އަހަރެންގެ ކޮނޑުމަތީގައި މަޑު އަތަކުން ޖެހުމުން ފަހަތަށް އެނބުރި ބަލައިލީމެވެ. އަހަރެން ދުވަހަކު ވެސް އެހާރީތި އަންހެންކުއްޖަކު ނުދެކެމެވެ. އޭ އަހަރެން ގޮވައިގެން ކަނދުދުއްވާލަންދެވިދާނެތަ؟ ލަދުރަކިގޮތަކަށް ހިނިތުންވެލަމުން އޭނާ ބުންޏެވެ. އަހަރެން ވަރަށްއަވަހަށް ކަނދުގެ ރިޔާނެގުމަށްފަހު ކުރިޔަށް އެރުމަށް ބުނީމެވެ. ކަނދު ދުއްވާލުމާއި އެކު ވިލުތެރޭގައިވާ ކުޑަފިނޮޅަށް ކައިރިކުރުމަށް އެކުއްޖާ އިޝާރާތް ކޮށްލިއެވެ. އަހަރެން ދުއްވާފައި ގޮސް އަނބުރާލަން އުޅުމުގެ ތެރޭގައި ކަނދުއަރިއަޅައިލައިތަނާ އެއަންހެންކުއްޖާ ވިލުގެ ތެރެއަށް ވެއްޓުނެވެ. އަންހެންކުއްޖާ އަޑިޔަށްދާން ފެށުމުން އަހަރެން ކުއްލިޔަކަށް ފުންމާލައި ކަނދަށް ކުއްޖާ ނެގީމެވެ. އެ އަންހެންކުއްޖާ މަލާމާތުގެ ރާގަކަށް ހީލާފައި ބުންޏެވެ. ''އަސްލު އެނގޭތަ މަށަށް ފަތަން ވެސް އޭނގޭ އެކަމަކު ކަލޭމެން އަހަރެމެންނާ ދޭތެރެ ފަރުވާތެރިވާވަރު ބަލައިލީ" ! އަހަރެން ވަރަށްލަދުގަތެވެ. އަހަރެން އަނެއްކާވެސް ދުއްވާފައި ގޮސްފިނޮޅާ ކައިރިކޮށްލީމެވެ. އެއަންހެންކުއްޖާ ބުންޏެވެ. " މީ ހާދަހިތްޤައިމު މާހައުލެކޭދޯ އަހަރެން ހިތައްއަރާ މިފަދަޤައުމެއްގެ ކުއްޖަކަށް އަހަރެންވީނަމައޭ"
މިފަދަފޮނި ތުއި އިބާރާތްތަކަކުން އަހަރެންގެހިތް އޭނާއަށް ލަންބުވާލިއެވެ. އަހަރެންވެސް ފަހުންލަދުކެނޑި މިކުއްޖާޔާ ވާހަކަދައްކަން ފެށީމެވެ. ހަޤިޤަތުގައިވެސް ވަރަށްސީރިޔަސް ގޮތަކަށް އެކުއްޖާ މިރާއްޖޭގެ ކުއްޖަކާ އިންނަންބޭނުމޭ ބުންޏެވެ. އަދި މީއަހަރެން ވަރަށް ދުވަސް ވަންދެންވެސް ކުރިއިންތިޒާރެއް ކަމަށްބުނެ އަހަރެން ހިތަށް ހަމަ ރަނގަޅަށް ވެސް ވަނެވެ. ގިނަވަގުތުތަކެއް ފިނޮޅުގައި ހޭދަކުރުމަށްފަހު ރިސޯޓަށް ދިޔައީމެވެ. ދެމީހުންވެސް ފަހުން ބައްދަލު ކުރުމަށްނިންމުމަށްފަހުއެވެ.
އެކުއްޖާގެ ވާހަކައިން އެނގުނުގޮތުގައި ޗުއްޓީ ހޭދަކޮއްލަން އެކަނި ރާއްޖެއަށް އައީވެސް މަންމަމެން ރާއްޖޭ މީހަކާ އިނުމަށް ހުރަސް އަޅާފާނެތީއެވެ. އަދި ރާއްޖެ އައިތާ ދެދުވަސްވެއްޖެ ކަމަށާއި، އަހަރެން ބޭނުންނަމަ ދާއިރު ދާނީ ކައިވެނި ކުރާގޮތަށް ހުރިހާކަމެއް ނިންމާފައި ކަމަށްވެސް ބުންޏެވެ. އަދިއެރޭ އެކަމާ މަޝްވަރާކުރުމަށް ރޫމަށް އައުމަށްވެސް ދައުވަތު ދިނެވެ.
