ޖަލު ބަލަހައްޓާ އޮފިސަރެއް ކޮވިޑަށް ފައްސިވެ، މާފުށީ ޖަލު އެލާޓަށް!
މާފުށީ ޖަލު ބަލަހައްޓާ އޮފިސަރެއް ކޮވިޑް-19އަށް ފައްސިވެ، އެތަން އެލާޓަށް ގެނެސްފިއެވެ.
ކޮމިޝަނާ އޮފް ޕްރިސަން އަހްމަދު މުހައްމަދުފުޅު މިއަދު ވިދާޅުވީ، މާފުށީ ޖަލުގެ އޮފިސަރެއްގެ ފަރާތުން ކޮވިޑް-19 ގެ އަލާމާތްތައް ފެނިގެން ޓެސްޓު ކުރިކަމަށާއި އޭނާގެ ނަތީޖާ ލިބުނު އިރު ކޮވިޑަށް ފައްސިކަން އެނގިފައިވާ ކަމަށެވެ.
ޖަލު ބަލަހައްޓާ އޮފިސަރެއް ކޮވިޑަށް ފައްސި ވުމުން މިރޭ 00:00އިން ފެށިގެން މާފުށީ ޖަލު ކުއްލި ހާލަތަށް ގެނެސްފައިވާ ކަމަށާއި އަދި ވަގުތީ ގޮތުން ގައިދީންގެ ހުރިހާ މޫވްމަންޓްތައް މެދުކަނޑައިލާން ވެސް ނިންމާފައިވާ ކަމަށް ސީޕީ އަހްމަދު ވިދާޅުވިއެވެ.
ކޮވިޑް-19އަށް ފައްސިވީ ކަރެކްޝަންސްގެ އެ އޮފިސަރާއި އެއްތާވި މީހުންގެ އަދަދު އަދި ކަރެކްޝަންސުން ހާމަ ކޮށްފައެއް ނުވެއެވެ. ނަމަވެސް ޖަލު ބަލަހައްޓާ އޮފިސަރުންނަކީ، އެތަނުގައި ތިބޭ އެހެން މުވައްޒަފުންގެ އިތުރުން ގައިދީންނާ ވެސް ބައްދަލުވާނެ ބައެއްކަން އެނގިފައިވެއެވެ.
ރާއްޖޭގައި ކޮވިޑް-19އަށް ފައްސި ވަމުން އަންނަ މީހުންގެ އަދަދު މިހާރު އަނެއްކާ ވެސް އަންނަނީ އިތުރުވަމުންނެވެ. އެގޮތުން މިއަދު ވެސް އިތުރު 173 މީހުން ރާއްޖެއިން މި ބައްޔަށް ފައްސި ވެފައިވެއެވެ.
