ގާތުން ހާލު ބަލާކަމަށް ބުނެ މިނިސްޓްރީން ދަނީ އޮޅުވައިލަމުން: ދިވެހި ދަރިވަރުން

ޔޫކްރެއިންގައި ތިބި ދިވެހި ދަރިވަރުންގެ ހާލު ގާތުން ބަލަމުން ދާކަމަށް ބުނެ ފޮރިން މިނިސްޓްރީން މިއަދު ނެރުނު ނޫސް ބަޔާނުގައި އޮޅުވައިލައިފައިވާކަމަށް އެ ދަރިވަރުން ބުނެފިއެވެ.

Ads by Hajj Corporation

ޔޫކްރެއިންގައި ހަނގުރާމައިގެ ހާލަތު އިއުލާން ކޮށްފައިވާއިރު އެ ގައުމުގައި ތިބި ދިވެހި ދަރިވަރުން ގަވާއިދުތަކާއި އެންގުންތަކަށް ތަބާވެ ތިބުމަށް ފޮރިން މިނިސްޓްރީން އަންގާރަ ދުވަހު ވަނީ ބުނެފައެވެ. މިނިސްޓްރީން ބުނީ އެގައުމުގައި ތިބި ދިވެހިންގެ ހާލަތު ގާތުން ބަލަމުން ދާކަމަށެވެ.

މިނިސްޓްރީން ދަނީ އޮޅުވައިލަމުން

މިކަމާ ގުޅިގެން ދަރިވަރުންގެ ފަރާތުން މީސް މީޑިއާ މެދުވެރިކޮށް ނެރުނު ބަޔާނެއްގައި ހާލަތު ވަރަށް ތަފްސީލުކޮށް ބަޔާންކޮށްދީފައި ވެއެވެ. އެގޮތުން ދިވެހި ދަރިވަރުން ދިރިއުޅެމުންދާ ކޮމްޕްލެކްސް ހުންނަނީ ޔޫކްރެއިންއާއި ރަޝިޔާއާ ގުޅޭ ބޯޑަރު ކައިރީގައިކަމަށް ބުންޏެވެ. އެހެންކަމުން ހަނގުރާމައެއް ފަށައިފިނަމަ ހަމަލާގެ އަސަރު އެންމެ ފުރަތަމަ ކުރާނީ އެ ސަރަހައްދަށްކަމުން ދަރިވަރުން ވަނީ ކަންބޮޑުވުން ފާޅުކޮށްފައެވެ.

ޔޫކްރެއިންއާއި ރަޝިޔާއާ ދެމެދު ހަނގުރާމައިގެ ހާލަތު އިއުލާންކޮށް މަޝްރަހު ހޫނުވާން ފެށުމާ އެކު ވެސް ދިވެހި ސަރުކާރުން ދަރިވަރުންނާ އެއްވެސް ގޮތަކުން ގުޅަން މަސައްކަތް ކޮށްފައި ނުވާކަމަށް ދަރިވަރުން ބުނެއެވެ. އެހެންކަމުން ދަރިވަރުން އަމިއްލައަށް ޔޫކްރެއިންއާ އެންމެ ކައިރީގައި ހުރި ދިވެހި އެމްބަސީއާ ގުޅުމުގެ މަސައްކަތް ފެށިކަމަށް ބުންޏެވެ.

"ޖާމަނީގެ ބާލިންގައި ހުރި އެމްބަސީއާ ކޮންޓެކްޓު ކުރެވުނު. އެމްބަސީގެ އޮފިޝަލުންގެ އެދުމުގެ މަތިން ގްރޫޕެއް ހަދައި ދަރިވަރުންގެ ސުވާލުތަކަށް ޖަވާބު ދިނުން އެ ގްރޫޕުގައި ކުރިއަށް ގެންދެވުނު" ދަރިވަރުން ނެރުނު ނޫސްބަޔާނުގައި ބުންޏެވެ.

އެހެން ނަމަވެސް އެ ގްރޫޕުގައި ވެސް އެމްބަސީ އޮފިޝަލުންގެ ފަރާތުން މާބޮޑު އެއްބާރުލުމެއް ނުލިބުނުކަމަށް ވެއެވެ. އޭގެ ތިން ދުވަސް ފަހުން ޔޫކްރެއިންގެ ހާލަތު އިތުރަށް ސީރިއަސްވާކަމުގެ މީޑިއާ ރިޕޯޓުތައް ލިބުމުން އެރިޕޯޓުގެ ސްކްރީން ޝޮޓެއް ނަގައި ދަރިވަރުން ގްރޫޕަށް ލިއެވެ. އެއާ އެކު ގޫގުލް ފޯމެއް މެދުވެރިކޮށް ހުރިހައި ދަރިވަރުންގެ މައުލޫމާތު އެމްބަސީއާ ހިއްސާކުރަން އެދުނުކަމަށް ދަރިވަރުން ބުންޏެވެ.

