ކޮވިޑް ޖެހިފައިވާ ނަމަ ބުޅަލާ ކައިިރި ނުވާތި، ބުޅަލަށްވެސް ބަލި ޖެހިދާނެ!
އިންސާނުންގެ ގައިން ބުޅާ، ކުއްތާ ފަދަ ޖަނަވާރުތަކަށް ކޮވިޑް-19 ޖެހޭ ކަމަށް ދިރާސާއަކުން ދައްކައިފިއެވެ.
ނެދެލެންޑްސްގެ ޔުޓްރެޗް ޔުނިވާސިޓީއިން ހަދައިފައިވާ ދިރާސާއެއްގައި ބުނެފައި ވަނީ ބުޅާ އަދި ކުއްތާ ގެންގުޅޭ ފަރާތްތަކަށް ކޮވިޑް-19 ޖެހުމުން ޖަނަވާރާ އެކީ ކަރަންޓީނަށް ދާ ނަމަ އެ ޖަނަވާރަކަށް ބަލި ޖެހުމުގެ ފުރުސަތު ބޮޑު ކަމަށެވެ. މިދިރާސާ ވަނީ ޔޫރަޕިއަން ކޮންގްރެސް އޮފް މައިކްރޯބައޮލޮޖީ އެންޑް އިންފެކްޝިއަސް ޑިޒީޒް ޖާނަލްގައި ޝާއިއުކޮށްފައެވެ.
މިދިރާސާ ހަދައިފައި ވަނީ ކޮވިޑް-19 ޖެހިފައި ތިބި މީހުން ދިރިއުޅެމުން އައި 196 ގެއެއްގައި ދިރިއުޅެމުން އައި 156 ކުއްތާއާއި 154 ބުޅާ ހިމަނައިގެންނެވެ. މި ދިރާސާގައި ބައިވެރިކުރި 31 ބުޅާ އަދި 23 ކުއްތާ ވަނީ ބައްޔަށް ފައްސިވެފައެވެ.
މިދިރާސާ ހެދުމުގައި އިސްކޮށް ހަރަކާތްތެރިވި ޑރ އެލްސް ބްރޮންސް ވިދާޅުވީ، ބުޅާ އަދި ކުއްތާ ގެންގުޅޭ ފަރާތްތަކުގެ ތެރެއިން ކޮވިޑް-19 ޖެހިފައިވާ މީހަކާ އެކުގައި ޖަނަވާރު އުޅޭނަމަ އެ ޖަނަވާރަކަށް ކޮވިޑް-19 ބަލި ޖެހުމުގެ 20 އިންސައްތަ ބިރު އޮންނަ ކަމަށެވެ. އެހެން ނަމަވެސް ބަލި ޖެހުމުން ބުޅަލާއި ކުއްތާއަށް ބޮޑުވަރު ނުވާ ކަމަށް ބުންޏެވެ. މިދިރާސާއިން އިތުރަށް ދައްކާ ގޮތުގައި ބަލި ޖެހުނު ޖަނަވާރުގެ ފަރާތުން އިތުރު ޖަނަވާރަކަށް ބަލި ނުޖެހެއެވެ.
"ޖަނަވާރަށް ބޮޑު ވަރެއް ނުވޭ. އަދި ޖަނަވާރުން އިންސާނުންނަށް ބަލި ޖެހޭ ކަމަށް އަދި ހޯދިފައެއް ނެތް. އެކަމަކު ޖަނަވާރުގެ ހަކަތަ ވަރަށް ބޮޑަށް ދަށްކޮށްލާ، ބަލިކޮށްލާ. ރަނގަޅު ގޮތަކީ ބަލި ޖެހުމުން މީހުންނާ އެކަހެރިވާހެން ޖަނަވާރުންނާ ވެސް އެކަހެރިވުން." ޑރ އެލްސް ވިދާޅުވިއެވެ.
ކޮވިޑް-19 ، އިންސާނުންގެ ގަޔަށް ފުރަތަމަ އަރައިފައި ވަނީ ވާލެއްގެ ޒަރިއްޔާއިންނެވެ. އެހެން ނަމަވެސް އޭގެ ފަހުން ޖަނަވާރެއްގެ ގައިން އިންސާނަކަށް މި ބަލި ޖެހިވާ ކަމަށް ރިޕޯޓް ކުރެވިފައި ވަނީ މަދު ފަހަރެއްގައެވެ. މިގޮތުން ޖަނަވާރުގެ ގައިން އިންސާނުންގެ ގަޔަށް ބަލި އަރާ ކަމަށް ދިރާސާއަކުން ވަނީ ދައްކައިފައެވެ.
Ads by STO
