ޝަންގްރިއްލާ ރިސޯޓާއި ގުޅޭ ސުވާލަށް މިނިސްޓަރު ނުގުޅޭ ޖަވާބު ދެއްވާތީ ނުރުހިއްޖެ

އައްޑޫ ސިޓީގައި އޮންނަ ވިލިނގި ނުވަތަ ޝަންގްރިއްލާ ރިސޯޓު ނުހުޅުވި އޮންނަތާ ގިނަ ދުވަސްތަކެއް ވެފައިވާއިރު އެ ރިސޯޓު ހުޅުވޭނެ ތާރީހަކާއި ގުޅޭގޮތުން ތަކުރާރުކޮށް ސުވާލު ކުރާއިރުވެސް، ޓޫރިޒަމް މިނިސްޓަރު ޑރ. އަބްދުﷲ މައުސޫމް އެއަށް ނުގުޅޭ ޖަވާބު ދެއްވާތީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނުރުހުންވެ ވަޑައިގެންފިއެވެ.
މިއަދު އޮތް ރައްޔިތުންގެ މަޖިލީހުގެ ޖަލްސާގައި މިނިސްޓަރު ޑރ. މައުސޫމް މަޖިލީހަށް ހާޒިރުކޮށް ވަނީ ސުވާލު ކޮށްފަ އެވެ. އެގޮތުން ހިތަދޫ މެދު ދާއިރާގެ މެމްބަރު އަހުމަދު ރަޝީދު ވަނީ ޝަންގްރިއްލާ ރިސޯޓު ބަންދުކޮށްފައި އޮންނާތީ އޭގެ ސަބަބުން އައްޑޫ ސިޓީގެ ރައްޔިތުންނަށް އިގްތިޞާދީ ގޮތުން ގެއްލުންތަކެއް ލިބެމުން ދާކަމަށެވެ. އަދި މިއީ ދައުލަތުގެ އާމްދަނީއަށްވެސް އޭގެ ސަބަބުން ނޭދެވޭ އަސަރުތަކެއް ކުރާނެ ކަމެއްކަން މެމްބަރު ފާހަގަކުރެއްވި އެވެ. އެހެންކަމުން އެ ރިސޯޓު ހުޅުވޭނީ ކޮން ތާރީހަކުންތޯ މިނިސްޓަރު އަރިހުން ސާފުކޮށްލަން ބޭނުންވާކަމަށް މެމްބަރު އަހުމަދު ރަޝީދު ވިދާޅުވިއެވެ.
"ޝަންގްރިއްލާ ހުޅުވުން އަޅުގަނޑު އުއްމީދު ކުރިން މިދިޔަ އަހަރުވެސް ހުޅުވޭނެ ކަމަށް. އޭގެ ކުރީ އަހަރުވެސް ހުޅުވޭނެކަމަށް." މިނިސްޓަރުގެ ޖަވާބު ފެއްޓެވީ މިފަދައިންނެވެ.އެއާއިއެކު ޑރ. މައުސޫމު ދެއްކެވީ ނުހުޅުވި ލަސްވާ ސަބަބުތަކުގެ ވާހަކައެވެ. އެއާއިއެކު އެބިން ފަތުރުވެރިކަމުގެ ބޭނުމަށް ދޫކުރާ ކުލި ކުޑަކޮށްދީފައިވާކަމަށްވެސް ވިދާޅުވިއެވެ. މިމައުޟޫގައި ވާހަކަ ކުރިއަށް ގެންދެވިއިރު ރިސޯޓު ނުހުޅުވި ލަސްވާ މައްސަލަ ހައްލުކުރަން ކުރާ މަސައްކަތެއް އަދި ހުޅުވޭނެ ތާރީހެއްވެސް މިނިސްޓަރު ވިދާޅެއް ނުވިއެވެ. އެ މަނިކުފާނުގެ ވާހަކައިގެ ތެރެއިން މަޖިލިސް ރައީސް ވަނީ މެމްބަރު ކުރެއްވި ސުވާލު ދަންނަވައިފަ އެވެ.
"އިއްޒަތްތެރި ވަޒީރު. އިއްޒަތްތެރި މެމްބަރުގެ ސުވާލަކީ ކޮން އިރަކުންތޯއޭ އެތަން ހުޅުވޭނީ" ރައީސް ނަޝީދު ސުވާލު ހަނދުމަފުޅުކޮށްދެއްވި އެވެ.އެއާއިއެކު މިނިސްޓަރު ވިދާޅުވީ އުއްމީދު ކުރައްވަނީ ހިނގަމުން މިދާ 2023 ވަނަ އަހަރުގެ ތެރޭގައި ޝަންގްރިއްލާ ރިސޯޓު ހުޅުވޭނެ ކަމުގައި ކަމަށެވެ. އެރިސޯޓު ބަންދު ކުރީ ކޮވިޑް-19 ގެ ބަލިމަޑުކަމުގެ ސަބަބުން 2020 ވަނަ އަހަރެވެ. އޭގެ ފަހުން 3 އަހަރު ވެފައިވާއިރު ސަރުކާރުން މިދިޔަ ދެ އަހަރުވެސް ބުނަމުން ގޮސްފައިވަނީ ކުޑަ ދުވަސްކޮޅެއްގެ ތެރޭގައި ޝަންގްރިއްލާ ހުޅުވާނެ ކަަމަށެވެ. ރައީސް ނަޝީދު މި މައުޟޫގައި އިތުރަށް ވާހަކަފުޅު ދެއްކެވި އެވެ. އެގޮތުން ވިދާޅުވީ ޝަންގްރިއްލާ ނުހުޅުވި ލަސްވަނީ ހިއްސާ ދޫކުރުމުގެ މައްސަލަ ހައްލު ނުވެ އޮތީމައި ކަމަށެވެ. އަދި ހިއްސާ ދޫކުރުމަށް ސަރުކާރުން އިތުރު މަސައްކަތެއްވެސް ކުރަމުން ނުދާއިރު އެކަމާއި ގުޅޭގޮތުން މަޖިލީހުން ތަކުރާރުކޮށް ސުވާލު ދެންނެވުމުންވެސް އެއަށް މިނިސްޓަރު ޖަވާބެއް ނުދެއްވާތީ އެއީ ހިތާމަ ހުރި ކަމެއްކަމަށްވެސް ރައީސް ނަޝީދު ވިދާޅުވި އެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.