މުސްލިމުންގެ ފުރަތަމަ ގިބްލަ ، އަޤްޞާ ތަޅައިލާން އިސްރާއީލްގެ ޖަމާޢަތަކުން ގޮވައިލައިފި
ހުޅަނގު އައްސޭރީގެ ޤުދުސްގައި ހުންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތްކަމަށްވާ, މުސްލިމުންގެ ފުރަތަމަ ޤިބްލަ މަސްޖިދުލް އަޤްޞާއަށް ތަޅައިލުމަށް އިސްރާއީލުގެ ޖަމާއަތަކުން ގޮވާލައިފިއެވެ.
ފަލަސްތީނުގެ ބިން އިސްތިޢުމާރުކޮށް އެބިމުގައި ދިރިއުޅެމުން އަންނަ ޔަހޫދީން ހަދައިފައިވާ "ދަ ޓެމްޕަލް މައުންޓް ފެއިތުފުލް މޫވްމެންޓް" އިން ގޮވާލާފައި ވަނީ އަޤްޞާ މިސްކިތް ތަޅައިލާ އެތަނުގައި އެމީހުންގެ ފައްޅިއެއް އެޅުމަށެވެ. އަދި ފަލަސްތީނުގެ ރައްޔިތުން 'މައިތިރި' ކުރެވޭނީ މިސްކިތް ބިމާ ހަމަކޮށްލުމުން ކަމަށް އެޖަމާއަތުން ނެރެފައިވާ ބަޔާނެއްގައި ބުނެފައިވެއެވެ.
މިޖަމާއަތުން މިފަދަ ބަޔާންތައް މީގެ ކުރިން ވެސް ވަނީ ނެރެފައެވެ. އަދި ފަލަސްތީނުގެ މީހުންގެ ލޭ ހުއްދަކޮށް، އެއީ މަރަން ޖެހޭ ބައެއް ކަމަށްވެސް އެޖަމާއަތުން މީގެ ކުރިން ވަނީ ބުނެފައެވެ. އަދި އަޤްޞާ މިސްކިތް އިސްރާއީލްގެ ފުރިހަމަ ބެލުމުގެ ދަށަށް ގެނެސް، މިނިސްޓްރީ އޮފް ޖުވިސް ރިލިޖަން އާ މިސްކިތް ސަރަހައްދު ހަވާލުކުރަން ގޮވާލައިފައި ވެއެވެ.
މިކަމާ ގުޅިގެން މިމައްސަލަ ބަލައިދިނުމަށް ދުނިޔޭގެ ބައެއް ޖަމިއްޔާތަކުން އިސްރާއީލަށް ދަނީ ގޮވައިލަމުންނެވެ. އަަދި ދުވަސްވީ މިފަދަ ބޮޑު ބިނާއެއް ތަޅާލުމުގެ އިންޒާރު ދެމުން އަންނައިރު އެކަމާ ފިޔަވަޅު ނާޅާތީ ވެސް ގިނަ ބަޔަކު ދަނީ ފާޑު ކިޔަމުންނެވެ.
މަސްޖިދުލް އަޤްޞާގެ ސެކިއުރިޓީގެ ކަންކަން ބެލެހެއްޓުމަށް ކަމަށްބުނެ އިސްރާއީލުގެ ސިފައިން އެ މިސްކިތުގެ ތެރޭގައި ހަރަކާތްތެރިވެއެވެ. އަދި ސަލާމަތީ ކަންކަމާ ހެދި ކަމަށް ބުނެ މުސްލިމުންނަށް ނަމާދަށް މިސްކިތަށް ނުދެވޭނެ ގޮތަށް ގޭޓް ބަންދުކޮށް ހަދައެވެ.
