ގެވެށި ގުޅުން ރަނގަޅު މާހައުލުގައި އުޅޭ ކަނބަލުން އެހެން މީހުންނަށް އެހީވާންޖެހޭ: ފަޒްނާ

ގެވެށި ގުޅުން ރަނގަޅު މާޙައުލަކުން ވަޑައިގެން މަސައްކަތްކުރަމުންގެންދަވާ ކަނބަލުން އެ ބޭފުޅުންނާ އެކު މަސައްކަތްކުރާ އެހެން ބޭފުޅުންނަށް އެއްބާރުލުމާއި އެހީތެރިކަން ދެއްވުމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު އެދިވަޑައިގެންފިއެވެ.

Ads by Hajj Corporation

އެކަމަނާ މިކަމަށް އެދިވަޑައިގެންނެވީ "ގެވެށީ ގުޅުން" ކެންޕޭނުގެ ދަށުން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ތައްޔާރުކޮށް ނެރުނު މަޖައްލާ "ސާސްތުރަ" ނެރެދެއްވައި ވާހަކަފުޅު ދައްކަވަމުންނެވެ.

ފަޒްނާ ވިދާޅުވީ ސްކޫލްތަކުގައި އިސްދައުރެއް އަދާކުރެއްވި އިރު، ގޭތެރޭގެ މިފަދަ ދަތިތަކާ ކުރިމަތިލައިފައިވާ މުވައްޒަފުން ހިއްސާ ކުރައްވައިފައިވާ ވާހަކަތައް އަޑުއެހުމުން ކުރެވުނު ތަޖުރިބާގެ އަލީގައި މިކަމުގެ މުހިންމުކަން އެންގިވަޑައިގެންފައިވާ ކަމުގައެވެ.

އެކަމަނާގެ ވާހަކަފުޅުގައި "ގެވެށިގުޅުން" ކެންޕެއިން ގެ މައްޗަށް އަލިއަޅުއްވައިލައްވައި ވާހަކަފުޅު ދައްކަވަމުން ގެވެށި ގުޅުން މުހިންމުވާ އެއް ސަބަބަކީ ހުރިހާކަމެއް ވެސް ފެށެނީ ވެސް އަދި ނިމެނީ ވެސް ގެއާ ހިސާބުންކަމަށް ވުމުން ކަމުގައި ވިދާޅުވިއެވެ. އަދި ހަދާ ޤާނޫނުތަކާއި ޤަވާޢިދުތަކުން ވެސް އެދެވޭ މުހިންމު ބަދަލެއް އަންނާނީ، އަޑުއެހުމުގެ މުހިންމުކަމުގެ އަގުވަޒަންކުރާ، ބަދަހި ގެވެށި ގުޅުމެއްގެ ތެރެއިންކަން ފާހަގަ ކުރެއްވިއެވެ. ހަމައެއާ އެކު، އޯގާތެރިކަމާއި އަޅައިލުމަކީ ހަމައެކަނި އަންހެން މީހާގެ ޒިންމާއެއް ނޫން ކަމަށާއި ގޭގައި އުޅޭ ކޮންމެ މީހެއްގެ ވެސް ދައުރެއް އެ ކަމުގައި އޮންނަން ވާނެކަން ގަބޫލުކުރަންޖެހޭކަން ފާހަގަކުރެއްވިއެވެ. ހަމައެހެންމެ ގޭގައި އަންހެނުން އަދާކުރާ ދައުރު ފިރެހެނުން ބަލައިގަނެ އެކަމުގައި ބައިވެރިވާން ޖެހޭނެކަމަށް ވެސް އެކަމަނާ ވިދާޅުވިއެވެ.

ސާސްތުރަ" މަޖައްލާ އިފްތިތާޙުކުރުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ބައިވެރިވެވަޑައިގެންނެވުން

އެކަމަނާ ވިދާޅުވީ " ގެވެށިގުޅުން" ކެމްޕޭނުގެ ސަބަބުން ގިނަބަޔަކު ހޭލުންތެރިވެ ގިނަ ބަޔަކަށް އޭގެ ފައިދާ ލިބިގެންދާނެކަމަށް ދެކެވަޑައިގަންނަވާ ކަމަށެވެ. އަދި އަޅުގަޑުމެން މިއެދޭ ހަގީގީ އަދި މާނަ ހުރި ބަދަލަކަށް ވާޞިލުވެވޭނީ ހަރުދަނާ ގެވެށި ގުޅުމެއްގެ ތެރެއިންކަމަށް ވިދާޅުވިއެވެ.

މިކެމްޕޭނުގެ ދަށުން ނެރުނު "ސާސްތުރަ" މަޖައްލާއަކީ ގެވެށި އަނިޔާއިން ރައްކާތެރިވެފައިވާ މުޖުތަމަޢުއެއް ބިނާކުރުމަށް މަގުފަހިކުރުމުގެ ގޮތުން 2020ވަނަ އަހަރު ފެށި މަސައްކަތުގެ ތެރޭގައި ތައްޔާރުކުރި މަޖައްލާއެކެވެ. މި މަޖައްލާގައި ގެވެށި އަނިޔާއަށް ހޭލުންތެރިކުރުމަށް ލިޔެފައިވާ އާޓިކަލްތަކުގެ އިތުރުން ގެވެށި ގުޅުން ބަދަހިކުރުމުގެ މުހިންމުކަމާއި، ގެވެށި ގުޅުން ބަދަހިކުރުމަށް ކުރެވޭނެ ކަންކަމާ ގުޅޭ މަޢުލޫމާތު އެކުލެވޭ އާޓިކަލް ހިމަނައިފައިވެއެވެ. މީގެ އިތުރުން، ގެވެށި އަނިޔާއާ ގުޅުންހުރި މުހިންމު ބައެއް ސުވާލާއި އަދި އޭގެ ޖަވާބު، ގެވެށި އަނިޔާ ލިބޭ ފަރާތްތަކަށް ރާއްޖެއިން ލިބެން ހުރި ޚިދުމަތްތަކާ ގުޅޭ މަޢުލޫމާތު މި މަޖައްލާގައި ހިމެނެއެވެ.