އޭރު ޔޫކްރެއިންއިން އެހެން ގައުމުތަކަށް ދަތުރު ކުރެވޭ ޓިކެޓުގެ އަގު 2،500 އެމެރިކާ ޑޮލަރަށް ވުރެ މަތިވިއެވެ. އެހެން ނަމަވެސް އެ އަގުގައި ޓިކެޓު ނެގުމުގެ މާލީ ތަނަވަސްކަން ހުރިތޯ ވެސް އެމްބަސީން ސާފުކޮށްފައި ނުވާކަމަށް ދަރިވަރުން ބުންޏެވެ. މިދިޔަ އާދިއްތަ ދުވަހު ޔޫކްރެއިންގެ އެއާޕޯޓުތައް ވަނީ ބަންދުކޮށްފައެވެ. ބައެއް ގައުމުތަކުގެ ދަރިވަރުންނާއި އާއިލާތައް އަނބުރާ އެ ގައުމުތަކަށް ގެންދިޔައީ ސަރުކާރުން ފްލައިޓުތައް ޗާޓާ ކޮށްގެންނެވެ.

ނަޝީދުގެ ޓުވީޓާ މެދު ކަންބޮޑުވުން

ރައީސް މުހައްމަދު ނަޝީދު މިއަދު ވަނީ ޔޫކްރެއިންގެ ހާލަތާ ގުޅޭގޮތުން ޓުވީޓެއް ކުރައްވައިފައެވެ. އެމަނިކުފާނުގެ ޓުވީޓުގައި ވަނީ ޔޫކްރެއިންއާއި ރަޝިޔާއަކީ ރާއްޖޭގެ ފަތުރުވެރިކަމުގެ އެންމެ ބޮޑު މާކެޓު ކަމަށާއި އެހެންކަމުން ހަނގުރާމައެއް ފަށައިފި ނަމަ އޭގެ ނޭދެވޭ އަސަރު ރާއްޖެއަށް ކުރާނެ ކަމަށެވެ.

މިޓުވީޓުގައި ޔޫކްރެއިންގައި ތިބި ދިވެހި ދަރިވަރުންގެ ހާލަތަށް އެޑްރެސްކޮށްފައި ނުވާތީ އެދަރިވަރުން ވަނީ ކަންބޮޑުވުން ފާޅުކޮށްފައެވެ. އެގޮތުން ބުނީ ދައުލަތުގެ އިސްފަރާތްތަކުގެ ވިސްނުން ހުރި ގޮތް މި ޓުވީޓުން އެކަނި ވެސް ދޭހަވެގެން ދާކަމަށެވެ.

ބައެއް ގައުމުތަކުގެ 4،000އަށް ވުރެ ގިނަ ދަރިވަރުން އެކީގައި އެގައުމުތަކުގެ ސަރުކާރުން ވަގުތުން އެވެކުއޭޓް ކުރިއިރު އަދަދުގެ ގޮތުން މަދު ރާއްޖޭގެ ދަރިވަރުން އެގައުމުން ބޭލުމަށް ސަރުކާރުގައި އާދޭސް ދަންނަންވަން ޖެހޭތީ ދަރިވަރުން ހިތާމަކުރާކަމަށް ވެސް ވަނީ ބުނެފައެވެ.

އާއިލާތަށް ފޮރިން މިނިސްޓްރީއަށް

ޔޫކްރެއިންގައި ތިބި ދިވެހި ދަރިވަރުންގެ އާއިލާތައް މިއަދު ހެނދުނު ވަނީ ފޮރިން މިނިސްޓްރީއަށް ގޮސް އަޑު އުފުލައިފައެވެ. އަދި ދަރިވަރުންނަށް އަޅައިނުލާކަމަށް ބުނެ އެ ފަރާތްތަކުން ވަނީ ކަންބޮޑުވުން ފާޅުކޮށްފައެވެ.

މައުލޫމާތު ލިބޭ ގޮތުގައި ފޮރިން މިނިސްޓްރީއަށް އެ އާއިލާތައް ވަނުމުން ފުލުހުންގެ އެހީގައި އެމީހުން ވަނީ މިނިސްޓްރީން ބޭރުކޮށްފައެވެ. މިނިސްޓްރީއަށް ދިޔަތާ އެތައް އިރެއް ފަހުން ވެސް އިސް ބޭފުޅުން ތިއްބެވީ ބައްދަލުވުމެއްގައި ކަމަށް ބުނެ ބޭތިއްބިކަމަށް އެ ބެލެނިވެރިން ބުނެއެވެ.