މިހައިތަނަށް 41 އެމްބިއުލާންސް ރަށްރަށަށް ފޮނުވައިފައިވޭ: ރައީސް
އެމްބިއުލާންސްގެ ޚިދުމަތް ފުރިހަމައަށް ނުދެވޭ 96 ރަށަކަށް ޒަމާނީ އެމްބިއުލާންސް ފޯރުކޮށްދިނުމުގެ ގޮތުން މިހައިތަނަށް 41 އެމްބިއުލާންސް ރަށްރަށަށް ފޮނުވައިފައިވާ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައްޔިތުންގެ މަޖިލީހުގެ 2022ވަނަ އަހަރުގެ ފުރަތަމަ ދައުރުގެ ފުރަތަމަ ޖަލްސާގައި މިއަދު އިއްވެވި ރިޔާސީ ބަޔާނުގައި ރައީސް ވިދާޅުވީ ރާއްޖޭގައި ލާމަރުކަޒީ އުޞޫލުން ޕްރައިމަރީ ހެލްތްކެއަރގެ ނިޒާމު އަލުން އަނބުރާ ޤާއިމު ކުރުމުގެ ތައްޔާރީތައް ސަރުކާރުން ކުރަމުން އަންނަ ކަމަށެވެ.
މީގެ އިތުރުން ޞިއްޙީ ނިޒާމު ލާމަރުކަޒުކުރުމަށް ކުރާ މަސައްކަތްތަކުގެ ދަށުން ރާއްޖޭގެ 5 ސަރަޙައްދުގައި ތަރައްޤީކުރާ 5 ޓަރޝަރީ ހޮސްޕިޓަލުގެ ސަބަބުން ލިބެމުން އަންނަ ކުރިއެރުންތަކަށް ވެސް އެމަނިކުފާނު އަލިއަޅުއްވައިލެއްވިއެވެ.
އެގޮތުން މިހާރު ސީޓީ އަދި މޯބައިލް އަލްޓްރާ ސައުންޑް ސްކޭނާ އެކު ލެބޯރޓްރީ ނިޒާމް މި ހޮސްޕިޓަލުތަކުގައި ފުރިހަމަ ކުރެވިފައިވާކަމަށާއި އުތުރާއި ދެކުނުގައި އެމްއާރްއައި ޚިދުމަތާއި ހިތުގެ ބަލިތައް ދެނެގަނެ ފަރުވާދެވޭނެ ނިޒާމް މިހާރު ޤާއިމް ކުރެވިފައިވާކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ އެމްބިއުލާންސްގެ ޚިދުމަތް ފުރިހަމައަށް ނުދެވޭ 96 ރަށަކަށް ޒަމާނީ އެމްބިއުލާންސް ފޯރުކޮށްދިނުމުގެ ގޮތުން މިހާރު އެމްބިއުލަންސް ނުފޮނުވި ހުރި ރަށްރަށަށް ބޭނުންވާ އެމްބިއުލާންސްތައް ލިބި އަންނަ މާރޗް މަސް ނިމޭއިރަށް ފޮނުވޭނެކަމަށެވެ.
