ދިވެހި ދަރިވަރުން އަދިވެސް ތިބީ ޔޫކްރެއިންގައި، އާޒިމް ހެއްދެވީ އިތުރުފުޅެއް

ޔޫކްރެއިންގައި ކިޔަވާ ދިވެހި ދަރިވަރުން އެ ގައުމުން އެހެން ގައުމުތަކަށް ގެންގޮސްފައިވާކަމަށް ވިދާޅުވެ އެމްޑީޕީގެ ޕާލަމެންޓަރީ ގްރޫޕުގެ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް ހެއްދެވީ އިތުރުފުޅެއްކަން ހާމަވެއްޖެއެވެ.

Ads by STELCO

ރަޝިޔާއާއި ޔޫކްރެއިނާ ދެމެދު އުފެދިފައިވާ މައްސަލަތައް ހޫނުވެ، ހަނގުރާމަ ފެށުމަށް ތައްޔާރީތައްވަމުންދާއިރު، ޔޫކްރެއިންގައި ތިބި ދިވެހި ދަރިވަރުން އެހެން ޤައުމަކަށް ބަދަލުކުރުމަށް ގޮވައިލާ ކުއްލި މައްސަލައެއް މިއަދު އޮތް ރައްޔިތުންގެ މަޖިލީހުގެ ޖަލްސާގައި ވަނީ ހުށަހަޅައިފައެވެ. އެ ކުއްލި މައްސަލަ ރައްޔިތުންގެ މަޖިލީހަށް ހުށަހެޅުއްވީ ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲއެވެ.

މި ކުއްލި މައްސަލައިގައި ޔޫކްރެއިންގައި ތިބި ދިވެހި ދަރިވަރުން ލަސްނުކޮށް އެގައުމުން ބޭލުމަށް ދިވެހި ސަރުކާރަށް ވަނީ ގޮވައިލައިފައެވެ. އެހެން ގައުމުތަކުން އެ ގޮތަށް އަމަލުކުރަމުން ދާކަމަށް ކުއްލި މައްސަލައިގައި ވަނީ ހާމަކޮށްފައެވެ.

މި މައްސަލަ ހުށަހެޅުއްވުމާ އެކު އަލީ އާޒިމް ވަނީ ނިޒާމީ ނުކުތާއެއް ނަންގަވައިފައެވެ. އެގޮތުން އޭނާ ވިދާޅުވީ މެމްބަރު ހުށަހެޅުއްވި ކުއްލި މައްސަލައިގައިވާ ކަންކަމަށް ހައްލު ގެނައުމުގެ މަސައްކަތް ދިވެހި ޚާރިޖިއްޔާއިން މިހާރު ވެސް ކުރަމުން އަންނަ ކަމަށާއި އެހެންކަމުން އެ މައްސަލައަށް ވޯޓަށް އެހިދާނެކަމަށް ވެސް އޭނާ ގަބޫލުނުކުރައްވާ ކަމަށެވެ. ޔޫކްރެއިންގައި ކިޔަވާ ދިވެހި ދަރިވަރުން މިހާރު ވެސް އެހެން ގައުމުތަކަށް ބަދަލުކޮށްފައިވާކަމަށް އާޒިމް ވިދާޅުވިއެވެ.

އާޒިމް މިފަދައިން ވިދާޅުވިއިރު ޔޫކްރެއިންގައި ކިޔަވާ ދިވެހި ދަރިވަރަކު "ދެން"އާ ވާހަކަދައްކަމުން ބުނީ އެ ދަރިވަރުން އަދިވެސް ތިބީ ޔޫކްރެއިންގައި ކަމަށެވެ. އަދި އެހެން ގައުމަކަށް ބަދަލުކުރަން އުޅޭ ފަދަ އެއްވެސް މައުލޫމާތެއް ސަރުކާރުގެ ކަމާ ބެހޭ އެއްވެސް އިދާރާއަކުން ފޯރުކޮށްދީފައި ނުވާކަމަށް އެ ދަރިވަރު ބުންޏެވެ.

