އިންޑިއާ ހައިކޮމިޝަން ގޮއްވައިލާނެ ކަމަށް ބުނި މީހާ ޝަރުތުތަކަކާ އެކު ދޫކޮށްލައިފި
ރާއްޖޭގައި ހުންނަ އިންޑިއާގެ ހައި ކޮމިޝަން ގޮއްވައިލާނެ ކަމަށް ބުނެ، ޓްވިޓަރގައި އިންޒާރު ދިން މީހާ ބަންދުން ދޫކޮށްލައިފިއެވެ.
ޖޫން 30 ވަނަ ދުވަހު އާރުޑީއެކްސް ބޭނުންވާ ކަަމަށާއި އެ ބޭނުންކޮށްގެން އިންޑިއާ ހައިކޮމިޝަން ގޮއްވައިލާނެ ކަމަށް ބުނެ ޓްވީޓްކޮށްފައި ވަނީ މއ. ރެސްޓިންހައުސް، މުހައްމަދު އިނާދެވެ. އޭނާ ހައްޔަރުކޮށްފައި ވަނީ ޖުލައި 3 ގައެވެ. އަދި ދައުވާ އުފުލައިފައި ވަނީ ސެޕްޓެންބަރު 30ގައެވެ.
ޕީޖީގެ އޮފީހުން ވިދާޅުވީ، 30 ސެޕްޓެމްބަރުގައި ކްރިމިނަލް ކޯޓުން އޭނާ ދޫކޮށްލުމަށް ނިންމައިފައިވާ ކަމަށެވެ. އަދި އެގޮތަށް ނިންމީ ޕީޖީގެ އެދުމުގެ މަތިން ޝަރުތުތަކަކާ އެކުގައި ކަމަށް ވިދާޅުވިއެވެ. އެހެން ނަމަވެސް އެ ޝަރުތުތައް ހާމަކޮށްފައެއް ނުވެއެވެ. ޕީޖީއިން ވިދާޅުވީ އޭނާ ބަންދުން ދޫކޮށްލަން ނިންމީ، ކުށުގެ ރެކޯޑާއި މުޖުތަމައުގައި އަދާކުރާ ދައުރަށް ރިއާޔަތްކޮށް އަދި ކުށުގެ އަމަލު ހިންގައިފައި ވަނީ ސޯޝަލް މީޑިއާގެ ވަސީލަތެއް ބޭނުންކޮށްގެން އިންޒާރުދީގެންކަމަށް ވެފައި، އިންޒާރުދިން ދިނުން ފިޔަވައި، އޭނާ ދިން އިންޒާރާ އެއްގޮތަށް އަމަލު ކުރުމުގެ އެއްވެސް ނިޔަތެއް ނުވަތަ ވަސީލަތެއް މީނާގެ އޮތްކަން ދޭހަވާ ފަދަ ސަބަބެއް ފާހަގަވެފައި ނުވާތީ ކަމަށެވެ.
އިނާދުގެ މައްޗަށް އުފުލައިފައި ވަނީ ޓެރަރިޒަމްގެ އަމަލެއް ހިންގާނެ ކަމުގެ އިންޒާރު ދިނުން ނުވަތަ ބިރުދެއްކުމުގެ ކުށުގެ ދައުވާއެވެ. ދައުވާ ސާބިތުވެއްޖެ ނަމަ ހަތަރު އަހަރާއި ހަ އަހަރާ ދެމެދުގެ މުއްދަތެއްގެ ޖަލު ހުކުމެއް އަންނާނެއެވެ.
އިނާދަކީ ވެރިކަން ކުރާ މައި ޕާޓީ، އެމްޑީޕީގެ މެމްބަރެކެވެ. އެ މައްސަލައިގައި އޭނާ ވަނީ އެމްޑީޕީން ވަކިކޮށްފައެވެ.
