ދީބާޖާ މައްސަލައިގެ އަޑުއެހުންތައް ނިންމައިލައި، ހުކުމާ ހަމައިގައި
ފެރީގެ ހިދުމަތް ދިނުމަށް ދީބާޖާ އިންވެސްޓްމަންޓާ އެކީ ޓްރާންސްޕޯޓް މިނިސްޓްރީން ހެދި އެއްބަސްވުން ބާތިލު ކުރުމާ ގުޅިގެން އެ ކުންފުންޏަށް ލިބުނު ގެއްލުމުގެ ބަދަލު ހޯދަން ސުޕްރީމް ކޯޓުގައި ކުރިއަށްދާ އިސްތިއުނާފް މައްސަލައިގެ އަޑުއެހުންތައް މިއަދު ނިންމައިލައިފިއެވެ.
ސުޕްރީމް ކޯޓުގައި ތިންވަނަ ފަހަރަށް ކުރިއަށް ގެންދާ މި މައްސަލައިގެ މިއަދުގެ އަޑުއެހުމުގައި ފަނޑިޔާރުން ވަނީ ދީބާޖާއަށް އަމާޒު ކޮށްގެން ގިނަ ސުވާލުތަކެއް ކުރައްވައިފައެވެ. އެގޮތުން ސަރުކާރުން އެއްބަސްވުން ބާތިލުކުރުމުގައި ގާނޫނާ ހިލާފު ވަނީ ކޮން ގޮތަކަށްތޯ ފަނޑިޔާރު އަލީ ރަޝީދު ހުސެއިން މިއަދުގެ އަޑުއެހުމުގައި ސުވާލު ކުރެއްވިއެވެ.
ޖަވާބުގައި ދީބާޖާގެ ފަރާތުން ވަކީލު ވިދާޅުވީ ދެފަރާތުން ވެފައިވާ އެއްބަސްވުމުގައި ބަޔާންކުރާ ގޮތުގެ މަތިން ޓްރާންސްޕޯޓް މިނިސްޓްރީން ފޮނުވާފައިވާ ނޯޓިސްގެ މުއްދަތު ހަމަވުމުގެ ކުރިން އެއްބަސްވުން އުވައިލައިފައިވާ ކަމަށާއި އެ އެއްބަސްވުން ބާތިލުކޮށްފައި ވަނީ ފެރީގެ ހިދުމަތް ކެނޑުމުން އަލުން ހިދުމަތް ފެށުމަށް މިނިސްޓްރީގެ ފަރާތުން ފުރުސަތު ދިނުމުން އެ ހިދުމަތް ކުރިއަށް ގެންދަނިކޮށް ކަމަށެވެ.
ވަކީލުގެ ވާހަކަތަކާ ގުޅިގެން ދައުލަތުން ބުނީ އެއްބަސްވުން ބާތިލު ކުރަން ޖެހުނީ ގިނަ ދުވަސްތަކެއް ވަންދެން ހިދުމަތް މެދުކެނޑުމުން ކަމަށްވާއިރު، އޭގެ ނަތީޖާއެއްގެ ގޮތުން އެއްބަސްވުން ހެދި ސަބަބު ހާސިލް ނުވާ ކަމަށެވެ. އަދި އެއްބަސްވުން ބާތިލުކުރީ މުސްތަގުބަލުގައި ވެސް އެއްބަސްވުމާ އެއްގޮތަށް އަމަލު ނުކޮށްފާނެ ކަމަށް ކަމަށެވެ.