ޓީވީތަކާއި ސޯޝަލް މީޑިއާގެ ވަސީލަތްތަކުން ވަގުތުން ދުރަށް ދައްކަމުން ދިޔަ މަޖިލިސް ޖަލްސާގައި އަލީ އާޒިމް އިތުރުފުޅު ހައްދަވައިފައިވާ އިރު، ޔޫކްރެއިންގައި ހަނގުރާމައިގެ ހާލަތު އިއުލާންކޮށްފައި އޮއްވައި ދިވެހި ދަރިވަރުން އެގައުމުގައި ތިބޭތީ އެ ދަރިވަރުންގެ ބެލެނިވެރިން އިއްޔެ ވަނީ ފޮރިން މިނިސްޓްރީއަށް ގޮސް ކަންބޮޑުވުން ވެސް ފާޅުކޮށްފައެވެ. އެހެން ނަމަވެސް ފޮރިން މިނިސްޓްރީގެ އެއްވެސް އޮފިޝަލަކު ބެލެނިވެރިންނާ ބައްދަލުކޮށްފައި ނުވާކަން ފާހަގަކޮށްލެވެއެވެ.

ޔޫކްރެއިންގައި ދިވެހި ދަރިވަރުންތަކެއް ތާށިވެފައި ތިބި މައްސަލައިގައި ނުތަނަވަސްކަން އިތުރުވަމުން ދިޔަ ނަމަވެސް ދައުލަތުގެ އެއްވެސް އިސް ބޭފުޅަކު މިމައްސަލައިގައި މިހައިތަނަށް ވާހަކަ ދައްކަވައިފައެއް ނުވެއެވެ. ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވިދާޅުވީ ކަންބޮޑުވެވަޑައިގަންނަވަނީ ޔޫކްރެއިން ރަޝިޔާ ހަނގުރާމައިގެ ސަބަބުން ރާއްޖޭގެ ފަތުރުވެރިކަމަށް އަސަރު ކޮށްފާނެތީ ކަމަށެވެ.

ޔޫކްރެއިންގައި ތިބި ގިނަ ދިވެހި ދަރިވަރުންނަކީ ޞިއްޙީ ދާއިރާއިން ކިޔަވާ ކުދީންނެވެ. މިހާރު ވެސް 50އަށް ވުރެ ގިނަ ދަރިވަރުން އެ ގައުމުގައި ތައުލީމު ހާސިލްކުރަން އެބަ ތިއްބެވެ. އެ ދަރިވަރުން ޔޫކްރެއިންގައި ތިބޭ ކޮމްޕްލެކްސްއަކީ ރަޝިޔާއާއި ގުޅޭ ބޯޑަރު ކައިރީގައި ހުންނަ ކޮމްޕްލެކްސްއެކެވެ. އެހެންކަމުން ހަނގުރާމައެއް ފަށައިފި ނަމަ އެންމެ ފުރަތަމަ އޭގެ އަސަރު ކުރާނީ ދިވެހިން ތިބި ސަރަހައްދަށެވެ.

ނިމިދިޔަ ހަފްތާ ބަންދުގައި ގިނަ ގައުމުތަކުން ވަނީ ޔޫކްރެއިންގައި ތިބި އެ ގައުމުތަކުގެ ރައްޔިތުން އެހެން ތަންތަނަށް ބަދަލުކޮށްފައެވެ. އެގޮތުން އިންޑިއާގެ4000 އަށް ވުރެ ގިނަ މީހުން ވަނީ އެތަނުން ބާލައިފައެވެ. އިންޑިއާ ސަރުކާރުން ވަނީ މިކަމަށް ޓަކައި ވަގުތުން ފްލައިޓުތަކެއް ޗާޓާ ކޮށްފައެވެ.