ނަޝީދަށް ދިން ހަމަލާއަކީ ހޯމް މިނިސްޓްރީގައި އޮތް ބާގަނޑެއް، ބޮޑު ވަޒީރަކު ހުންނަންޖެހޭ: ބޮންޑެ
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މިދިޔަ މެއި މަހުގެ ހަވަނަ ދުވަހު ދިން ޓެރަރިސްޓު ހަމަލާއަކީ ހޯމް މިނިސްޓްރީ ތެރޭގައި އޮތް ބާގަނޑެއްކަމަށް މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވިދާޅުވެއްޖެއެވެ.
މިއަދު އޮތް ރައްޔިތުންގެ މަޖިލީހުގެ ޖަލްސާއަށް ވަނީ ޝަރީއަތް ނިމެންދެން ވާނުވާގައި ތިބި ފަރާތްތަކުގެ މައްސަލައާއި ޖަލުތަކުގައި އެކަށީގެންވާ ބޭސްފަރުވާ ނުލިބޭ މައްސަލަ ހުށަހަޅައިފައެވެ. އެމައްސަލައިގެ ބަހުސް މަރުހަލާގައި ވާހަކަ ދައްކަވަމުން ބޮންޑެ ވިދާޅުވީ މިހާރު ދައްކަމުން މި ގެންދަނީ ގާނޫނު އަސާސީއާއި، ގާނޫނު އަސާސީގައި ބަޔާންކުރާ ކަންކަމުގައި އިހުމާލުވުން ރައްޔިތުންނަށް ލިބޭ ގެއްލުންތަކުގެ ވާހަކަ ކަމަށެވެ. އެގޮތުން މީގެ ދުވަސްތަކެއް ކުރިން މެއި މަހުގެ 6ވަނަ ދުވަހު މަޖިލީހުގެ ރައީސަށް އަމާޒުކޮށް ދިން ބޮމުގެ ހަމަލާއަކީ ހޯމް މިނިސްޓްރީ ތެރޭގައި އޮތް ބާގަނޑެއް ކަމަށް ބޮންޑެ ވިދާޅުވިއެވެ.
"ހައެއް މޭގައި އެ ގޮއްވާލި ބޮމަކީ އެއީ ހޯމް މިނިސްޓްރީ ތެރޭގައި އޮތް ބާގަނޑެއް. އިންޓެލިޖެންސް، މިބުނާ ބާގަނޑުގެ ތެރެއިން ގޮއްވައިލި ގޮއްވައިލުމެއް. މިއަދު ވެސް މިދައްކަނީ ހަމަ އެއް ވާހަކައެއް" ބޮންޑެ ވިދާޅުވިއެވެ.
ހޯމް މިނިސްޓްރީން ޖަލުތަކުގައި ތިބޭ ގައިދީންނާ މެދު ބޮޑެތި އިހުމާލުތަކެއް ވަމުންދާކަން ބޮންޑެ ފާހަގަކުރެއްވިއެވެ. އެގޮތުން ގާނޫނު އަސާސީގައި ސާފުކޮށް ބަޔާންކޮށްފައިވާ ގޮތަށް ގައިދީންނަށް ބޭސްފަރުވާގެ ކަންކަން ހަމަޖައްސައިދޭން ޖެހޭ ކަމަށާއި ވާނުވާގައި މީހުން ނުބޭތިއްބޭނެ ކަމަށާއި އެ ހާލަތުގައި ބޭތިއްބޭނެ ގޮތްތައްވެސް ބަޔާންކޮށްފައިވާކަމަށް ބޮންޑެ ވިދާޅުވިއެވެ.
މީގެ އިތުރުން ބޮންޑެ ވިދާޅުވީ މިމައްސަލަތަކާ ޖަވާބުދާރީވާން ހޯމް މިނިސްޓަރު އިމްރާން އަބްދުﷲ ހާޒިރު ކޮށް މެމްބަރުން ސުވާލުކުރުމުން ބަސް ވިދާޅުވި ނަމަވެސް އެއީ ޖަވާބުދާރީ ކުރުވުން ނޫންކަމަށެވެ. ބޮންޑެ ވިދާޅުވީ މިއީ ނިޒާމުގައި ހުރި މައްސަލައެއް ކަމަށާއި މިކަން ހައްލު ކުރެވޭނީ ނިޒާމު ބަދަލުކޮށްގެން ކަމަށެވެ.
