ވެކްސިން ނުޖަހާ މީހުންނަށް އެތެރޭގެ އުދުހުންތަކުން ވެސް ދަތުރު ނުކުރެވޭ ގޮތް ހަދަނީ

ކޮވިޑް-19އިން ރައްކާތެރިވުމަށް ވެކްސިން ނުޖަހާ މީހުންނަށް، އެތެރޭގެ އުދުހުންތަކުން ވެސް ދަތުރު ނުކުރެވޭ ގޮތަށް ނިންމުމަށް ސަރުކާރުން މިއަދު މަޝްވަރާ ފަށައިފިއެވެ.

Ads by Hajj Corporation

"ރާއްޖެޓީވީ"ގެ އޮންލައިން ނޫހަށް ސަރުކާރުގެ އޮފިޝަލަކު މައުލޫމާތު ދެއްވަމުން ވިދާޅުވީ ވެކްސިން ނުޖަހާ މީހުންނަށް އެތެރޭގެ އުދުހުންތަކުން ވެސް ދަތުރު ނުކުރެވޭ ގޮތަށް ނިންމުމަށް ސަރުކާރުން މަޝްވަރާތައް ފަށައިފައިވާ ކަމަށެވެ.

އޮފިޝަލު ވިދާޅުވި ގޮތުގައި، މިގޮތަށް އުސޫލު ކަނޑައެޅުމުގެ މަޝްވަރާތައް ކުރަމުން ދިޔަ ނަމަވެސް، މި ނިންމުމަށް އަމަލު ކުރާނެ ތާރީޚެއް ސަރުކާރުން އަދި ކަނޑައަޅުއްވައިފައެއް ނުވެއެވެ. ސަރުކާރުން މިގޮތަށް ނިންމައިފި ނަމަ ވެކްސިން ނުޖަހާ މީހުންނަށް އެއްރަށުން އަނެއް ރަށަށް (އުޅަނދުފަހަރުގައާއި ފްލައިޓުގައި ވެސް) ދަތުރެއް ނުކުރެވޭނެއެވެ.

އީދު ބަންދާ ދިމާކޮށް ވަރަށް ގިނަ އަދަދެއް އާންމުން ވަނީ ރަށްތަކަށް ދަތުރުކޮށްފައެވެ. ކުރިއަށް އޮތްތާނގައި ރާއްޖޭގެ އެއް ރަށުން އަނެއް ރަށަށް ދަތުރުކުރާ އިރު ޕީސީއާރު ޓެސްޓު ހެދުމަކާ ނުލައި ދަތުރުކުމުގެ ހުއްދަ ދެވިގެން ދާނެ ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)އިން ވަނީ ބުނެފައެވެ.

އެޗްއީއޯސީގެ ތަރުޖަމާނު ޑރ. ނަޒްލާ ރަފީޤް ވިދާޅުވީ, ރާއްޖޭގެ ކޮވިޑް-19 ވެކްސިނޭޝަން ރޭޓަށާއި ކޮވިޑަށް ފައްސިވާ މިންވަރަށް ބަލައި އެއް ރަށުން އަނެއް ރަށަށް ދަތުރުކުރާއިރު ޕީސީއާރު ޓެސްޓެއް ނުހަދާ ދަތުރުކުރެވޭނެ ގޮތަށް, ސެޕްޓެމްބަރު މަހުގެ 1ވަނަ ދުވަހުން ފެށިގެން ހެދުމަށް ނިންމައިފައިވާ ކަމަށެވެ.

މި ލުއި ދެވިގެން ދާނީ ވަކިވަކި ރަށްރަށުގައި ކޮވިޑް-19 މިންވަރަށާއި ވެކްސިން ޖަހާ މިންވަރަށް ބެލުމަށް ފަހު ކަމަށާއި ރަށުގެ އާބާދީގެ ބޮޑު ބަޔަކަށް ވެކްސިންގެ ދެ ޑޯޒްދީ ނިމުމުން، އެ ރަށަށް ކޮވިޑްގެ ފައްސި ވޭދަނަތައް އުޅޭ އިތުރު ރަށްރަށުން ދަތުރުކުރުމުގައި އިތުރު ލުއިތަކެއް ދެވިގެންދާނެ ކަމަށް ވަނީ ވިދާޅުވެފައެވެ. އަދި ކޮވިޑަށް ފައްސިވާ މިންވަރު 5 އިންސައްތައިން ދަށުގައި ހުރި ރަށްރަށުން ވެކްސިންގެ ޑޯޒްތައް ފުރިހަމަކޮށްގެން ދަތުރުކުރާ މީހުން މިހާރު ހަދަން ޖެހޭ ޕީސީއާރު ޓެސްޓު ނުހަދައި ދަތުރުކުރުމުގެ ހުއްދަ ދެވިގެންދާނެ ކަމަށް ޑރ. ނަޒްލާ ވަނީ ވިދާޅުވެފައެވެ.