ފިރިހެނަކު ބަރަހަނާކޮށް ފައިސާ ހޯދަން އުޅުނު މައްސަލާގައި ހައްޔަރުކުރި 3 މީހުން ދޫކޮށްލައިފި

ފިރިހެނަކު ބަރަހަނާކޮށް ފައިސާ ހޯދަން އުޅުނު މައްސަލާގައި ހައްޔަރުކުރި 3 މީހުން ދޫކޮށްލައިފިއެެވެ.

މާލޭގައި 27 އަހަރުގެ ދިވެހި ފިރިހެނަކު ބްލެކްމެއިލްކޮށް ބިރުދައްކައި ބަރަހަނާކޮށް ވީޑިއޯކޮށް ފައިސާ ހޯދަން އުޅުނު މައްސަލައެއް ފުލުހުންނަށް ރިޕޯޓްކޮށްފައިވަނީ ރޭ 03:49 ހާއިރުއެެވެ.

މި މައްސަލާއާ ގުޅިގެން ރޭ ހައްޔަރުކުރީ 24 އަހަރުގެ މީހަކާއި 27 އަހަރުގެ މީހެއްގެ އިތުރުން 31 އަހަރުގެ މީހެކެވެ.

ފުލުހުން ވިދާޅުވީ އެ ތިން މީހުން ދޫކޮށްލާފައިވަނީ މައްސަލަ ހުށަހެޅި ފަރާތުން މައްސަލަ ކުރިއަށް ގެންދަން ބޭނުން ނުވާތީ ކަމަށެވެ.

މި މައްސަލަ ފުލުހުން އިތުރަށް ތަހުގީގު ކުރަމުންދާ ކަމަށް ވެސް ފުލުހުން މައުލޫމާތު ދެއްވައެވެ.