އީދު ޗުއްޓީގައި ކޮންމެ ދަތުރު ކުރަންޖެހޭ ތަންތަނަށް ނުނީ ނުދިއުމަށް އިލްތިމާސް ކޮށްފި
ކުރިއަށް އޮތް އީދު ޗުއްޓީގައި ކޮންމެ ދަތުރު ކުރަންޖެހޭ ތަންތަނަށް ނުނީ ދަތުރު ނުކުރުމަށް ހެލްތު މިނިސްޓަރު އަބްދުﷲ އަމީން އިލްތިމާސް ކުރައްވައިފިއެވެ.
އައްޑޫ ސިޓީ، ފުވައްމުލައް ސިޓީ އަދި ހއ. އިހަވަންދޫގައި ކޮވިޑް މެނޭޖްމެންޓު ފެސިލިތީ ހުޅުވުމަށް މިރޭ ބޭއްވި ރަސްމިއްޔާތެއްގައި ވާހަކަދައްކަވަމުން މިނިސްޓަރުއަމީން ވިދާޅުވީ އީދު ޗުއްޓީ އަކީ އާންމުކޮށް ގިނަ ބަޔަކު އެއްތަނަކަށް އެއްވެ ވަރަށް އުފާވެރި ގޮތަކަށް ކަންކަން ކުރާ ދުވަސްވަރެއް ކަމަށާއި ނަމަވެސް އެހެން އަހަރުތަކުގެ އީދު ފާހަގަކުރާ ގޮތަށް އީދު ކުޅިވަރުތައް ބޭއްވުމާއި، ގިނަ މީހުން އެތަނަކަށް އެއްވުން ފަދަ ކަންތައްތައް ނުކުރުމަށް އިލްތިމާސްކުރާ ކަމަށެވެ.
"އަޅުގަނޑުގެ އިލްތިމާސަކީ އީދު ޗުއްޓީގައި ކޮންމެހެން ކުރަންޖެހޭ ތަންތަނަށް ނޫނީ ދަތުރު ނުކުރުން. މިފަހަރުގެ އީދު ޗުއްޓީ އަކީ، ޗުއްޓީ އެއް ކަމަށް ނުނަންގަވާ، މިފަހަރުގެ އީދު ޗުއްޓީ އަކީ އެއް ބަޔަކު އަނެއް ބަޔަކު ބަލިން ރައްކާތެރިކުރުމަށްޓަކާ ކުރެވެން އޮތް މަސައްކަތްތައް ކުރުމަށް ލިބޭ ފުރުސަތެއް ކަމަށް ބެލުމަކީ މުހިއްމު ކަމެއް" އަމީން ވިދާޅުވިއެވެ.
މީގެއިތުރުން މާލެ އިން އަތޮޅުތެރެއަށް ދަތުރު ނުކުރުމަށް އިލްތިމާސް ކުރާ ކަމަށާއި، އަދި އީދުގެ ކުޅިވަރުތައް އެހެން އަހަރުތަކުގައި ބާއްވާ ގޮތަށް ގިނަ ބަޔަކު އެއްވެ ކުޅިވަރު ކުޅުން ފަދަ ކަންކަމާއި ވީހާވެސް ބޮޑަށް ދުރުވުމަށް ވެސް އަމީން އިލްތިމާސް ކުރެއްވިއެވެ.
އަދި އަތޮޅުތެރޭގައި ވެސް އެއް ރަށުން އަނެއް ރަށަށް މި ދުވަސްވަރު ކޮންމެހެން ދަތުރުކުރަން ޖެހިގެން މެނުވީ ދަތުރު ނުކުރުމަށް ވެސް މިނިސްޓަރު އިލްތިމާސް ކުރެއްވިއެވެ.
ވާޗުއަލްކޮށް މިރޭ ރަސްމިއްޔާތު ޝަރަފްވެރިކޮށްދެއްވީ، ދިވެހި ރާއްޖޭގެ ޚާރިޖީ ވަޒީރު ޢަބުދުﷲ ޝާހިދު އެވެ. މީގެ އިތުރުން އެ ރަސްމިއްޔާތުގައި ހެލްތު މިނިސްޓަރ އަބްދުﷲ އަމީން އާއި ދާއިރާތަކުގެ މަޖިލިސް މެމްބަރުން ބައިވެރިވެވަޑައިގެންނެވިއެވެ.
