ޢާންމުން ނުކުމެ ޤާނޫނު ތަންފީޒުކުރާ ކުރުން ހުއްޓުވަންޖެހޭ: ޝަމީމް

ޢާންމުން ނުކުމެ ޤާނޫނު ތަންފީޒުކުރާތީ ވަރަށް ކަންބޮޑުވާކަމަށް ޕްރޮސެކިއުޓާ ޖެނެރަލް ޙުސައިން ޝަމީމް މިއަދު ވިދާޅުވެއްޖެއެވެ.
ރައްޔިތުން މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީގައި ވާހަކަދައްކަވަމުން ޝަމީމް މިއަދު ވިދާޅުވީ ޢާންމުން ނުކުމެ ޤާނޫނު ތަންފީޒުކުރާ މައްސަލައާމެދު ކަންބޮޑުވާ ކަމަށާއި, އެ މައްސަލަ މިހާރު ނުހުއްޓުވައިފިނަމަ ވަރަށް ބޮޑު މައްސަލައަކަށްވެގެންދާނެ ކަމަށެވެ. އަދި އެއީ އެއް ގޮތަކަށް ވެސް ހުއްދަކުރެވިގެންވާނެކަމެއް ނޫން ކަމަށް ވެސް އޭނާ ވިދާޅުވިއެވެ.
''އަޅުގަނޑު ވަރަށް ކަންބޮޑުވާކަމެއް ޢާންމުން ނުކުމެ ޤާނޫނު ތަންފީޒުކުރާ ކުރުން. މިހާރު އެޑްރެސް ނުކޮށްފިއްޔާ ވަރަށް ބޮޑު އިޝޫއަކަށް ވަރަށް ބޮޑު މައްސަލައަކަށްވާނެ ކަމެއް. މީ އެއްގޮތަކަށް ވެސް ހުއްދަކުރެވިގެންވާނެކަމެއް ނޫން. ދޫކޮށްލެވިގެންވާނެކަމެއް ވެސް ނޫން. އެ ސިސްޓަމް ތެރެއިން ފިޔަވަޅު އަޅަންވާނީ. އަޅުގަނޑަށް އެނގޭ ސިސްޓަމްތެރެއިން ފިޔަވަޅު އެޅުން ލަސްވާތީކަން މީހުންގެ ފްރަސްޓްރޭޝަން އަންނަނީ.''
ޝަމީމް ވިދާޅުވީ މިއީ ހައްލެއް ހޯދަންޖެހޭ ކަމެއް ކަމަށެވެ. އަދި މައްސަލަތަކުގައި ޕީޖީއަށް ދަޢުވާކުރެވިދާނެ ކަމަށާއި, އެކަމަކު ނަތީޖާ ފެންނާނީ ކޯޓުން މައްސަލަ ނިމޭ ވަރަކުން ކަމަށެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.