އެމްޑީޕީގެ އެތެރޭގެ އިންތިހާބުގައި ވޯޓުލީ 50އިންސައްތަ މީހުން

މިދިޔަ ހޮނިހިރު ދުވަހު ބޭއްވި ވެރިކަންކުރާ އެމްޑީޕީގެ އެތެރޭގެ އިންތިހާބުގައި ވޯޓުލީ ހައްގު ލިބިގެންވާ މީހުންގެ 50އިންސައްތަ ކަން އެ ޕާޓީން މިއަދު އާއްމުކުރި ވަގުތީ ނަތީޖާއިން ދައްކައިފިއެވެ.

Ads by MWSC

މި އިންތިހާބުގައި ވޯޓުލުމުގެ ޙައްޤު ލިބުނީ 93،612 މީހަކަށެވެ. އޭގެ ތެރެއިން އިންތިހާބުގައި ވޯޓުލައިފައި ވަނީ 47،100 މީހުންނެވެ. މިއީ ހައްގު ލިބިގެންވާ މީހުންގެ 50.31 އިންސައްތައެވެ.

ދާއިރާ ރައީސުންގެ ތެރެއިން އެންމެ ވާދަވެރިކަން ބޮޑުވީ މާލޭ ދާއިރާގެއެވެ. މި ދާއިރާއަށް ކުރިމަތިލެއްވީ މޭޔަރު ޝިފާ މުހައްމަދާއި ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީންއެވެ. އެ ގޮނޑި ކާމިޔާބު ކުރެއްވީ ޝިފާ މުޙައްމަދުއެވެ.

އެމްޑީޕީން އާއްމުކޮށްފައިވާ ވޯޓާސް ލިސްޓުގައި މާލެއިން ވޯޓުލުމުގެ ހައްގު 13084 މީހުންނަށް ލިބިފައިވާ އިރު، ވޯޓުލީ 4،097 މީހުންނެވެ. މީގެ ތެރެއިން ސައްހަ ވޯޓުގެ އަދަދަކީ 3774 އެވެ. އަދި ބާތިލް ވޯޓުގެ ގޮތުގައި 323 ވޯޓު އޮތެވެ.

މި އަހަރުގެ އޭޕްރިލް މަހު ބޭއްވި ލޯކަލް ކައުންސިލް އިންތިހާބުގައި ވެސް އެމްޑީޕީގެ މެމްބަރުން ވޯޓުލާން ނުކުތް އަދަދު މަދު ކަމަށް އެ ޕާޓީން ބުނެފައިވެއެވެ. އެހެންކަމުން ފުރަތަމަ ފަހަރަށް މާލޭގެ ކޮންޓްރޯލް އެމްޑީޕީއަށް ގެއްލި ކައުންސިލްގެ ގިނަ ގޮނޑިތައް ނެގީ އިދިކޮޅު ޕީޕީއެމުންނެވެ.