ނުކުޅެދުންތެރިކަން ހުންނަ މީހުންގެ ހައްގުތައް ކަށަވަރު ކުރަން ސަރުކާރަށް އެހީ ބޭނުންވޭ: ރައީސް
ނުކުޅެދުންތެރިކަން ހުންނަ މީހުންގެ ހައްގުތައް ކަށަވަރު ކުރަން މުޅި މުޖުތަމައުގެ އެހީތެރިކަން ސަރުކާރަށް ބޭނުންވާކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރިވެލި އެވޯޑް 2021 ދިނުމުގެ ގޮތުން ހޮނިހިރު ދުވަހުގެ ރޭ ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ޞާލިހު ވިދާޅުވީ ނުކުޅެދުންތެރިކަން ހުންނަ މީހުންނަކީ މުޖުތަމަޢުގެ ވަރަށް މުހިންމު ޙިއްޞާއެއް ކަމަށެވެ. އެހެން ނަމަވެސް އެ ޙިއްޞާ ފުރިހަމަވެގެންދާނީ، ވަށައިޖެހޭ ނިޒާމެއްގެ ތެރެއިން، ދައުލަތުގެ ހުރިހާ މުއައްސަސާތަކާއި މުޅި މުޖުތަމަޢު އެކުގައި މަސައްކަތްކޮށްގެންކަމަށް ރައީސް ވިދާޅުވިއެވެ. އަދި ވިދާޅުވީ އެ ނިޒާމު ފުރިހަމަކުރެވޭނީ، އެންމެންގެ ޒިންމާއެއްކަން ޤަބޫލުކޮށް، އެކަމަށް މަސައްކަތް ކޮށްގެންކަމަށެވެ.
"އަޅުގަނޑުގެ އުންމީދަކީ، ނުކުޅެދުންތެރިކަން ހުންނަ މީހުންނާއި ކުދިންގެ ޙައްޤުތައް ރައްކާތެރިކޮށްދިނުމަށް، ސަރުކާރުން މި ކުރާ މަސައްކަތް، މުޖުތަމަޢުގެ ބައިވެރިވުމާއި އެއްބާރުލުމާއެކުގައި، މިހާރަށް ވުރެ ފުރިހަމަވެގެން ދިޔުން. އަދި އަޅުގަނޑުމެން އެންމެންނަކީ ވެސް، މުޖުތަމަޢުގައި ތިބި އެފަދަ މީހުންނާއި ކުދިންނަށް އެހީތެރިވެ އެއްބާރުލުން ދޭ ބަޔަކު ކަމުގައިވުން." ރައީސް ޞާލިހު ވިދާޅުވިއެވެ.
މީގެ އިތުރުން އެމަނިކުފާނު ވިދާޅުވީ ނުކުޅެދުންތެރިކަން ހުންނަ މީހުންގެ ތެރޭގައި ފަންނުވެރި ހުނަރުވެރިން އެބަތިބި ކަމަށެވެ. އެހެންކަމުން ކުރަންޖެހޭ ކަމަކީ، އެފަދަ ބޭފުޅުންގެ ހުނަރުތައް ތަރައްޤީ ކުރުމަށް ފުރުޞަތުތައް ފަހިކޮށްދިނުންކަމަށް ވިދާޅުވިއެވެ. އޭރުން އެފަދަ ބޭފުޅުންގެ ކިބައިގައި ހުރި ހުނަރުވެރިކަމާއި ފަންނުވެރިކަން އިތުރަށް ތަރައްޤީވެ، މުޖުތަމަޢަށާއި މުޅި ޤައުމަށް ވެސް، މިހާރަށް ވުރެ އެތައް ގޮތަކުން މަންފާކުރާނެ ކަމަށާއި އެއީ އެބޭފުޅުންގެ ދިރިއުޅުމުގެ ޙާލަތު ރަނގަޅު ކުރުމަށް ވެސް ލިބޭ އަގުހުރި ފުރުޞަތަކަށްވާނެކަމަށް ރައީސްގެ ވާހަކަފުޅުގައި ވިދާޅުވިއެވެ.
އެފަދަ ބޭފުޅުންގެ ޙާލަތު ރަނގަޅު ކުރުމަށް ކުރެވިދާނެ ވަރަށް މުހިންމު ކަންތައްތައް މިނޫނަސް އެބަހުރިކަމަށް ރައީސް ވިދާޅުވިއެވެ. އެގޮތުން ފެނިވަޑައިގަންނަވާ އެންމެ މުހިންމު އެއްކަމަކީ، އަޅައިލުމާއި ލޯތްބާއި އޯގާތެރިކަން، މިހާރަށް ވުރެ ފުރިހަމައަށް އެ ބޭފުޅުންނަށް ދިނުންކަމަށް ވެސް ވިދާޅުވިއެވެ.
"އޭރުން އެބޭފުޅުންގެ ޙަޔާތުން އެކަނިވެރިކަމާއި ހިތްދަތިކަން ފިލައިގެން ގޮސް، މާ އުފާވެރި ދިރިއުޅުމަކަށް މަގުފަހިވެގެންދާނެ. މުޖުތަމަޢުގައި ހަމަހަމަ ފުރުޞަތުތައް ލިބިގެންވާކަމާއި، ތަފާތުކުރުމެއް ނުގެންގުޅޭކަން އިޙްސާސް ކުރެވޭނެ." ރައީސް ވިދާޅުވިއެވެ.
ރައީސް ވިދާޅުވީ ނުކުޅެދުންތެރިކަން ހުންނަ ކުދިންނަށް ލޯތްބާއި އަޅައިލުން ދިނުމަކީ އެއްވެސް ހޭދައެއް ނުކޮށް ކުރެވޭނެ ކަމެއްކަމަށެވެ. އަދި އެކަމަށް ޓަކައި މާބޮޑު މަސައްކަތްތަކެއް ވެސް ކުރަން ނުޖެހޭކަމަށް އެ މަނިކުފާނު ވިދާޅުވިއެވެ.
ތިއީތޯ ނުލިބިގެން މިއުޅޭ ޖަވާބަކީ