އެހީ ރިޕޯޓު: ފިޓު ޖެހޭކަން ބޭރުފުށުން ނޭނގޭ ކުޑަކުޑަ ހުޒެއިލް، އެވޭނުން ސަލާމަތް ކޮށްދެއްވުމަށް އެހީއެއް ވެދެއްވާ!
ކޮންމެ މީހަކު ވެސް އެމީހެއްގެ ދަރިން ދުޅަހެޔޮ ސިއްޙަތެއްގައި ތިބެން ބޭނުން ވާނެއެވެ. ދަރިންނަށް އެންމެ ހެޔޮގޮތް މެދުވެރިވުމަށް އެންމެ ބޮޑަށް އެދޭނީ ވެސް އެކުދިންގެ މައިންބަފައިން ކަމާއިމެދު އެއްވެސް ޝައްކެއް ނެތެވެ. ނަމަވެސް ކޮންމެ ކުއްޖަކީ އުފަންވާއިރު އެންމެ ރަނގަޅު ސިއްހަތެއްގައި އުފަންވާ ކުއްޖެއް ނޫނެވެ. ބައެއް ކުދިންނަށް ސިއްޙީ ގޮތުން އެތައް މައްސަލަތަކަކާއި ކުރިމަތިވާއިރު، އަޅުގަނޑުމެންގެ މިކުޑަ ރާއްޖޭގައި އެފަދަ ބަލިތަކަށް ބޭސް ކުރެވޭނެ ފުރިހަމަ ސިއްޙީ ނިޒާމެއް ނެތުމަކީ ހިތާމަހުރި ކަމެކެވެ.
އެފަދަ ވޭނެއް ތަޙައްމަލު ކުރަމުންދާ އެއް ކުއްޖަކީ އުމުރުން އެންމެ ހަތަރު އަހަރުގެ (މިއަހަރު ފަސް އަހަރު ފުރޭ) ހުޒެއިލް ބިން ޙޫދު އަބްދުލްޣަފޫރެވެ. އެކުއްޖާ އުފަންވީއިރު ވެސް ސިކުނޑީގައި ލޯވަޅެއް އުފެދިފައިވާ ކަމަށް "ދެން" އަށް މައުލޫމާތު ދެމުން އޭނާގެ މަންމަ ވަފާ އަބްދުﷲ ވަނީ ބުނެފައެވެ.
"ދަރިފުޅު އުފަންްވީއިރު ވެސް ސިކުނޑީގައި ލޯވަޅެއް އިނދޭ. އެކަމަކު ފިޓު ޖެހެން ފެށީ ހަތަރު އަހަރު ފުރުނު ފަހުން (މިދިޔަ އަހަރު). ފަހަކަށް އައިސް ވާން ފެށިގޮތަކީ، ފިޓު ޖެހޭއިރު ދަރިފުޅު ހަމަ އެއްކޮށް ހަރަކާތް ހުއްޓި، ހަރުދަނޑި ވަނީ. ދެ ލޯ ވެސް ހުންނަނީ ކަޅިއަރާފަ. އެކަމާއި މިކޮޅުން ވެސް ޑޮކްޓަރަށް ދެއްކިން. އެކަމަކު ރަނގަޅު ނުވެގެން، މިއަހަރުގެ ފެބްރުއަރީގައި އިންޑިއާ އަށް ގޮސް ޑޮކްޓަރަށް ދެއްކިން. އީއީޖީ އެއް ނެގުމަށްފަހު ޑޮކްޓަރު ބުނީ ފިޓު ޖެހުނީމަ ބޭރުފުށުން އޭގެ އަސަރެއް ނުކޮށް އެތެރެއިންނޭ އެވޭން އަޅަނީ. އެހެންވެއޭ ކުއްޖާ އެގޮތަށް ހަރުދަނޑި އަރަނީ." ވަފާ ކިޔައިދިނެވެ.
ހުޒެއިލްގެ ބައެއް ސިއްޙީ ރިޕޯޓުތައް/ ފޮޓޯ: ކުއްޖާގެ މަންމަ "ދެން" އަށް ހިއްސާ ކޮށްފަ
ވަފާ ބުނިގޮތުގައި އެފަހަރު އިންޑިއާ އިން ޑޮކްްޓަރު ދިން ބޭހުން ހުޒެއިލް ގެ ބަލިހާލަތު ވަރަށް ބޮޑަށް ރަނގަޅުވިއެވެ. ނަމަވެސް ދެ މަސް ދުވަހަށް ޑޮކްޓަރު ބޭސް ދިނީ ދެމަސް ފަހުން އަލުންް ޑޮކްޓަރަށް ދެއްކުމަށް ވެސް ބުނެއެވެ.
