ބަޖެޓް 2023: ތަޢުލީމީ ދާއިރާއަށް މިހާތަނަށް ކަނޑައެޅި އެންމެ ބޮޑު ބަޖެޓް

ތަޢުލީމާއި މަތީ ތަޢުލީމުގެ ދާއިރާއަށް މިހާތަނަށް އެންމެ ބޮޑު ބަޖެޓެއް ކަނޑައަޅާފައިވަނީ 2023 ވަނަ އަހަރުގެ ބަޖެޓުގައިކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

Ads by Sosun Fihaara

އަންނަ އަހަރަށް ދަޢުލަތުން ހުށަހަޅާފައިވާ ބަޖެޓުގައި ތަޢުލީމީ ދާއިރާއަށް އެކަނިވެސް 4.6 ބިލިއަން ރުފިޔާ ކަނޑައަޅާފައިވެއެވެ.

މިނިސްޓަރ ވިދާޅުވީ މިއަހަރުގެ މޭމަހުން ފެށިގެން ހިނގަމުންދާ ޕޭ ހާމަނައިޒޭޝަންގެ އިންޤިލާބީ ހެޔޮ އަސަރު ތަޢުލީމީ ދާއިރާއަށް ކުރަމުންދާކަމަށެވެ. އަދި މިއީ ޓީޗަރުންގެ ފެންވަރު ރަނގަޅު ކުރުމަށް އެޅުނު ބިންގަލެއްކަމަށާއި، ޓީޗަރުންގެ ފެންވަރު ރަނގަޅުކުރުމަކީ ތައުލީމީ ޖީލެއް ބިނާކުރުމުގެ އެއް އަސާސްކަން މިނިސްޓަރ ފާހަގަކުރެއްވިއެވެ.

“ތޫނުފިލި، އުފެއްދުންތެރި އިލްމީ ޖީލެއް ބިނާ ކުރުމަކީ މި ސަރުކާރުން ކުރާ އެންމެ މުހިންމު އެއް އިންވެސްޓްމެންޓް.  ސަރުކާރުގެ ދިގުރާސްތާ އަމާޒަކީ އަކިއްލަ ފަސްގަނޑުގައި ތިބެގެން ފެންވަރު ރަނގަޅު ތަޢުލީމު ހާސިލްކުރެވޭނެ މަގު ކޮންމެ ދަރިވަރަކަށްވެސް ފަހިކޮށްދިނުން” އަމީރު ވިދާޅުވިއެވެ.

އަމީރު ވިދާޅުވީ ޓީޗަރުންގެ މުސާރައިގެ އޮނިގަނޑަށް ގެނައި ބަދަލަކީ، ރަށްރަށުގައި ވަޒީފާ އަދާކުރުމަށް ޕްރިންސިޕަލުންނާއި ޓީޗަރުންނަށްވެސް ލިބޭނެ އިތުރު ބާރަކަށްވެގެންދާނެކަމަށްވެސް މިނިސްޓަރ އަމީރު ވިދާޅުވިއެވެ.

”ތަޢުލީމާއި މަތީ ތަޢުލީމުގެ ދާއިރާއަށް މިހާތަނަށް ދެވޭ އެންމެ ބޮޑު ޖާގަ ކަނޑައެޅިގައިވަނީ މި ބަޖެޓުގަ، 4.6 ބިލިއަން ރުފިޔާ މި ދާއިރާއަށް ކަނޑައަޅާފައިވާނެ” އަމީރު ވިދާޅުވިއެވެ.