ކޭއެފްސީ ކުކުޅަށް ލޯބިކުރާ ފަރާތްތަކަށް ހާއްސަ ފައިވާނެއް
އެމެރިކާގެ މަޝްހޫރު ފާސްޓްފުޑް ޗެއިން ކާއެފްސީން ކުކުޅު މަސްގަނޑެއް ސިފަވާ ގޮތަށް ފައިވާނެއް ނެރެފިއެވެ. މި ފައިވާން ވެގެން ދިޔައީ ކޭއެފްސީ ކުކުޅަށް ލޯބިކުރާ ފަރާތްތަކަށް ވަރަށް ކަމުދިޔަ ފައިވާނަކަށެވެ.
އެކަން ހާމަވެގެންދިޔަ އެއް ސަބަބަކީ މި ފައިވާން ބާޒާރަށް ދޫކޮށްލިތާ ކުޑަ އިރުކޮޅެއްގެ ތެރޭގައި ފައިވާނުގެ ސްޓޮކް މުޅިން ވިކި ހުސްވުމެވެ.
ލިމިޓެޑް އެޑިޝަނެއްގެ ގޮތުގައި ނެރުނު "ކެންޓަކީ ފްރައިޑް ޗިކެން (ކޭއެފްސީ) ކްރޮކްސް" ފައިވާން ވިއްކަން ފެށިތާ ބައިގަޑިއެއްހާ އިރުގެ ތެރޭގައި ހުސްވެފައިވާކަމަށް ކޭއެފްސީން ބުނެފައިވެއެވެ.
ކޭއެފްސީން ގެނެސްދިނީ ކްރޮކްސް ޝޫޒްއާ ގުޅިގެން ނެރުނު މި ޕްރޮޑަކްޓަކީ ކޭއެފްސީ ފައުންޑޭޝަނުގެ ދަށުން ކުރިއަށް ގެންދާ އެޑިއުކޭޝަނަލް ގްރާންޓް ޕްރޮގްރާމަށް އެހީވުމުގެ ގޮތުން ނެރުނު އުފެއްދުމެކެވެ. ކެންޓަކީ ފްރައިޑް ޗިކެން (ކޭއެފްސީ) ކްރޮކްސް" ގެ ކޮންމެ ފައިވާނަކުން ތިން ޑޮލަރު ފައުންޑޭޝަނަށް ހަދިޔާކުރަން ނިންމާފައިވާ ކަމަށް ކޭއެފްސީ އިން ބުނެފައިވެއެވެ.
ވިކި ހުސްވެފައިވީނަމަވެސް ފައިވާން ގަތް ބައެއް ފަރާތްތަކުން އަންނަނީ އީބޭ ފަދަ ސައިޓު ތަކުގައި އަގުބޮޑުކޮށް މި ފައިވާން ވިއްކަމުންނެވެ.