އަހަރެންގެ ހިތަށް ހަމަރަނގަޅަށްވެ ސް ޝައިތާނާ އެހިސާބުން ސަވާރުވީ ކަމެއް އަހަރެންނަކަށް ނެނގެއެވެ. އެހާ މުއްސަނދި ރީތިކުއްޖަކު އަހަރެންގެ ހަޔާތުގެ ބައިވެރިޔަކަށް ވާން ބޭނުންވާތީއެވެ. އެރޭ ކެއުން ނިންމާލުމަށްފަހު ރިސޯޓްގެ އަތިރިމަތީގައި ހުރި ކުޑަރުކެއްގެ ކައިރީގައި އަހަރެންމަޑުކޮށްލައިގެން ހުއްޓައި މިކުއްޖާ އަހަންނަށް ގުޅިއެވެ. އަދި ނާންނާތީ ވަރަށް މިސްވެފައި އިން ކަމަށް ބުނުމުން އަހަރެން ވަރަށް ސިއްރުގޮތަކަށް މިކުއްޖާގެ ކޮޓަރިޔަށް ދިޔައީމެވެ.
ކޮޓަރިޔަށް ވަނުމާއި އެކު ރަތްކުލައިގެ ފިނިފެންމަލަކުން މަރުހަބާ ކިޔެވެ. ވަރަށް ދެރަވާ ކަހަލަ ގޮތަކަށް އަހަންނާ ފުރަގަސްދީގެންހުރެ އަސަރުގަދަ ބަސްތަކަކުން އަހަންނާ މުހާތަބުކުރިއެވެ. ތިމަންނާޔަށް ދުވަހަކުވެސް ތިހާރީތި ކުއްޖަކާ ދިމާނުވާ ކަމަށާއި ހަޤީގަތުގައިވެސް ރާއްޖެ ދޫކޮށްފައި ދިޔުމަކީ ވަރަށް އުނދަގޫ ކަމަކަށް ވެއްޖެކަމަށާއި، ކުރިޔަށް އޮތްތަނުގައި ދިވެހިވަންތަ ދިރިއުޅުމެއް އުޅެން ބޭނުންކަމަށް ބުނެ އަހަރެންގެ މުޅި ހިތް އަނބުރާލިއެވެ. އެވަގުތު އަހަރެންގެ ނަފްސަށް ޝައިތާނާ ސަވާރުވީ ކިހިނެތްކަން އަހަންނަށް ބުނެދޭން ވެސް ނޭނގެއެވެ. ވަރަށް ސީރިޔަސްވެ ހުރެ ބަދުއަޚްލާޤީ ފާޙިޝް އަރާމު ވަގުތީ ފޮނިލައްޒަތާއެކު ގަޑިއެއްހާއިރުވަންދެން ލިބިގަތީމެވެ. އޭގެފަހުން މިއަންހެންކުއްޖާ އަހަންނާ މުހާތަބުކޮށް ބުންޏެވެ. ތިފަދަގޮތަކަށް އަހަންނާ ދުވަހަކުވެސް މީހަކު މަރުހަބާ ކިޔާފައެއްނުވެއެވެ. ހަޤިގަތުގައިވެސް ސީރިޔަސް މީހުންނަކީ ތިއީއެވެ. މިފަދަ ފޮނި ބަސްތަކަކުން މުހާތަބުކުރުމުގެ ތެރޭގައި އޮވެވުނެވެ. ވަރަށްބޮޑަށް ނިދިއައިސް މީހާ މޯޅިވާގޮތް ވުމުން ކަންނެތްކަމާއި އެކު އެކުއްޖާގެ ފޮނިބަސްތައް އަޑުއެހުމުގައި އަހަރެންއޮތީ ދެންއެރޭ އެތާ ނިދާލާފައި ހެނދުނު އަވަހަށް ރޫމްބޯއީ އައުމުގެ ކުރިން ތެދުވެގެން ދާން ނިންމުމަށްފަހުއެވެ.
އަހަންނަށްހޭލެވުމާއިއެކު ގަޑިބަލައިލީމެވެ. ގާތްގަނޑަކަށް އޭރު ހަތެއް ޖަހަނީއެވެ. ތެދުވިއިރު ފާހާނާގެ ބޮކި ހުރީ ދިއްލާފައެވެ. އަންހެންކުއްޖާ ފެންނާކަށް ނެތެވެ. ފާހާނާގައިކަމަށް ހީކޮށްބައިގަޑިއެއްހާއިރު މަޑުކުރުމަށް ފަހު ތެދުވެ ރަނގަޅަށް ކޮޓަރިތެރެޔަށް ބަލާލީމެވެ. ނިދާފައިއޮތް ބާލީހުގެކައިރީގައި އެރަތްކުލައިގެ ފިނިފެންމަލާއި ސިޓީއެއް ކަހަލަ ކަރުދާސްކޮޅެއް ފަތްޖަހާފައި އޮތެވެ. އަހަރެން މިކަރުދާސްކޮޅު ނަގާ ހުޅުވާލީމެވެ. އަދިކިޔަންފެށީމެވެ.
