ގައިޑްލައިންތަކާ ޚިލާފުވި އިތުރު 3 ތަނެއް އެޗްޕީއޭ އިން ބަންދުކޮށްފި
ހެލްތު ޕްރޮޓެކްޝަން އެޖެންސީ(އެޗްޕީއޭ) އިން މިއަދު ކުރިއަށްގެންދިޔަ އިންސްޕެކްޝަންތަކަށް ފަހު މާލޭގެ އިތުރު ތިން ތަނެއް ބަންދުކޮށްފިއެވެ.
ކެފޭ، ޖިމް ފަދަ ތަންތަން އިންސްޕެކްޓު ކުރުމުގެ މަސައްކަތް އެޗްޕީއޭއިން އަންނަނީ ކުރަމުންނެވެ. އެ މަސައްކަތުގެ ދަށުން މިދިޔަ ބުދަ ދުވަހު ވެސް 27 ތަނެއް ވަނީ ބަންދުކޮށްފަ އެވެ. އަދި އިއްޔެ ވަނީ އިތުރު 50 ތަނެއް ބަންދު ކޮށްފައެވެ.
އެޗްޕީއޭ އިން ބުނީ މިއަދު ޖުމްލަ 35 ތަނެއް އިންސްޕެކްޓް ކޮށްފައިވާ ކަމަށާއި އޭގެތެރެއިން ބަންދުކޮށްފައިވަނީ ދެ ފިހާރަ އަކާއި އެއް ސެލޫނެއް ކަމަށެވެ.
މީގެ ކުރިން ހިންގި އިންސްޕެކްޝަނުގައި މާލޭގެ ފިހާރަ، ސެލޫން އަދި ކެފޭ ފަދަ ހުރިހާ ތަނަކަށް ގޮސް ކޮވިޑުގެ އުސޫލުތަކާ އެއްގޮތަށް ހުރި ތަންތަން ބަލައި، އުސޫލުތަކަށް ނުފެތޭ ކަންކަން ވަނީ ކިޔައިދީފަ އެވެ. މިހާރު ކުރިއަށްދާ ދެވަނަ އިންސްޕެކްޝަންގައި ބަލަނީ ކަންކަން ރަނގަޅުކޮށްފައިވޭތޯ އެވެ. ނުކުރާނަމަ ވަގުތުން ފިޔަވަޅު އަޅައެވެ.
