ރައީސް ޔާމީންގެ ހުކުމުން ފެނުނީ ރަނގަޅެއްގެ ފެށުން: ނިޝާން
މަނީލޯންޑަރ ކުރުމުގެ ކުށުގެ ދައުވާ ސާބިތުވާކަމަށް ކަނޑައަޅައި ކްރިމިނަލް ކޯޓުން ފަސް އަހަރު ދުވަހު ޖަލަށްލުމަށް ކުރީގެ ރައީސް ޢަބްދުﷲ ޔާމީންގެ މައްޗަށް ކުރިހުކުމް ސްޕްރިމް ކޯޓުން ބާތިލުކުރިކުރުމަކީ ރަނގަޅެއްގެ ފެށުންކަމަށް ޤާނޫނީ ވަކީލު މުޙައްމަދު ނިޝާން އިބްރާހީމް ވިދާޅުވެއްޖެއެވެ.
"ދެން"އާ ވާހަކަދައްކަވަމުން ނިޝާން ވިދާޅުވީ، މިރާއްޖޭގައި އަބަދުވެސް ނުކެނޑި އޮންނަ އަޑަކީ ވެރިކަމުގެ ތެރޭގައި ތިއްބަވާ ބޭބޭފުޅުން ޝަރުއީ ދާއިރާއަށް ނުފޫޒާއި ބާރު ހިންގާ އެއިރެއްގައި އިދިކޮޅުގައި އޮންނަ ފަރާތްތަކުގެ މައްޗަށް އެކި ބާވަތްބާވަތުގެ ޖިނާއީ ދައުވާތައް އުފުލަމުން އަންނަ ވާހަކަ ކަމަށެވެ.
"މިވާހަކައެއް ނުހުއްޓުނު، އަޅުގަނޑު އަޑުއަހަން އިނގޭތޯ، ކުޑައިރުންސުރެ ވެސް އެ ވާހަކަ، އެއިރު އަޅުގަނޑަށް ޤަބޫލުކުރެވިފައި އޮންނަނީ ވެރިކަންކުރުމަކީ ޖަލަށްދިޔުމަށް ހަމަވާ ރުކުނެއްކަމަށް" ވަކީލު ނިޝާން ވިދާޅުވިއެވެ.
މިމައުޟޫގައި އިތުރަށް ވާހަކަ ދައްކަވަމުން ނިޝާން ފާހަގަކުރި ގޮތުގައި ރައީސް ޔާމީން ، ކުށުން ބަރީޢަވެދާނެ ކަމަށް ގިނަ މީހުން ނުދެކޭ ކަމަށެވެ.
"އެކަން އެބޭބޭފުޅުންނަށް ޤަބޫލުފުޅު ނުކުރެވެނީ މާޒީގައި ކަންކަން ހިނގައިފައިވާ ގޮތުން. މިހާރު ވެސް އެކަން އެގޮތަށް ހިނގާނެކަމަށް ގަބޫލުފުޅުކުރެވެނީ. އެމްޑީޕީއިން 19 ވަނަ މަޖުލީހަށް ކެންޕެއިން ކުރަމުންދިޔައިރު ދިވެހި ރައްޔިތުންނަށް ވިއްކި އެޖެންޑާ19 ކިޔާ އެއްޗެއް، އޭގެ 1ވަނަ ނަމްބަރުގެ 1.4 ގައި އޮންނާނެ ޝަރުއީ ދާއިރާ އިސްލާހުކުރުން ލިޔެފައި، އެކަން މިއަދު ވަމުން އަންނަ ތަން ދިވެހި ރައްޔިތުންނަށް މިފެނުނީ." ނިޝާން ވިދާޅުވިއެވެ.
ރައީސް ޔާމީންގެ ހުކުމުން 4 ކަމެއް ފާހަގަކުރެވިފައިވާ ކަމަށާއި، އެކަންކަމަކީ ދިފާއުގައި ވަކި ނުކުތާއެއް ފާހަގަ ނުކުރިކަމުގައި ވިޔަސް ފަނޑިޔާރުންނަށް އެކަންކަން ފާހަގަކުރެވޭ ނަމަ އެކަންކަމަށް ރިއާޔަތްކުރަންވާނެ ކަމަށާއި، ރައީސް ޔާމީންގެ ފަރާތްފުޅުން ދިފާއުގައި ފާހަގަ ނުކުރައްވާ، ހުކުމަށް އަސަރުކުރާ ކަންކަން ފަނޑިޔާރުންނަށް ފާހަގަވެގެން އެކަންކަމުގެ މައްޗަށް ނަޒަރުކޮށްފައިވާކަން ހުކުމުން އެނގެން އޮތްކަމަށް ވެސް ވަކީލު ނިޝާން ވިދާޅުވިއެވެ. އަދި އެއަށް ކިޔަނީ ޤާޟީގެ އިލްމަށް ރިއާޔަތްކުރުން ކަމަށް ވެސް ވިދާޅުވިއެވެ.
