ކުރިއަށް އޮތް 3 ދުވަހު މޫސުން ގޯސްވާނެ، ސަމާލުވާތި!
ކުރިއަށް އޮތް 3 ދުވަހު ރާއްޖެއަށް ވައިގަދަވެ ކަނޑުތައް ގަދަވާނެތީ މޫސުމަށް ސަމާލު ވުމަށް މޫސުމާ ބެހޭ ގައުމީ އިދާރާއިން އިލްތިމާސްކޮށްފިއެވެ.
މޫސުމާބެހޭ ގައުމީ އިދާރާއިން ވިދާޅުވީ ރާއްޖެއާއި ދުރުން އަރަބި ކަނޑާއި ބޭ އޮފް ބެންގަލްގައި ދެ ކޮޅިގަނޑެއް އުފެދިފައިވާ ކަމަށެވެ. އެހެންކަމުން މި ދެ ކޮޅިގަނޑުގެ ސަބަބުން ރާއްޖެ ހިމެނޭ ސަރަހައްދަށް ކުރިއަށް އޮތް 3 ދުވަހު އާއްމުކޮށް ވައި ގަދަވުމާ އެކު ކަނޑުތައް ވެސް ގަދަވާނެ ކަމަށް މޫސުމާ ބެހޭ ގައުމީ އިދާރާއިން ވިދާޅުވިއެވެ.
"އެހެންކަމުން ހުރިހާ ފަރާތްތަކުން، ހާއްސަކޮށް ކަނޑު ދަތުރު ކުރައްވާ ފަރާތްތަކުން މޫސުމަށް ވަރަށް ބޮޑަށް ސަމާލުވެ، ސަލާމަތީ ގޮތުން އަޅަން ޖެހޭ ފިޔަވަޅުތައް ޔަގީން ކުރެއްވުމަށް ދަންނަވަމެވެ." މެޓް އޮފީހުން ވިދާޅުވިއެވެ.
މިއަދު ރާއްޖޭގެ މޫސުން ލަފާ ކުރާ ގޮތަށް ބަލާލާއިރު އުތުރުގެ އެކި ހިސާބުތަކަށް ގުގުރާނެ ކަމަށާއި މެދު ރާއްޖެތެރެއާއި ދެކުނުގެ ބައެއް ރަށްރަށަށް ކެރީގެ އަސަރު ފޯރުން އެކަށީގެންވާކަމަށް މެޓް އޮފީހުން މައުލޫމާތު ދެއްވައެވެ.
މެދުރާއްޖެތެރެއަށް ވައި ޖެހޭނީ ހުޅަނގާއި ހުޅަނގު އުތުރުން ގަޑިއަކު 13 މޭލާ 23 މޭލާ ދެމެދުގެ ބާރު މިނެއްގައި ކަމަށާއި އުތުރުގެ އަތޮޅުތަކަށް ވައިޖެހޭނީ ގަޑިއަކު 7 މޭލާއި 15 މޭލުގެ ބާރުމިނެއްގައި ކަމަށް މެޓް އޮފީހުން ލަފާކުރައްވައެވެ. އަދި ވިލާގަނޑުގައި ގަޑިއަކު 40 މޭލަށް ވައި ގަދަވާނެކަމަށް ވެސް މެޓުން ލަފާކުރައްވައެވެ.
ރާއްޖޭގެ ކަނޑުތަކަށް ބަލާލާއިރު މެދު ރާއްޖެތެރެއާއި ދެކުނުގެ އަތޮޅުތަކުގައި ކަނޑު ގަދަވާނެކަމަށާއި އުތުރުގެ އަތޮޅުތަކުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެކަމަށް މެޓުން ލަފާކުރައްވާ އިރު ރާޅުގެ އުސްމިން ހުންނާނީ 7 ފޫޓާއި 3 ފޫޓާ ދެމެދުގައި ކަމަށް ވެސް މެޓުން ވިދާޅުވެއެވެ.
Ads by STO
