ސީޒަނަށް މަޑުނުކޮށް، ގްރޫޕް ހަދައިގެން އުމްރާއަށް ދެވޭ ޕެކޭޖްތަކެއް ޤިބްލައިން
ސީޒަންއަށް މަޑު ނުކޮށް، ގްރޫޕް ހަދައިގެން އުމްރާއަށް ދެވޭ ޕެކޭޖްތަކެއް ޤިބްލައިން ތަޢާރަފްކޮށްފިއެވެ.
ޤިބްލަ ކުންފުނިން ވިދާޅުވީ ޢުމްރާގެ އަޅުކަން އަދާކުރުމަށް ދިއުމަށް ރާއްޖޭގެ ޕްރައިވެޓް ސެކްޓަރއިން ފޯރުކޮށް ދެމުންދާ ޚިދުމަތް އައ ހަރުފަތަކަށް ގެންގޮސް ޚިދުމަތް ފުޅާކޮށް، ޚިދުމަތުގެ ފެންވަރު ރަނގަޅުކޮށް، ސީޒަނަލް ޢުމްރާތަކުގެ އިތުރުން ގޮތުން ގްރޫޕުން ޢުމްރާއަށް ދާ ދުވަހަކަށް އިންތިޒާރު ނުކޮށް ޢުމްރާ އަށް ދާން ބޭނުންވާ މީހާއަށް ވަގުތުވާއިރަކުން އޭނާއަށް ދެވޭ ގޮތަށް ޚިދުމަތްތައް ލިބޭނެ އިންތިޒާމު ޤިބްލަ ކުންފުނިން ފަހިކޮށްދޭން ނިންމައިފައިވާ ކަމަށެވެ.
އަދި ރަށުގައި ހުރެގެން އޮންލައިންކޮށް ވެބްސައިޓް ތެރެއިން ޢުމްރާއަށް ރެޖިސްޓަރ ވެވޭނެ އިންތިޒާމު ވެސް ފަހިކޮށްދިނުމަށް ނިންމައިފައިވާ ކަމަށާއި އެންމެ މުހިންމު އެއް ޚިދުމަތެއްގެ ގޮތުން ފަހިކޮށްދޭ ޚިދުމަތަކީ ވިސާ ޖަހައި ދިނުމުގެ ޚިދުމަތް ކަމަށް އެ ކުންފުނިން ވިދާޅުވިއެވެ. އެ ކުންފުންޏަކީ އަމިއްލައަށް ވިސާ ޖަހައިދިނުމުގެ ފުރުޞަތު ފަހިވެފައިވާ، އަޔާޓާގައި ރެޖިސްޓަރ ކުންފުންޏެއް ކަމަށް ވެސް ވިދާޅުވިއެވެ.
ކުންފުނިން ފަހިކޮށްދޭ ޕެކޭޖްތަކާއި ޚިދުމަތްތަކުގެ ތެރޭގައި ވީއައިޕީ ޢުމްރާ ޕެކޭޖް، ފެމިލީ ޕެކޭޖް، ޔޫތު ޕެކޭޖް، ސްޓޫޑެންޓް ޕެކޭޖް، އައިލެންޑް ޕެކޭޖް، ކޯޕަރޭޓް ޕެކޭޖް، ސީޒަނަލް ޢުމްރާ ޕެކޭޖް، އަދި ހަނީމޫންޓުއަރ ޕެކޭޖް ހިމެނެއެވެ.
ވީއައިޕީ ޚިދުމަތުގެ ޢުމްރާގެ އަޅުކަން އަދާކުރުމަށް ދިއުމަށް ކޮންމެ ފަރާތަކަށް ވެސް އެދެވިދާނެއެވެ. މި ޕެކޭޖުގައި ކަނޑައެޅިފައިވާ އަގުގައި ޢުމްރާގެ ޚިދުމަތަށް އެދޭ ކޮންމެ ފަރާތަކަށް ޚިދުމަތް ފޯރުކޮށްދެވޭނެއެވެ. މި ޚިދުމަތުގެ ދަށުން ޢުމްރާ ކުރާ ފަރާތްތައް ތިބޭނީ ޙަރަމްފުޅާ ވަރަށް ގާތުގައެވެ. އަދި އެތެރޭގެ ދަތުރުފަތުރުކުރުމުގައި ވެސް ފޯރުކޮށްދެވޭނީ ވީއައިޕީ ފެންވަރުގެ ޚިދުމަތެވެ.
ފެމިލީ ޕެކޭޖަކީ، ގިނަ މީހުންނާ ވަކިން ޢުމްރާ ކުރަން ދިއުމަށް ބޭނުންވާ ވަކިވަކި ޢާއިލާތަކަށް ދެވޭ ޚިދުމަތެކެވެ. މިޕެކޭޖުގައި ދަތުރުކުރަން ބޭނުންވާ ޢާއިލާއަކާ އެކު އެހެން ބަޔަކު ބައިވެރިނުވާނެއެވެ.
