އައިބޭގައި ސައިކަލެއް ވިއްކާކަމަށް ބުނެ އޮޅުވައިލައި މީހަކު އަތުން ފައިސާނެގި މީހަކު ބޮޑު އަދަދަކުން ޖޫރިމަނާކޮށްފި
އައިބޭގައި ސައިކަލެއް ވިއްކާކަމަށް އިސްތިހާރުކޮށް, އޮޅުވާލައިގެން އަންހެނަކު އަތުން ފައިސާ ހޯދި މީހަކަށް ކްރިމިނަލް ކޯޓުން ހުކުމްކޮށްފިއެވެ.
މި މައްސަލައިގައި 09 މަހާއި 18 ދުވަހުގެ މުއްދަތަށް ޖަލަށްލުމަށް ޙުކުމްކުރީ މއ.ސީނުމާ, އިސްމާޢީލް ޢާމިރު ކިޔާ މީހެއްގެ މައްޗަށެވެ.
އޭނާގެ މައްޗަށް އުފުލި މަކަރާއި ހީލަތް ހެދުމުގެ ކުށުގެ ދަޢުވާގައި ވަނީ ރާއްޖޭގެ އޮންލައިން ވިޔަފާރިކުރާ ވެބްސައިޓެއްކަމަށްވާ އައިބޭގައި ''ޒެސީ'' ގެ ނަމުގައި ހުޅުވާފައިވާ އެކައުންޓަކުން 15000 ރުފިޔާއަށް ސައިކަލެއް ވިއްކުމަށް 2016 ވަނަ އަހަރުގައި ޢާމިރު އިސްތިހާރެއް ޖެހި ކަމަށާއި, ސ.ހިތަދޫ/ސިޓީލައިޓް ދިމްނާ އަޙްމަދު އެ ސައިކަލު ގަތުމަށް ޝައުގުވެރިކަން ފާޅުކުރުމުން އޭނާއަށް ސައިކަލު ވިއްކާނެކަމުގެ ތަސައްވުރެއް އުފައްދައިގެން އޭނާގެ އަތުން ޢާމިރު 15000 ރުފިޔާ އަތުލި ކަމަށެވެ. ރުފިޔާ ފޮނުވުމަށްފަހު ދިމްނާ އެދުނީ ރަށަށް ފޮނުވުމަށް ބޯޓަށް ސައިކަލު އަރުވައިދިނުމަށެވެ. ނަމަވެސް ސައިކަލު އެރުވިކަމަށް ބުނެ ޢާމިރު ވަނީ މަކަރު ހަދައިފައެވެ.
ޢާމިރުގެ މައްޗަށް ޖަލަށްލުމުގެ އަދަބު ކަނޑައެޅި ނަމަވެސް އަދަބު ލުއިކޮށް ޖޫރިމަނާއަކަށް ބަދަލުކުރިއެވެ. އެ ގޮތުން ޖޫރިމަނާގެ ގޮތުގައި 56,600 ރުފިޔާ އިއްޔެއިން ފެށިގެން ހަ މަސްތެރޭގައި މީރާއަށް ދެއްކުމަށް ކޯޓުން ވަނީ އަންގާފައެވެ.
