މި ސަރުކާރުން މަސްތުވާތަކެއްޗާ ދެކޮޅަށް ކުރަނީ ހަނގުރާމަ، ކުރީ ސަރުކާރުން ޑްރަގް ޓްރެފިކް ކުރާ މީހުން ދޫކުރި: ސަލީމް
ރާއްޖޭގައި މަސްތުވާތަކެތި އަތުލައިގަނެވޭ މިންވަރު އިތުރުވެފައި ވަނީ މަސްތުވާތަކެއްޗާ ދެކޮޅަށް ތެދު ނިޔަތުގައި ސަރުކާރުން ކުރަމުން އަންނަ ބުރަ މަސައްތަކުން ކަމަށް ހޯރަފުށީ ދާއިރާގެ މެންބަރު އަޙްމަދު ސަލީމް ވިދާޅުވެއްޖެއެވެ.
މަސްތުވާތަކެތި ރާއްޖެއަށް އެތެރެ ކުރާ މީހުން ދޫވާ މައްސަލައިގައި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް ހުށަހެޅުއްވި މައްސަލައިގެ ބަހުސް މަރުހަލައިގައި ސަލީމް ވިދާޅުވީ، މަސްތުވާ ތަކެތި ޓްރެފިކް ކުރާ މީހުންނަށް މައާފް ދޭން ނިންމީ ކުރީގެ ސަރުކާރުން ކަމަށެވެ. އަދި އެކަންކޮށްފައި ވަނީ ޤާނޫންތަކަށް ބަދަލު ގެނެސްގެން ކަމަށް ވެސް ސަލީމް ވިދާޅުވިއެވެވެ. މީގެ އިތުރުން ރާއްޖޭގައި މަސްތުވާތަކެތި އެތެރެ ކުރުމާއި ކޮންޓްރޯ ކުރުމަށް ޤާނޫނުތަކުން ލާޒިމްކޮށްފައިވާ ކަންކަމަށް އިސްކަން ދީފައި ވަނީ ކޮން ސަރުކާރަކުންތޯ ބަލައިލުން މުހިންމުކަމަށް އޭނާ ވިދާޅުވިއެވެ.
"މަސްތުވާތަކެއްޗާ ދެކޮޅަށް އެންމެ ބޮޑު ހަނގުރާމައެއް، އެންމެ ތެދު ނިޔަތުގައި ދެފުށް ފެންނަ ގޮތަށް ކުރަމުން މިގެންދަނީ ހަމަ މިސަރުކާރުން." ސަލީމް ވިދާޅުވީ ރާއްޖޭގައި މަސްތުވާތަކެތި ޓްރެފިކް ކުރާ މީހުންނަށް މީގެ ކުރިން މަޢާފް ނުދޭ ކަމަށާއި އެކަން ކުރީ ރައީސް އަބްދުﷲ ޔާމީންގެ ސަރުކާރުން ކަމަށެވެ. "އެ ޤާނޫނަށް ބަދަލު ގެނެސް 10 އަހަރުގެ ޖަލު ޙުކުމެއް ކުރަމުން ދިޔަ ޑްރަގް ޓްރެފިކް ކުރި މީހަކަށް މަޢާފް ދެއްވީ އޭރުގެ ރައީސް. މިއަދު ހަމަ ޤަރާރު ހިފައިގެން ވަޑައިގެން ސްޓޭޓް ސޮޕޮންސާޑް ކަމެކޭ ވިދާޅުވާއިރު، އެއީ އޭރު އެކަން އޮތް ގޮތް."
ސަލީމްގެ ވާހަކަފުޅުގައި، ފުލުހުންގެ ބެލުމުގެ ދަށުގައި ހުންނަ މަސްތުވާތަކެތި ކުރީގެ ސަރުކާރުން އިންތިޚާބުތަކާ ދިމާކޮށް ބަހަމުން އަންނަ ކަމަށް ތުހުމަތު ކުރެއްވިއެވެ.
"10 އަހަރު ވެފައި ހުރި ތަކެތި (މަސްތުވާތަކެތި) މިހާރުގެ ސީޕީ މަޤާމާ ހަވާލުވެ ވަޑައިގެންނެވިއިރު، ފުލުހުންގެ ތެރޭގައި ރައްކާކޮށްފައި އެހެރީ ކީއްކުރަންތޯ؟ ކޮބައިތޯ ބޭނުމަކީ، އިންތިޚާބުތަކަށް ބޯ ގުނައިގެން އެތަނުން މަސްތުވާތަކެތި ނެރެ ބަހަމުން ދިޔަ ސަރުކާރެއްގެ ވާހަކަ އެ ދައްކަވަނީ" ސަލީމް ވިދާޅުވިއެވެ.
އިދިކޮޅު ފަރާތްތަަކަށް ވަރަށް ބޮޑަށް ފާޑު ވިދާޅުވަމުން ސަލީމް ވަނީ މިހާތަނަށް މި ސަރުކާރުން އެއް ޓަނުގެ މަސްތުވާތަކެތި އަތުލައިގެންފައި ކަމަށާއި މިކަމުން މި ސަރުކާރުން މަސްތުވާތަކެއްޗާ ދެކޮޅަށް ކުރާ ހަނގުރާމައިގައި އިޚްލާސްތެރިކަން އެނގޭ ކަމަށެވެ.