ޔޫތު ޕެކޭޖަކީ ޒުވާނުންނަށް ޚާއްޞަ ޢުމްރާ ޕެކޭޖެކެވެ. މި ދަތުރުގައި ޢުމްރާގެ އަޅުކަމުގެ އިތުރުން ޒުވާނުންނާ ގުޅޭ މަރުކަޒުތަކާއި އިސްލާމީ ތާރީޚީ ތަންތަނާއި ސްޕޯޓްސް ދާއިރާއާ ގުޅުންހުރި ތަންތަނަށް ޒިޔާރަތްކުރުމުގެ އިތުރުން ކީރިތި ރަސޫލާގެ ޒުވާން ޙަޔާތްޕުޅު ކިޔައިދިނުން ފަދަ ތަރުބަވީ ކަންކަން ވެސް ހިމެނޭނެއެވެ.
ސްޓޫޑެންޓް ޕެކޭޖަކީ ކިޔަވާ ކުދިންނަށް ޚާއްޞަ ތަރުބަވީ ޢުމްރާ ޕެކޭޖެކެވެ. މިޕެކޭޖްގައި ޢުމްރާ ކުރާ ކިޔަވާކުދިންނަށް ޢުމްރާގެ އަޅުކަމުގެ އިތުރުން މައްކާއާއި މަދީނާއާއި ޠާއިފްގެ އިސްލާމީ ބިނާތަކާއި ތާރީޚީ ތަންތަނާއި ކަންކަން ކިޔައިދެވޭނީ ފިލާވަޅުތަކެއް ގޮތަށް އެ ތަންތަނަށް ގޮސް ހަމަ ލޮލުން ތަންތަން ދެކޭ ޙާލުގައެވެ. މީގެ އިތުރުން ދެޙަރަމްފުޅުގެ އިސް ޢިލްމުވެރިންގެ ތެރެއިން ބޭފުޅުންނާ ނުވަތަ މައްކާ މަދީނާގެ ޢިލްމުވެރިންގެ ތެރެއިން ބޭފުޅުންނާ ބައްދަލުކޮށް އެބޭފުޅުންގެ ކިބައިން ފިލާވަޅު ލިބިގަނެވޭނެއެވެ. މި ޕެކޭޖްގައި ޚިދުމަތް ދެވޭނީ ޚާއްޞަ ރޭޓްތަކެއްގައެވެ.
އައިލެންޑް ޕެކޭޖަކީ ވަކި ރަށްރަށުގެ މީހުން ޢުމްރާއަށް ދިއުމަށް ކަނޑައެޅިފައިވާ ޕެކޭޖެކެވެ. މި ޕެކޭޖްގައި ވަކި ރަށެއްގެ މީހުން އެމީހުންނަށް ފަސޭހަ ދުވަސްވަރެއްގައި ޢުމްރާއަށް ދާން ބޭނުން ނަމަ އެކަން ފަހިކޮށްދެވޭނެއެވެ. އެ ދަތުރުގައި ދާނީ ހަމަ އެރަށެއްގެ މީހުން އެކަންޏެވެ.
ކޯޕަރޭޓް ޕެކޭޖަކީ އޮފީސްތަކާއި ކުންފުނިތަކުގެ މުވައްޒަފުން ޢުމްރާގެ އަޅުކަން އަދާކުރުމަށް ހަމަޖެހިފައިވާ ޕެކޭޖެކެވެ. މި ޕެކޭޖްގެ ދަށުން ޚާއްޞަ ރޭޓްތަކެއްގައި އޮފީސްތަކާއި ކުންފުނިތަކުގެ މުވައްޒަފުންނަށް ޚިދުމަތް ފޯރުކޮށްދެވޭނެެއެވެ.
ސީޒަނަލް ޢުމްރާ ޕެކޭޖަކީ، ބަރަކާތްތެރި ރަމަޟާންމަހާއި، އެ ނޫން މޫސުމްތަކުގައި ނުވަތަ އަހަރީ ޗުއްޓީތަކުގައި ޢުމްރާއަށް ދާން ބޭނުންވާ ފަރާތްތަކަށް ޚާއްޞަ ކުރެވޭ ޕެކޭޖެކެވެ.
ހަނީމޫން ޓުއާއަކީ، ހަނީމޫންގެ ދުވަސްތަކުގައި މައްކާ މަދީނާއަށް ޒިޔާރަތްކުރުމާއި ސަޢޫދީ ޢަރަބިއްޔާގެ އެކި ތަންތަނަށް ޒިޔާރަތްކުރުމާއިި، ޢުމްރާގެ އަޅުކަން ވެސް އަދާކޮށް، މައްކާ މަދީނާގައި ދުވަސްތައް ހޭދަކޮށްލަން ބޭނުންވާ ނަމަ އެކަން ވެސް ފަހި ވާގޮތައް ޚާއްޞަ ކުރެވިފައިވާ ޓުއާއެކެވެ. ދަތުރުގެ އެންމެހައި ކަންކަމެއް ޚިދުމަތަށް އެދޭ ފަރާތްތަކުން ބޭނުންވާ ފެންވަރުގައި ކުންފުނީގެ ފަރާތުން މެނޭޖްކުރާނެއެވެ.
