ކުރެންދޫން 250 މީހުން ޕީޕީއެމްއާ ގުޅިއްޖެ
ޅ. ކުރެންދޫން 250 މީހުން އިދިކޮޅު ޕީޕީއެމްއާ ގުޅިއްޖެއެވެ.
އެ ރަށުން ޕީޕީއެމްއާ އަލަށް ގުޅުނު މީހުންގެ ފޯމުތަކާ މިއަދު ހަވާލުވެވަޑައިގަތީ އިދިކޮޅު ލީޑަރ އަދި ކުރީގެ ރައީސް އަބްދުﷲ ޔާމީން އަބްދުލްޤައްޔޫމެވެ.
ރައީސް ޔާމީން ކުރެންދުއަށް މިއަދު ވަޑައިގަތީ، ކުރެންދޫ ކައުންސިލު ރައީސަކު ހޮވުމަށް އަންނަ ހޮނިހިރު ދުވަހު ބާއްވާ އިންތިހާބުގައި ޕީޕީއެމްގެ ފަރާތުން ވާދަ ކުރައްވާ އިސްމާއިލް މަދީހަށް ތާއީދު ހޯދުމަށެވެ. މަދީހު ވަނީ މީގެ ކުރިން ވެސް ކުރެންދޫ ކައުންސިލުގެ ރައީސްކަން ކުރައްވައިފައެވެ.
އިދިކޮޅު ޕީޕީއެމްއާ މިއަދު ގުޅުނު މީހުންގެ ތެރޭގައި، ސަރުކާރު ހިންގާ އެމްޑީޕީގެ ބައެއް މެންބަރުން ވެސް ހިމެނެއެވެ. ކުރެންދޫ ޕީޕީއެމް ޓީމުން ބުނީ، އެ ރަށުން ގިނަ އަދަދެއްގެ މީހުން ޕީޕީއެމްއާ ގުޅުމަކީ ކުރިއަށް އޮތް އިންތިޚާބުތަކުގައި ޕީޕީއެމްއަށް ކުރެންދޫން ކާމިޔާބު ހޯދުމަށް ލިބިގެންދިޔަ ބޮޑު ހިތްވަރެއް ކަމަށެވެ.
މަދީހުއަށް ތާއީދު ހޯދުމަށް ރައީސް ޔާމީން މިއަދު ކުރެންދުއަށް ވަޑައިގެންފައިވާއިރު، އެ ގޮނޑިއަށް އެމްޑީޕީގެ ފަރާތުން ވާދަކުރާ ކެންޑިޑޭޓް އަލީ ނަސީމްއަށް ތާއީދު ހޯދުމަށް އެ ޕާޓީގެ ރައީސް މުހައްމަދު ނަޝީދު ވެސް މިވަގުތު ހުންނެވީ ކުރެންދޫގައެވެ.
Ads by STO
