އެމްއެންޕީގެ ޕީޖީ ލީޑަރަކަށް ޢަބްދުﷲ ރިޔާޒު
މޯލްޑިވްސް ނޭޝަނަލް ޕާޓީ އެމްއެންޕީގެ ޕާލަމެންޓްރީ ގްރޫޕުގެ ލީޑަރަކަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު ޢަބްދުﷲ ރިޔާޒު ހަމަޖައްސަވައިފިއެވެ.
މި ބަދަލާ އެކު މަޖިލީހުގެ ކޮމެޓީތަކަށް ވެސް ބަދަލުތަކެއް އަންނާނެ ކަމަށް މަޖިލީހުގެ ރައީސް، ރައީސް މުޙައްމަދު ނަޝީދު ވަނީ ވިދާޅުވެފައެވެ.
މޯލްޑިވްސް ނެޝަނަލް ޕާޓީ (އެމްއެންޕީ) އިލެކްޝަންސް ކޮމިޝަންގެ ސިޔާސީ ޕާޓީގެ ދަފްތަރުގައި ހިމެނުމާ ގުޅިގެން ، އެ ޕާޓީގެ ނަން ، ރައްޔިތުންގެ މަޖިލީހުގެ ސިޔާސީ ޕާޓީތަކުގެ ދަފްތަރުގައި ހިމަނައިފައި ވަނީ އިއްޔެއެވެ.
އެމްއެންޕީ މަޖިލީހުގެ ދަފްތަރުގައި ރަޖިސްޓްރީ ކުރައްވައިފައި ވަނީ މަޖިލީހުގެ ތިން މެމްބަރަކާ އެކުގައެވެ. އެ މެމްބަރުންނަކީ އެމްއެންޕީގެ ރައީސް ދަނގެތި ދާއިރާގެ މެމްބަރު މުހައްމަދު ނާޒިމްއާއި، ތިމަރަފުށީ ދާއިރާގެ މެމްބަރު އަބްދުﷲ ރިޔާޒުގެ އިތުރުން ވިލިމާލެ ދާއިރާގެ މެމްބަރު އަހުމަދު އުޝާމްއެވެ.
މަޖިލީހުގެ މެމްބަރުންގެ ދަފްތަރުގައި ހިމެނޭ މެމްބަރުންނަށް ބަލާއިރު އެމްޑީޕީގައި 65 މެމްބަރުން، ޕީޕީއެމްގައި 6 މެމްބަރުން، ޖުމްހޫރީ ޕާޓީގައި 3 މެމްބަރުން، ޕީއެންސީގައި 3 މެމްބަރުން، އެމްއެންޕީގައި 3 މެމްބަރުން, އެމްޑީއޭގައި 2 މެމްބަރުން އަދި މިނިވަން 5 މެމްބަރުން ހިމެނެއެވެ.
ސިޔާސީ ޕާޓީއެއްގެ ގޮތުގައި އެމްއެންޕީ ރެޖިސްޓްރީ ކުރުމަށް ހުށަހަޅައިފައި ވަނީ މިދިޔަ ސެޕްޓެމްބަރު މަހުގެ 15 ވަނަ ދުވަހުގައެވެ. އެ ޕާޓީ ރެޖިސްޓްރީކުރުމަށް ހުށަހެޅީ 5،000އަށް ވުރެ ގިނަ މީހުންގެ ފޯމާ އެކުގައެވެ.
