އަންނަ މަހު 16 ގައި މާލޭ ސްކޫލްތަކުގައި ގްރޭޑް 7 އާއި 8 އަށް ކިޔަވައިދޭން ފަށަނީ
މާލޭ ސަރަހައްދުގެ ސްކޫލުތަކުގައި ގްރޭޑު 7 އާއި ގްރޭޑް 8 ގެ ކިޔެވުން އަންނަ މަހުގެ 16 ވަނަ ދުވަހު ފެށުމަށް ނިންމައިފިއެވެ.
ކޮވިޑް-19އާ ގުޅިގެން ރާއްޖޭގެ ހުރިހާ ސްކޫލްތަކެއްގެ ކިޔެވުން މެދުކަނޑާލުމަށްފަހު 1 ޖުލައި 2020 ގައި ވަނީ މާލޭ ސިޓީގެ ސްކޫލުތައް ފިޔަވާ ރާއްޖޭގެ ހުރިހާ ސްކޫލުތަކެއްގައި ގްރޭޑް 1 ން 12 އަށް ކިޔެވުން ވަނީ ފަށާފައެވެ. މާލޭގެ ސްކޫލުތަކުގައި ކިޔަވައިދޭން ފަށާފައިވަނީ ގްރޭޑް 9 ން 12 އަށެވެ. ނަމަވެސް ރާއްޖޭގެ އެއްވެސް ސްކޫލެއްގައި ފައުންޑޭޝަން ލެވެލްއަށް ކިޔަވާދޭން ފަށާފައެއް ނުވެއެވެ.
އެޑިއުކޭޝަން މިނިސްޓްރީން ބުނީ، މާލޭ ސިޓީގެ ސްކޫލުތަކުގައި ކީ-ސްޓޭޖް 3 ގައި ހިމެނޭ ގްރޭޑް 7 އަދި 8 ގެ ކިޔެވުން ފެށުމަށް ނިންމެވީ، ރާއްޖޭގައި ކޮވިޑް-19ގެ މިހާރުގެ ޙާލަތަށް ބަލާ، އެޗްޕީއޭގެ ލަފަޔާއެކު ކަމަށެވެ. އަދި ގްރޭޑް 7 އަކާއި 8 ގެ ކިޔެވުން މާލޭ ސިޓީގެ ސްކޫލުތަކުގައި 16 އޯގަސްޓް 202 ވާ އާދިއްތަ ދުވަހު ފެށުމަށް ހަމަޖެހިފައިވާކަމަށް އެޑިއުކޭޝަން މިނިސްޓްރީން ބުނެއެވެ.
މާލޭ ސިޓީގެ ސްކޫލްތަކުގައި ގިނަ އަދަދެއްގެ ދަރިވަރުން ކިޔަވަމުންދާއިރު، އިތުރު ދެ ގްރޭޑަކަށް ކިޔަވައިދޭން ފެށުމުން ދަތިތަކެއް ކުރިމަތިވިނަމަވެސް، ދަރިވަރުންނަށް ކިޔަވައިދެމުން ދާނީ މިހާރުވެސް ރައްކާތެރިކަމުގެގޮތުން އަޅާފައިވާ ފިޔަވަޅުތަކާ އެކުގައިކަން އެޑިއުކޭޝަން މިނިސްޓްރީން ބުނެއެވެ. އެގޮތުން ސްކޫލު މާޙައުލުގައި އިޖްތިމާޢީ ގައިދުރުކަން ބެހެއްޓުމާއި، ސްކޫލަށް ވަންނައިރު މާސްކްއެޅުމާއި، ހުން ބެލުން ފަދަ ކަންކަން ކުރަމުންދާނެ ކަމަށް އެ މިނިސްޓްރީން ބުނެއެވެ.
