Saturday, 21 November 2026
Advertisement
Ooredoo — Article-Top (leaderboard)
ސިޔާސީ

ރައީސް ޔާމީނަށް މަރުޙަބާ ދެންނެވުމަށް ބޮޑު ޖަލްސާއެއް!

ރައީސް ޔާމީނަށް މަރުޙަބާ ދެންނެވުމަށް ބޮޑު ޖަލްސާއެއް!

ކުރީގެ ރައީސް އަބްދުﷲ ޔާމީން ޖަލު ހުކުމުން މިނިވަންވެވަޑައިގެންނެވުމާ ގުޅިގެން ޑިސެމްބަރު 3ވާ ހުކުރު ދުވަހުގެރޭ ކާނިވާ ސަރަހައްދުގައި މަރުހަބާ ދެންނެވުމުގެ ގޮތުން ހާއްސަ ޖަލްސާއެއް ބާއްވަން އިދިކޮޅު ޕްރޮގްރެސިވް ކޮންގްރެސް ކޯލިޝަނުން ނިންމައި، އެކަން އިއުލާންކޮށްފިއެވެ.

މިއަދު ޕީޕީއެމް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމެއްގައި ހުޅުމާލެ ދާއިރާގެ ކައުންސިލަރު އަދި ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވީ ޖަލު ހުކުމުން މިނިވަންވެވަޑައިގެންނެވުމަށް ފަހު ރައީސް ޔާމީންގެ އެންމެ ފުރަތަމަ ވާހަކަފުޅު އެރޭގެ ޖަލްސާގައި އިވިގެންދާނެކަމަށެވެ. ޝުޖާއު ވިދާޅުވީ މިޖަލްސާގައި ވީހައި ވެސް ގިނަ ރައްޔިތުން ބައިވެރިވުމަކީ އިދިކޮޅު ކޯލިޝަންގެ ވަރަށް ބޮޑު އެދުމެއްކަމަށެވެ.

ޖަލްސާ ބޭއްވުމަށް ކާނިވާ ސަރަހައްދު ހޯދުމަށް މާލެ ސިޓީ ކައުންސިލަށް ސިޓީ ފޮނުވާފައިވާ ކަމަށާއި މިހާރު ޖަލްސާ ބޭއްވުމަށް އެސަރަހައްދު ލިބިފައިވާކަމަށް ވެސް ޝުޖާ ވިދާޅުވިއެވެ.

Advertisement
Allied Insurance — Square (box)

"އަޅުގަނޑުމެންގެ އެދުމަކީ ހަމަ ހުރިހާ ލޮބުވެތި ރައްޔިތުން މިޖަލްސާގައި ބައިވެރިވެވަޑައިގަތުން. އަދި ތިޔަ ލޮބުވެތި ރައްޔިތުންނާއި ރައީސް ޔާމީނާ އެތަނުން، ކާނިވާ ސަރަހައްދުން، އިންޝާ ﷲ ބައްދަލުކުރުމުގެ ނަސީބު ލިބިގެންދާނެ" ޝުޖާ ވިދާޅުވިއެވެ.

މިއަދު އޮތް ނޫސްވެރިންގެ ބައްދަލުވުމުގައި ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއީލް ވިދާޅުވީ ތަރައްގީގެ 5 އަހަރަށް ފަހު 2018ގައި ވެރިކަން ބަދަލުވެ އޭގެ ފަހުން އައި ސަރުކާރުން ރައީސް ޔާމީނަށް ނުހައްގުން ދެމުން ގެންދިޔަ އަނިޔާތަކާ ގުޅިގެން ރައްޔިތުންގެ ހިތްތަކަށް ލިބިފައިވާ ނުތަނަވަސްކަން ފިލުވައިލުމަށް ޓަކައި ހުކުރުދުވަހުގެ ޖަލްސާ ހާއްސަ ކުރެވޭނެ ކަމަށެވެ. ރާއްޖޭގެ ހުރިހާ ރަށަކުން މި ޖަލްސާއަށް ރައްޔިތުން އައުމަކީ ވަރަށް ބޮޑު އެދުމެއް ކަމަށް ވެސް އޭނާ ވިދާޅުވިއެވެ.

މިޖަލްސާގައި ރައީސް ޔާމީނާ ގާތުން ބައްދަލުވެ، ސަލާން ކުރުމާއި ހާލު އަހުވާލު އޮޅުންފިލުއްވޭނެކަމަށް މުހައްމަދު އިސްމާއިލް ވިދާޅުވިއެވެ. މީގެ އިތުރުން އޭނާ ވަނީ ރައީސް ޔާމީން މިނިވަންކުރުމަށް ޓަކައި ކުރި މަސައްކަތުގައި ގިނަ އަންހެން ބޭފުޅުން އިސްކޮށް ހަރަކާތްތެރިވިކަން ފާހަގަކުރައްވައި އެ ހުރިހައި ފަރާތްތަކަށް ޝުކުރު އަދާކުރައްވައިފައެވެ.

އިއްޔެ ސުޕްރީމް ކޯޓުން ރައީސް ޔާމީންގެ މައްޗަށް ކޮށްފައިވާ ޖަލު ހުކުމް ބާތިލްކުރުމާ ގުޅިގެން އިދިކޮޅުގެ ހަރަކާތްތައް ކުރިއަށްވުރެ ހަލުވި ދުވެލީގައި ކުރިއަށް ގެންދާނެކަން އެ ކޯލިޝަނުން ވަނީ އިއުލާންކޮށްފައެވެ. މާލޭގެ އިތުރުން އަތޮޅު ތެރޭގައި ވެސް މި ހަރަކާތްތައް ކުރިއަށް ގެންދާނެކަމަށް އިދިކޮޅުން ވަނީ ބުނެފައެވެ.

ރިއެކްޝަން

Advertisement
Ooredoo — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.