"މިދިޔަ އޭޕްރިލް މަހު ބޭސް ހުސްވެއްޖެ. ޑޮކްްޓަރަށް ދައްކަން ދާން ވެސް ބުނެފަ އޮތީ އެއިރު، އެކަމަކު ކޮވިޑްގެ ހާލަތާއި ގުޅިގެންނާއި މާލީ ހާލަތު ހުރިގޮތުން ނުފުރުނު. އެބޭސް ދިނީމަ ދަރިފުޅުގެ ހާލު ވަރަށް ބޮޑަށް ރަނގަޅުވި، އެއިރު އެއްވެސް ވަރަކަށް ފިޓު ނުޖެހޭ. ނަމަވެސް ބޭސް ހުސްވެފައި ހުރީމަ އަނެއްކާ ވެސް ހާލުދެރަ. އެންމެ ފަހުން ފިޓު ޖެހުނީ މީގެ ތިން ހަފްތާވަރު ކުރިން" ވަފާ ބުންޏެވެ.
ހުޒެއިލްްއަށް ދިމާވެފައިވާ ކަމަކީ އެހާ "ސީރިއަސް" ކަމެއް ނޫންކަމަށް ބުނެ އޭނާއަށް އާސަންދަ ހަމަޖެހިފައިނުވާ ކަމަށް ވެސް ކުއްޖާގެ މަންމަ ވަފާ ބުނެފައިވެއެވެ. އެހެންކަމުން ހުޒެއިލް ގޮވައިގެން ރާއްޖެއިން ބޭރަށް އަމިއްލަ ޚަރަދުގައި ފުރޭތޯ ވަފާ އަންނަނީ މަސައްކަތް ކުރަމުންނެވެ. ނަމަވެސް އެއާއިލާގެ މާލީ ހާލަތު އެހާ ތަނަވަހެއް ނޫނެވެ.
"ކުއްޖާގެ ބައްޕަ ކުރިން މަސައްކަތް ކުރީ ސެކިއުރިޓީ އޮފިސަރެއްގެ ގޮތުގަ. އެކަމަކު އެވަޒީފާ ގެއްލި މިހާރު ވަޒީފާއަކު ނޫން. އަޅުގަނޑުމެން ދިރިއުޅެނީ އަޅުގަނޑުގެ އާއިލާ ގާތު. އަޅުގަނޑުގެ ބައްޕައަށް ލިބޭ 13000 ރުފިޔާއިން ގޭގެ ކުއްޔަށް 7000 ރުފިޔާ ދައްކާފަ، ބާކީވާ ފައިސާއިން ގޭގެ ބައެއް ޚަރަދުތައް ކުރުމަށްފަހު، މަންމައަކީ ވެސް ބަލިމީހަކަށްވާތީ ބައްޕަގެ ފައިސާއިން ދެން ޚަރަދު ކުރަން ޖެހެނީ މަންމަގެ ބޭސްފަރުވާއަށް. އަޅުގަނޑު މަސައްކަތް ކުރަނީ ފިހާރައެއްގަ. މުސާރައަށް 4000 ރުފިޔާ ލިބޭއިރު ބިލުތައް ދައްކާފަ މާގިނަ ފައިސާއެއް ބާކީއެއް ނުވޭ." ވަފާ ކިޔައިދިނެވެ.
ހުޒެއިލްގެ ބައްޔަށް ދާއިމީ ފަރުވާއެއް އޮތްކަމަށް ޑޮކްޓަރުންނާއި ހަވާލާދީ ވަފާ ބުންޏެވެ. އޭނާ ބޭނުންވަނީ، ދަރިފުޅަށް ބޭސްކުރަން ދާން ތިޔަ އެންމެހާ ދީލަތި ފަރާތްތަކުގެ އެހީތެރިކަމެވެ.
ހުޒެއިލް އަށް އެހީތެރިވާން ފައިސާ ޖަމާކުރަން ބޭނުންވާ ފަރާތްތަކުން ބީއެމްއެލް އެކައުންޓު ނަންބަރ 7730000221369 (ވަފާ ޢަބްދުﷲ) އަށް ފައިސާ ޖަމާކޮށްދެއްވުމަށް ކުއްޖާގެ މަންްމަ އެދެއެވެ. އިތުރު މައުލޫމާތު ވަފާ ޢަބުދުﷲ ، 7669254 އާއި ގުޅާލައިގެން ސާފު ކޮށްލުމަށް އޭނާ އެދެއެވެ.
ވަރަށް ރަނގަޅު ވާހަކައެއް