ކޯޓުން މައްސަލަ ބަލައި ނުނިމެނީސް ރިހިވެލި ހުޅުވަނީ
"ރިހިވެލި ދަ ޑްރީމް"ގެ ނަމުގައި ހިންގަމުން ދިޔަ ރިސޯޓުގެ ސަބް ލީސް އެއްބަސްވުން ބާތިލްކުރި މައްސަލަ ހައިކޯޓުގައި އިސްތިއުނާފް ކޮށްފައި ވަނިކޮށް، އެ މައްސަލަ ކޯޓުން ބަލައި ނުނިމެނީސް ރިހިވެލި ރިސޯޓު ހިންގުމާ އެހެން ކުންފުންޏަކުން ހަވާލުވެ އަލުން ހުޅުވަން ތައްޔާރު ވެއްޖެއެވެ.
ކޯޓުގައި މައްސަލަ އޮއްވާ ރިހިވެލި ރިސޯޓު ހުޅުވަން ތައްޔާރު ވަމުން ދާތީ، ސޭވް ދް ޑްރީމް (ފްރާންސް)ގެ ފަރާތުން މި މައްސަލައިގައި ހަރަކާތްތެރިވާ ރާއްޖޭގެ ޤާނޫނީ ވަކީލު އަޙުމަދު ނާޒިމް ޢަބްދުއްސައްތާރު ވަނީ މިކަމާ ކަންބޮޑުވުން ފާޅު ކުރައްވައި މައްސަލައިގެ އަޑުއެހުމެއް މިހަފްތާ ތެރޭގައި ބާއްވާ ދިނުމަށް އެދި ހައިކޯޓަށް މިއަދު ސިޓީއެއް ހުށަހަޅުއްވައިފައެވެ.
ހައިކޯޓުގެ އިސް ފަނޑިޔާރު އަލްއުސްތާޛް ހާތިފް ހިލްމީއަށް އެޑްރެސް ކުރައްވައި ނާޒިމް ހުށަހެޅި ސިޓީގައި ވިދާޅުވެފައި ވަނީ ސޭވް ދަ ޑްރީމްއިން އިސްތިއުނާފު ކޮށްފައިވާ އެ މައްސަލައާ ގުޅިގެން، ފުވައްމުލަކު އުތުރު ދާއިރާގެ މަޖިލިސް މެންބަރު މުޙައްމަދު ރަޝީދު (ދޮންބެ)ހިމެނި ވަޑައިގަންނަވާ ބީޗްއެކްސް ޕވޓ.ލޓޑ ކުންފުނިން ރިހިވެލި މޯލްޑިވްސް ރިސޯޓުގެ ނަމުގައި ބިޒްނަސް ނަމެއް 5 އޮކްޓޯބަރު 2021ގައި ރެޖިސްޓްރީ ކޮށްފައިވާ ކަމަށެވެ.
އެ ނަމުގެ ދަށުން ރިހިވެލި ރިސޯޓު 15 ނޮވެމްބަރު 2021ގައި ހުޅުވާނެ ކަމަށް އިއުލާނުކޮށްފައިވާ ކަމަށް ވެސް ވަނީ މައުލޫމާތު ލިބިފައެވެ.
މި މައްސަލައިގެ އަޑުއެހުމެއް އެންމެ ފަހުން ބާއްވާފައި ވަނީ މި މަހުގެ 11 ވަނަ ދުވަހުގައެވެ. އެ ދުވަހުގެ އަޑުއެހުމުގައި ވެސް، ރިހިވެލި ރިސޯޓް އަލުން ހުޅުވަން އުޅޭކަމަށް މި މައްސަލައިގެ އިސްތިއުނާފު ރައްދުވާ ފަރާތުން ވެސް ވަނީ އަމިއްލައަށް އިއުތިރާފު ވެފައެވެ.
އެހެންކަމުން ވަކީލު ނާޒިމް ފޮނުއްވި ސިޓީގައި އެދިލައްވާފައި ވަނީ މި މައްސަލައިގެ އަޑުއެހުން މި ހަފްތާގައި ބާއްވައި ދެއްވައި، ހުށަހަޅައިފައިވާ ހުކުމް ތަންފީޒު ކުރުން ފަސް ކުރުމުގެ އަމުރާއި ވަގުތީ އަމުރަށް ގޮތެއް ނިންމަވައި ދެއްވުމަށެވެ.
