ގެސްޓްހައުސްތައް އަންނަ މަހު ނުހުޅުވަން ނިންމައިފި
ގެސްޓްހައުސްތައް އަންނަ މަހު ނުހުޅުވަން ސަރުކާރުން ނިންމައިފި އެވެ.
މީހުން ދިރިއުޅޭ ރަށްރަށުގައި ހިންގާ ގެސްޓްހައުސްތައް އޮގަސްޓް މަހު ހުޅުވާލުމަށް މީގެ ކުރިން ނިންމާފައިވީ ނަމަވެސް މިރޭ އައްޑޫ ސިޓީ، ފުވައްމުލަކު ސިޓީ އަދި ހއ. އިހަވަންދޫގެ ކޮވިޑް މެނޭޖްމަންޓް ފެސިލިޓީ ހުޅުވަން ބޭއްވި ރަސްމިއްޔާތުގައި ހެލްތު މިނިސްޓަރު އަބްދުﷲ އަމީން ވިދާޅުވީ އެ ނިންމުން ރިވިއު ކުރުމަށްފަހު، އަންނަ މަހު ގެސްޓްހައުސްތައް ނުހުޅުވާ ގޮތަށް ނިންމާފައިވާ ކަމަށެވެ.
"އޮގަސްޓް މަހުގެ 15 ގައި އަޅުގަނޑުމެން އަލުން ރިވިއުކޮށްފައި ގެސްޓްހައުސްތައް އަލުން ހުޅުވޭނީ ކޮން ހިސާބެއްގައިކަން އަޅުގަނޑުމެން އިއުލާން ކުރާނަން،" މިނިސްޓަރު ވިދާޅުވި އެވެ.
މިނިސްޓަރު އަމީން ވިދާޅުވި ގޮތުގައި، މިހާރު ބަލި ފެތުރެމުންދާ ނިސްބަތާއި އަތޮޅު ތެރެއިން ބަލި ފެންނަމުން އަންނަ ނިސްބަތަށް ބަލާއިރު ގެސްޓް ހައުސްތައް ހުޅުވޭނީ ސެޕްޓެމްބަރު މަހުގެ ކުރީކޮޅުގައި ކަމަށެވެ. އަދި ކުރިއަށް އޮތް ތަނުގައި އެކަމާގުޅޭ މައުލޫމާތުތައް ހިއްސާ ކުރަމުންދާނެ ކަމަށް ވިދާޅުވި އެވެ.
