ޢަލީ ޚާލިދަށް ޕީ.އެސް.އެމްއެއް ނުހިންގުނު: މެމްބަރު ނިހާދު
ޕަބްލިކް ސާވިސް މީޑިއާ، ޕީ.އެސް.އެމްގެ މިހާރުގެ މެނޭޖިންގ ޑިރެކްޓަރު އަލީ ޚާލިދަށް ޕީ.އެސް.އެމް ނުހިންގުނު ކަމަށް ބުުނެ ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުޙައްމަދު ނިޙާދު އަލީ ޚާލިދަށް ފާޑު ވިދާޅުވެއްޖެއެވެ.
ކަންކަން ވަރަށް ބޮޑަށް ދޯދިޔާވެފައިވާ ދައުލަތުގެ މީޑިއާގެ އެންމެ އިސް މަޤާމުގައި ހުންނެވި އަލީ ޚާލިދާ ގުޅޭ ގޮތުން މެމްބަރު ނިހާދު ކުރެއްވި ޓުވީޓެއްގައި ވިދާޅުވީ، އަލީ ޚާލިދު ޕީ.އެސް.އެމް ހިންގަން ނޫޅޭ ކަމަށާއި އުޅެނީ ސަރުކާރާއި ރައްޔިތުންނާއި އަދި މުވައްޒަފުންނާ ޖައްސަން ކަމަށެވެ.
މި ސަރުކާރުން ޕީ.އެސް.އެމް ހިންގުން އަލީ ޚާލިދާ ހަވާލު ކުރެއްވި ފަހުން އެ ތަނުގެ ހާލަތު ވަނީ ވަރަށް ބޮޑަށް ގޯސްވެފައެވެ. މިގޮތުން މުވައްޒަފުންނަށް ދޭން ޖެހޭ މުސާރައިގެ މައްސަލަތަކުގައި އެތަނުގެ ގިނަ އަދަދެއްގެ މުވައްޒަފުން ވަޒީފާއާ ބެހޭ ޓްރައިބިއުނަލްއަށް މިހާރު މައްސަލަ ހުށައަޅައިފައިވާއިރު، އެތަނުގައި ގިނަ ދުވަސްވީ މުވައްޒަފުން ވެސް ވަނީ މަޤާމުން ދުރުވެފައެވެ.
މީގެ އިތުރުން ޓީ.ވީ.އެމްއިން ރަނގަޅު ޕްރޮގުރާމްތައް ނުގެންނަކަމަށް ބުނެ ގިނަ އާއްމުން ވެސް ވަރަށް ބޮޑަށް ފާޑު ކިޔާކަން ފާހަގަކޮށްލެވެއެވެ. ހާއްސަކޮށް މިދިޔަ އަހަރުގެ ނަސްރުގެ ދުވަހާ ދިމާކޮށް ޕީ.އެސް.އެމުން އެއްވެސް ކަހަލަ ހާއްސަ ޕްރޮގުރާމެއް ގެނެސްދިނުމަށް ހަމަޖައްސައިފައި ނުވުމުން ގިނަ ބަޔަކު ވަނީ ޕީ.އެސް.އެމަށް ފާޑު ކިޔައިފައެވެ.