މިހުކުމުން ފާހަގަވާ އަނެއްކަމަކީ މިރާއްޖޭގެ ތަހްޤީޤްގެ ވައްޓަފާޅި ބޮޑުތަނުން ބަދަލުކުރަން ޖެހޭ ކަމަށާއި، ދައުވާ އުފުލުމުގެ މަރުހަލާ ވެސް ހަރުދަނާކުރަން ވެފައިވާކަމަށެވެ.އަދި ޝަރުއީ ދާއިރާ އެއްކޮށް މިނިވަންވުމާ ދިމާއަށްދާ މަންޒަރު ފެންނަކަމަށްވެސް ނިޝާން ފާހަގަކުރިއެވެ.
"މިއީ އުފާކުރާކަމެއް އިނގޭތޯ، އެހެންވީމާ އަޅުގަނޑު މިދަންނަވަނީ ރަނގަޅެއްގެ ފެށުންކަމަށް. ރައީސްކަން ކުރި އެއްވެސް ބޭފުޅަކު ޖަލަށް ދިޔުމަކީ އަޅުގަނޑު އެދޭ އަދި ޤަބޫލުކުރާ ގޮތެއްނޫން." ނިޝާން ވިދާޅުވިއެވެ.
ނިޝާން ވިދާޅުވީ އެކަން އެގޮތަށް ހިނގާ ނަމަ އަނބަދު ޖެހޭނީ އެ އާދައިގައި ހިފައިގެން ކޮންމެ ދައުރެއްގެ 5 އަހަރު އެކަމުން ސަލާމަތްނުވެގެން އުޅެން ކަމަށެވެ. މީގެ އިތުރުން ގާނޫނީ ނިޒާމުގައި މައްސަލަތަކެއް ހުރިކަން ވެސް ފާހަގަވާކަމަށާއި، އެހެންކަމުން ގާނޫން އަސާސީއިން ތަންތަންކޮޅު ބަދަލުކުރުމުގެ ބަދަލުގައި ހުރި ހުރިހާ މައްސަލަތަކަށް ނަޒަރުކޮށް ހުރިހާކަމެއް ގާނޫނު އަސާސީއިން އެކީ އެއް މަރުހަލާއެއްގައި ބަދަލުކުރުން އެއީ އެންމެ ފައިދާ ހުރި ރަނގަޅު ގޮތްކަމަށް ނިޝާން ފާހަގަކުރެއްވިއެވެ.
ރަނގަޅެއްގެ ފެށުންއައީ ކުރަންބޭނުންވިކަން ކޮށްނިމުނީމަ ވިސްނާތިދިނީ މިސަރުކާރުން ޔާމީނުގެ ޝަރީޢަތަށް ނުފޫޒު ނުފޯރުވާ ކަމަށް ނޫން ނޫން ނުފޫޒު ފޯރުވިވަރު މުޅިދުނިޔެއަށް ފެނުނު ކުޑަކުއްޖަކަށްވެސް އެނގޭހާ ވަރަށް ޚުދު އެމްޑީޕީގެގިނަ މީހުންވެސް ޤަބޫލްކުރި ނުފޫޒް ފޯރިކަން މިހާރު ކޮންތަ ނެއްމަތިއޮމާން ކުރާކަށް އަދި ކުރިޔަށް އޮތްތާ ޔާމީނުއަށް ކަންކުރާނީ ކިހިނެއް ކަމެއްވެސް ނޭނގޭ ބައްލަވާ މިނިވަންވި ވަގުތު ސެކިއުރިޓީއަށް ވިގޮތް އެކަންވެސް ހަނދާންވީ ބަޔަކު ގޮވާލީމަ ރައީސްކަން ކޮށްފަ ހުރިމީހަކަށް އެންމެ މިނެޓެއް ވެސް ސެކިއުރިޓީ ލަސްވާން ޖެހޭތޯ. މިހިރަ ކަންކަމަކީ ނުފޫޒުގެ ކައިރީން ވާރުތަވާ ކަންކަން
ނުފޫޒު އޮތީ ފޯރުވާފަ. އޭގެ ހެކި ޔާމީނު ނުފުރޭގޮތް ހެދުން. މާނައަކީ އަދި ކުރިއަށް އޮތީއޭ. އިތުރު ދައުވާތައް ނެތްނަމަ އަސްލު އެނގޭނީ.