ނައްސި ނަތީޖާއަކާ އެކު ހަންޏާމީދުއަށް ދަތުރު ކުރި ކުއްޖަކު ކޮވިޑް-19އަށް ފައްސިވެއްޖެ
އދ. ހަންޏާމީދޫން ފައްސިވީ ވަކި ތަރުތީބެއް ނެތި ނެގި ސުންކުތަކުގެ ތެރެއިން ސުންކެއް ނޫން ކަމަށާއި، ފައްސި ވެފައި ވަނީ އަލާމާތްތައް ފެނިގެން ފްލޫ ކްލިނިކަށް ދެއްކި ކުޑަ ކުއްޖެއް ކަމަށް އެ ރަށު ކައުންސިލުން ވިދާޅުވެއްޖެއެވެ.
ހަންޏާމީދޫން ކޮވިޑް-19އަށް ފައްސި ވޭދަނައެއް ފެނިގެން އެ ރަށުގައި ދަނީ އެ ކުއްޖާއާ އެއްތާވި މީހުން (ކޮންޓެކްޓްވި މީހުން) ހޯދަމުންނެވެ. މިކަމާ ގުޅިގެން ބައެއް ފަރާތްތަކުން ރިޕޯޓުކޮށްފައި ވަނީ ފައްސި ވެފައިވަނީ ވަކި ތަރުތީބެއް ނެތި ނެގި ސުންކުތަކުގެ ތެރެއިން ސުންކެއް ކަމަށެވެ.
ނަމަވެސް "ދެން"އަށް މައުލޫމާތު ދެއްވަމުން އެ ރަށު އިންފޮމޭޝަން އޮފިސަރ ޖަމްޝާދު މަޙްމޫދް ވިދާޅުވީ އެއީ ވަކި ތަރުތީބެއް ނެތި ނެގި ސުންކުތަކުގެ ތެރެއިން ސުންކެއް ނޫން ކަމަށާއި ފައްސިވެފައި ވަނީ ނައްސި ޕީސީއާރް ނަތީޖާއަކާ އެކު މާލެއިން އެ ރަށަށް ދިޔަ ކުއްޖަކު، އަތް ބިނދިގެންނާއި ރޯގާ ޖެހިގެން މަހިބަދޫއަށް ދިޔުމުން ހެދި ޓެސްޓުން ކަމަށެވެ.
"އަތް ދައްކަން އަސްލު ދިޔައީ. އެކަމަކު ރޯގާ ވެސް ޖެހިފައި ހުރީމަ، އެކޮޅުން ޓެސްޓު ކުރަން ސާމްޕަލް ނެގީ. ރޭގައި ނަތީޖާ ލިބުނީ" ޖަމްޝާދު ވިދާޅުވިއެވެ.
ހަންޏާމީދޫން ފައްސިވީ މި ވޭދަނައާ ގުޅިގެން އެ ރަށުގައި މިހާރު އެ ކުއްޖާއާ އެއްތާވި މީހުން (ކޮންޓެކްޓްވި މީހުން) ހޯދުމުގެ މަސައްކަތް ކުރަމުން، އެ ރަށު ސިއްޙީ މަރުކަޒުގެ ކޮމިއުނިޓީ ހެލްތު އޮފިސަރު އަހްމަދު ތޮލްހަތު ވެސް ވަނީ "ދެން"އަށް ވިދާޅުވެފައެވެ.
