ޝައިޚް ފަޟްލޫން މުޙައްމަދު އަލުން ބަންދުކުރުމާމެދު މިއަދު ގޮތެއް ނިންމަނީ
ބައިނަލްއަޤްވާމީ ޔޯގާ ދުވަސް ފާހަގަކުރަން މިދިޔަ ޖޫންމަހުގެ 21 ވަނަ ދުވަހު ގަލޮޅު ދަނޑުގައި ބޭއްވި ހަރަކާތް ކުރިއަށްދިޔަ ވަގުތު ބަޔަކު އެ ތަނަށް ވަދެ ހިންގި ހަމަނުޖެހުމާ ގުޅިގެން ހައްޔަރުކުރި ޝައިޚް ފަޟްލޫން މުޙައްމަދު އަލުން ބަންދު ކުރުމާމެދު މިއަދު ގޮތެއް ނިންމަން ހައިކޯޓުން ތާވަލުކޮށްފިއެވެ.
ކްރިމިނަލް ކޯޓުން ޝައިޚް ފަޟްލޫން ދޫކޮށްލީ ޝަރުތުތަކެއް ކުރުމަށްފަހުއެވެ. އެ ގޮތުން މާލެއިން އަދި ރާއްޖެއިން ބޭރަށްދާނަމަ ކޯޓަށް އެންގުމަށާއި, އެޑްރެހާއި ފޯނު ނަންބަރު ބަދަލުވެއްޖެނަމަ އެކަން ވެސް އެންގުމަށާއި, ފުުލުހުންގެ ތަޙްޤީޤަށް އެއްބާރުލުން ދިނުމަށް ވަނީ އަންގާފައެވެ.
ޝައިޚް ފަޟްލޫން ބަންދުން ދޫކޮށްލަން ކްރިމިނަލް ކޯޓުން ކުރި ޢަމުރުގެ އިސްތިއުނާފު ޝަރީޢަތް ހައިކޯޓުގައި ފެށީ މި މަހުގެ 15 ގައެވެ.
މި މައްސަލައިގައި ޙުކުމް ކުރުމަށް މިއަދު 12:45 އަށް ވަނީ އަޑުއެހުމެއް ތާވަލުކޮށްފައެވެ.
ޔޯގާ ހަމަނުޖެހުމާ ގުޅިގެން ގިނަ ބަޔަކު ހައްޔަރުކުރިއިރު ޝައިޚް އާދަމް ނިޝާން ވެސް ހައްޔަރުކުރިއެވެ.
