ކެންޕެއިނާ ދިމާކޮށް އެމްޑީޕީގެ މެންބަރުންނަށް ވަޒީފާގެ ބިރު ދައްކާކަމުގެ ތުހުމަތު
މި އަންނަ އޭޕްރީލް މަހު 16ވަނަ ދުވަހު އޮންނަ އެމްޑީޕީގެ އެތެރޭގެ އިންތިޚާބާ ދިމާކޮށް، ސަރުކާރުގެ ފަރާތްތަކުން ވަކި ކެނޑިޑޭޓަށް ތާއީދު ކުރުމަށް މަޖުބޫރުކޮށް، ނުކޮށްފި ނަމަ ވަޒީފާއިން ވަކިކުރާނެ ކަމުގެ ބިރު ދައްކަމުން އަންނަ ކަމަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި)ގެ ޓީމުން ވިދާޅުވެއްޖެއެވެ.
މި އިންތިޚާބުގައި އިންތިއާ ދެން ވާދަ ކުރައްވަނީ ސަރުކާރުގެ ނުފޫޒު ގަދަ މިނިސްޓަރެއް ކަމަށްވާ ފައްޔާޒް އިސްމާއީލެވެ.
މި އިންތިޚާބާ ދިމާކޮށް ހުރި ޝަކުވާތައް ހިއްސާ ކުރުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި އިންތިގެ ކެންޕެއިން ޓީމުގެ ތަރުޖަމާނު އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) ވިދާޅުވީ، ވަޒީފާގެ ބިރު ދެއްކުމަކީ އެމްޑީޕީގެ ހަމައެއް ނޫން ކަމަށާއި ރީތި ކެންޕެއިނެއް ކުރެއްވުމަށް ގޮވައިލާ ކަމަށެވެ.
"އެމްޑީޕީން އަބަދުވެސް ދައްކަމުން އައި ވާހަކައެއް އެއީ ބިރު ފަހަނައަޅާ ދިއުމާއި ހާސްކަން ނެތުން" ވައްޑެ ވިދާޅުވީ، އެންމެ މީހަކަށް ދައްކާ ބިރެއްގެ ސަބަބުން އިތުރު 100 މީހުން އެކަމާ ނުރުހުންވެ، ދެން އޮތް މަގަކުންދާނެ ކަމަށެވެ.
ވައްޑެ މިފަދައިން ކަންބޮޑުވުން ފާޅު ކުރައްވާފައިވާ އިރު، އެމްޑީޕީގެ ވަޓްސްއަޕް ގްރޫޕަކަށް ފޮނުއްވި މެސެޖެއްގައި ރައީސް ނަޝީދު ވަނީ ، އިންތިހާބާ ދިމާކޮށް ރައީސުލްޖުމްހޫރިއްޔާގެ ބާރުތައް ނާޖާއިޒް ގޮތުގައި ބޭނުންކުރައްވާ ކަމަށް ވިދާޅުވެފައެވެ.
