ކުޅުދުށްފުށްޓާއި އައްޑޫގައި އާސަންދަ ޑެސްކެއް ޤާއިމުކޮށްފި
ހދ.ކުޅުދުށްފުށީ ރީޖަނަލް ހޮސްޕިޓަލާއި, އައްޑޫ ސިޓީ އިކުއަޓޯރިއަލް ހޮސްޕިޓަލުގައި އާސަންދަ ޚިދުމަތަށް ޚާއްސަ ޑެސްކެއް ޤާއިމުކޮށްފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ސަރުކާރުގެ ފަރާތުން މިކަން ހާމަކުރެއްވީ ރައީސް އޮފީހުގެ ތަރުޖަމާނު މިއުވާން މުޙައްމަދެވެ.
މިއުވާން ވިދާޅުވީ މިއީ ރައްޔިތުން ވަރަށް އެދެމުންދިޔަ ޚިދުމަތެއް ކަމަށާއި, މި ޚިދުމަތް ތަޢާރަފުކުރުމާ ގުޅިގެން ރައްޔިތުންނަށް ލުއިފަސޭހަތައް ލިބިގެންދާނެ ކަމަށެވެ. އަދި މިއަދުން ފެށިގެން އެ ދެ ޑެސްކުން އާސަންދައިގެ ކަންކަން ހަމަޖެއްސޭނެ ކަމަށާއި, މާލޭގައި ހުންނަ އާސަންދައިގެ މައި އޮފީހަށް ހުށަހަޅައި ދެން އިންތިޒާރުކުރަން ނުޖެހޭނެ ކަމަށެވެ.
މިއުވާން ވިދާޅުވީ ސަރުކާރުގެ އަމާޒަކީ މުޅި ރާއްޖެއަށް އެ ޚިދުމަތް ފުޅާކުރުން ކަމަށެވެ.
ކުރީގެ ރައީސް މައުމޫން ޢަބްދުލްޤައްޔޫމުގެ ޒަޢާމަތުގައި އެކުލަވައިލި ސިއްހީ ނިޒާމު ''މަދަނަ'' އަށް ބަދަލުތަކެއް ގެނެސް ''އާސަންދަ'' އަށް ބަދަލުކުރީ ކުރީގެ ރައީސް މުޙައްމަދު ނަޝީދުގެ ދައުރުގައެވެ. އޭގެފަހުން ''ހުސްނުވާ އާސަންދަ'' އިގެ ނަމުގައި ސްކީމަށް އިތުރު ބަދަލުތަކެއް ގެނައީ ރައީސް ޔާމިން ޢަބްދުލްޤައްޔޫމުގެ ދައުރުގައެވެ.
އާސަންދަ ޚިދުމަތް ހޯދުމުގައި ބައެއް ފަހަރު ތަކުލީފުތަކާ ކުރިމަތިލާން ޖެހުނަސް, އެ ޚިދުމަތުގެ ސަބަބުން ގިނަ ބައެއްގެ ދިރިއުޅުމަށް އުފާވެރިކަން ލިބިދީފައިވާކަން ފާހަގަކޮށްލެވެއެވެ.