"ބަރުލަމާނީ ނިޒާމެއްގަ އިސް ވަޒީރަކު އިންނަވައިގެން މިކަން ކުރެވޭނެ ގޮތަށް (ހިންގެން ޖެހޭ). އިއްޔެ ވަޒީރަކު ހުންނެވި އިނގޭތޯ. މިއޮތީ އެކަމަކު މީހެއްގެ މަރުގެ މައްސަލަ" ބޮންޑެ ވިދާޅުވިއެވެ.
މެމްބަރު ވަނީ މިމަހުގެ 6 ވަނަ ދުވަހު ޖަލުގައި ނިޔާވި އިސްމާއީލް ޝަބީންގެ މައްސަލަ ފާހަގަކުރައްވައިފައެވެ. ޝަބީން ނިޔާވިއިރު ބޭސްފަރުވާ ހޯދަން ސަރުކާރުގެ މުއައްސަސާތަކުގައި ސަލާން ޖެހިކަން ވެސް ބޮންޑެ ފާހަގަކުރެއްވިއެވެ.
މިނިސްޓަރު އިމްރާން މީގެ ކުރިން ވިދާޅުވީ ޝަބީން ހައްޔަރުކޮށް ބަންދުކޮށްފައި ހުރީ ޓެރަރިޒަމްގެ މައްސަލައަކާ ގުޅިގެން ކަމަށްވާތީ ބޭސްފަރުވާގެ ބޭނުމަށް ވެސް ގޭބަންދަށް ބަދަލުކުރެވެން ނެތްކަމަށެވެ. މިވާހަކައަށް އިޝާރާތްކޮށް ބޮންޑެ ވިދާޅުވީ ބޭސްފަރުވާގެ ކަންކަން ފޯރުކޮށްދިނުމަކީ ޓެރަރިޒަމްގެ މައްސަލައިގައި ހައްޔަރުކުރެވޭ މީހާއަށް ވެސް ފޯރުކޮށްދޭންޖެހޭ ހައްގެއް ކަމަށެވެ.
ބޮންޑެ ވިދާޅުވީ މިފަދަ މައްސަލަތަކުގައި ވަޒީރު ޖަވާބުދާރީ ކުރެވޭނީ އިސް ވަޒީރަކު އެކަމަށް ހުންނަވައިގެން ކަމަށާއި އެހެންކަމުން ރާއްޖޭގެ ވެރިކަން ހިންގުމުގެ ނިޒާމު ބަރުލަމާނީ ނިޒާމަކަށް ބަދަލުކުރެވެންޖެހޭ ކަމަށެވެ.
މާވަޒީރަކުވެސް ހުންނަން ޖެހޭނެ! ވަޒީރު، ޖޫބިއަރ ވަޒީރު،ދޮށީވަޒީރު، ބޮޑުވަޒީރު، މާވަޒީރު، ތަރިވިދާ ވަޒީރު، ކެނެރީގޭ ވަޒީރު، ޖެމްސް ބޮންޑް ވަޒީރު.
ތިޔަ އުޅެނީ ކިހިނެތް ވެގެންތޯ؟
މިހާރުވެސް ތިޔަ އުޅެނީ ކޯލިޝަން ކަމުނުގޮސްގެން. މާދަމާ ތިޔަ މެމްބަރުން ތިބޭނީ ނީލަމުގައި. ބޮޑު އަގެއްދޭ ޕާރޓީއަކަށް ސޮއި ކުރުން އޮްނާނީ. ސަރުކާރު އޮންނަން ޖެހޭނީ މެމްބަރުންގެ ދެފައި މައްޗަށް ތިރިވެ ރޯން. އަބަދު ފައިސާ އަޅަން ޖެހޭނީ. ވަޒީރުކަމާ، މެމްބަރުކަމާއި، ފައިސާގެ ކުޅިވަރުގެ ނަތީޖާ އަކަށް ވެގެންދާނީ އައްޔާޝީ ކަންކަން. ތަންކޮޅެއް ބޮޑަށް ޤައުމަށް ވަފާތެރިވޭ.
މި ބޮންޑޭއޭ ކިޔާ ކަލޭގެ މިއީ ކޮންތާކުން ނުކުމެގެން އުޅޭ ބުރާންޗެއްބާ؟