ލޯބީއެވެ. އަހަރެން މިހާރު މިހުރީ ކަލާޔާ އެތައްހާސް މޭލެއްދުރުގައެވެ. ހަޤީގަތުގައިވެސް އަހަރެން ކަހަލަ ސީރިޔަސް މީހުން މިދުނިޔޭގައި އުޅޭނެކަން ތިބާ ނުދަންނަން ހެއްޔެވެ. ހަޤީގަތުގައި ވެސް ބުނަންހެއްޔެވެ. އަހަރެންނަކީ އަހަރެންގެ ހަޔާތް ބަރުބާދުވެފައިވާ މީހެއްކަން އެނގުނު ހިސާބުން ފެށިގެން، މިދުނިޔޭގެ އެކަކުވެސް ސަލާމަތުން ބެހެއްޓުމަކީ އަހަރެން ބޭނުންވާ ގޮތެއް ނޫނެވެ. އަހަރެންގެ މައިންބަފައިންނަށްލިބޭ ލާރީގެ ބޮޑުބައެއް އަހަރެންގެ ހަޔާތުގެ އުފަލަށްޓަކައި ހޭދަކުރެއެވެ. އެހެންވެކަލެޔަށް ވެސް ތިބާލީސްދަށުގައި 2000 ޑޮލަރު އޮންނާނެއެވެ. ކަލެޔަކީ މިހާރު އަހަރެން ކަހަލަ މީހެކެވެ. އެޗްއައިވީގެ ބައިވެރިޔެކެވެ. ދެންކުރިޔަށް އޮތްދުވަސްތައް އުފަލާއިއެކު ހޭދަކޮށްލާށެވެ.
އަހަރެން ބަލާކަށްނުހުރެ އަވަހަށް ރިޝެޕްސަނަށް ފޯނުކޮށްލީމެވެ. ރިޝެޕްސަނުން ޖަވާބުދިން ކުއްޖާ ބުނީ މިރޫމްގައި އުޅުނުކުއްޖާ ރޭ 5:30 ގެފުލައިޓްން ފުރައިފި ކަމަށެވެ. އެކުވެރިންނޭވެ. އަހަރެން އޭގެ ފަހުން ޑިޔުޓީއަށް ނުވެސް ދަމެވެ. އަދި އެއްވެސްމީހަކު ގާތުގައިމިވާހަކަ ނުބުނެހުރެ ހަފްތާއެއް ވީތަނާ ވަޒީފާއިން ވަކިވީމެވެ. އަދި އަމިއްލަރަށަށް ދިޔައީމެވެ.
އެކުވެރިންނޭވެ! އަހަރެންގެމުޅިހަޔާތް ބަރުބާދުވެގެން ދިޔައީ ކުޑަކުޑަހިނދުކޮޅަކަށް ހޯދި އުފަލެއްގެ ސަބަބުންނެވެ. އެކުވެރިންނޭވެ! ވިސްނާށެވެ. ހެއްދެވި ފަރާތްދެކެ ބިރުވެތިވީނަމަ އަހަރެންސަލާމަތް ވީސްކަންކަށަވަރެވެ. އެކުވެރިންނޭވެ. ވިސްނާށެވެ އަހަރެން ފާހިޝްކަމަކަށް އެންމެފަހަރަކު ވެސް އަރައިނުގަނެވުނަމައޭ މިހާރުހިތަށް އެރުވިޔަސް ދެންކުރާނެކަމެއްނެތެވެ. އެކުވެރިންނޭވެ .ކިރިޔާ ވެސް ނުސީދާމަގަކުން ނުދިޔުމަށް އަހަރެން ތިޔަހުރިހާ އެކުވެރިންނަށް ނަޞޭހަތްތެރިވަމެވެ. އީމާންކަން ވަރުގަދަކުރާށެވެ. އެހެންނޫނީ ދެދުނިޔޭގައިވެސް ސަލާމަތެއްނެތެވެ. އަޅުގަނޑުމެން އެންމެން މިނުބައި ވަބާއިން ސަލާމަތްކުރައްވާށި އާމީން!
ނޯޓް: މިއީ އެއިޑްސްގެ ޝިކާރައަކަށްވި ދިވެހި ޒުވާނެއް ، އޭނާގެ ވާހަކަ ކިޔައިދިން ގޮތަށް ނޫރުލް އިސްލާމުން ގެނެސްދީފައިވާ ލިޔުމެކެވެ. މި ޒުވާނާ މިހާރުވަނީ ދުނިޔޭގެ ޙަޔާތާއި އަލްވަދާޢު ކިޔާފައެވެ. ﷲ ތަޢާލާ އޭނާއަށް ފާފަ ފުއްސަވައި ރަޙްމަތް ލައްވާންދޭވެއެވެ. މި ލިޔުން ގެނެސްދިނުމުގެ ބޭނުމަކީ ނޫރުލް އިސްލާމުން އެދިފައިވާ ގޮތަށް ޒިނޭގެ ފާފައިން ސަލާމަތްވުމަށް މަގުފަހި ކޮށްދެވޭތޯއެވެ.
