ރާއްޖޭގައި ބޭރުގެ މިލިޓަރީ ބޭސްއެއް އޮތުމަކީ ކަންބޮޑުވާ ކަމެއް ނޫން ކަމަށް ރިޔާޒް ވިދާޅުވި: އާދަމް ޝަރީފް
ރާއްޖޭގައި ބޭރުގެ މިލިޓަރީ ބޭސްއެއް އޮތުމަކީ ކަންބޮޑުވާ ކަމެއް ނޫން ކަމަށް ތިމަރަފުށީ ދާއިރާގެ މެންބަރު އަބްދުﷲ ރިޔާޒް ވިދާޅުވި ކަމަށް ޕީއެންސީގެ ނައިބު ރައީސް. ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެއެވެ.
އާދަމް ޝަރީފް މިހެން ވިދާޅުވެފައި ވަނީ، އިންޑިއާއެކު ހެދި އެގްރީމެންޓް ހާމަ ކުރުމަށް އިދިކޮޅުން އެކަށީގެންވާ މަސައްކަތެއް ނުކުރާ ކަމަށް އަބްދުﷲ ރިޔާޒް ވިދާޅުވުމުން އެކަމަށް ރައްދު ދެއްވަމުންނެވެ.
ދިވެހި ޗެނަލްއިން ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުން ޢަބްދުﷲ ރިޔާޒް ވިދާޅުވީ، އުތުރު ތިލަފަޅު ތަރައްޤީ ކުރުމަށް ދިވެހި ސަރުކާރާއި އިންޑިއާ ދެމެދު ވެފައިވާ އެއްބަސްވުމުގެ އަސްލު ހޯދުމަށް ރައްޔިތުންގެ މަޖިލީހުގެ 241 ކޮމިޓީ (ޤައުމީ ސަލާމަތާ ބެހޭ ކޮމިޓީ)އަށް ހުށަހަޅައިފައި ނުވާ ކަމަށެވެ. މިކަމަށް ރައްދު ދެއްވަމުން އާދަމް ޝަރީފް އުމަރު ވަނީ އެކަން ކޮށްދެއްވުމަށް ރައީސް ނަޝީދަށް އެޑްރެސްކޮށް ފޮނުވައިފައިވާ ސިޓީގެ ކޮޕީއެއް ޓްވީޓް ކުރައްވައިފައެވެ.
ޓްވީޓާއެކު ވިދާޅުވީ، ރާއްޖޭގައި ބޭރުގެ ބަޔަކު ތިބުމަކީ ކަންބޮޑުވާ ކަމެއް ނޫން ކަމަށް ރިޔާޒް ވިދާޅުވި ކަމަށާއި މިއަދު އެގޮތަށް ދެކެވަޑައި ނުގަންނަވާތީ އުފާ ކުރައްވާ ކަމަށެވެ.
"'ރާއްޖޭގެ މިލިޓަރީ ބޭސްއެއް އޮތުމަކީ ތިމަންނަ ހަމަގައިމު ވެސް އެހާ ކަންބޮޑުވާ ކަމެއް ނޫނޭ މަޖިލިސް ސައިކޮޓަރީގައި އަޅުގަނޑާ އިތުރު އެމްޑީޕީގެ ދެ އެމްޕީ ވެސް އިން ޓޭބަލެއްގައި ވިދާޅުވެ، މިލިޓަރީ ނުފޫޒު ފޯރުވުމަށް ހިތްވަރު ދެއްވި ބޭފުޅަކު މިހާރު ރާގު ބަދަލުވީތީ އުފާ ކުރަން" އާދަމް ޝަރީފް ވިދާޅުވިއެވެ.
އަބްދުﷲ ރިޔާޒް އިސްކޮށް ހުންނަވާ އުފައްދަން މަސައްކަތް ކުރައްވަމުން ގެންދަވާ މޯލްޑިވްސް ނޭޝަނަލް ޕާޓީން ރާއްޖޭގައި މިލިޓަރީ ބަޔަކު ތިބުމާ ދެކޮޅު ކަމަށް ރިޔާޒް ވަނީ ޓީވީ ޕްރޮގްރާމެއްގައި ވާހަކަފުޅު ދައްކަވަމުން ވިދާޅުވެފައެވެ.
"އަޅުގަނޑުމެން ދެކޮޅޭ ދިވެހިރާއްޖޭގައި ބޭރުގެ އެއްވެސް ބަޔެއްގެ މިލިޓަރީ ޕްރެޒެންސެއް ދާއިމަށް ތިބުން އެއީ އަޅުގަނޑުމެން ދެކޮޅު ހަދާ ކަމެއް. ޤައުމީ ޕާޓީން ދެކޮޅު ކަމެއް. އަޅުގަނޑުމެން މިބުނަނީ އަޅުގަނޑުމެން ބަލަން ޖެހޭ އެ އެއްބަސްވުންތަކުގައި ހުރީ ކޯއްޗެއްތޯ. އެމީހުންގެ ޕްރެޒެންސް ހުރީ ކިހިނެއްތޯ ބެލިގެންނޭ އެއަށް ސީދާ ސްޕެސިފިކްކޮށް އެއަށް އޮޕޯޒްކޮށްގެން" ރިޔާޒް ވިދާޅުވިއެވެ.
