މި އަހަރުގެ މެދުތެރޭގައި ދެކުނުގެ އަތޮޅުތަކަށް އާރްޓީއެލްގެ ޚިދުމަތް ފަށަނީ
މި އަހަރުގެ މެދުތެރޭގައި އެންމެ ދެކުނުގެ އަތޮޅުތަކަށް އާރުޓީއެލް ފެރީގެ ހިދުމަތް ފެށުމަށް ތައްޔާރުވަމުންދާ ކަމަށް ޕްލޭނިން މިނިސްޓަރު މުޙައްމަދު އަސްލަމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރަކު ކުރެއްވި ސުވާލަކަށް ދެއްވި ޖަވާބުގައެވެ.
މިނިސްޓަރު ވަނީ ހުވަދޫ، އައްޑޫ އަދި ފުވައްމުލަކުގައި އާރުޓީއެލް ފެރީގެ ޚިދުމަތް ފެށުމަށް މަސައްކަތް ކުރަމުން އަންނަކަން ފާހަގަކުރައްވައި، މި އަހަރުގެ މެދު ތެރޭގައި އެ ޚިދުމަތް އެ ސަރަހައްދުގައި ފެށުމަށް ތައްޔާރުވަމުން އަންނަކަމަށް ވިދާޅުވެފައެވެ.
"އަޅުގަނޑުމެން ޕްލޭންކޮށްފައި އޮތީ މިއަހަރުގެ ޖުލައިއާ ހިސާބަށް ސަދަން ރީޖަންގައި އެ މަސައްކަތް ފަށަން." އަސްލަމް ވިދާޅުވިއެވެ.
އަސްލަމް އިތުރަށް ވިދާޅުވީ މާޗުމަހުގެ ތެރޭގައި ލޯންޗްތައް ބަނުމުގެ މަސައްކަތް ފަށައި ދެކުނު ސަރަހައްދުގައި އާރުޓީއެލްގެ ހިދުމަތް ދޭން ބޭނުންވާ 10 އުޅަނދު ޖުލައި އާ ހަމައަށްދާއިރު ނިންމައިވޭނެކަމަށެވެ.
އާރްޓީއެލްގެ ޚިދުމަތުގައި ބޭނުންކުރާ ފެރީތަކަކީ ސްޕީޑް އަވަސް ފެރީތަކެކެވެ.
އަދި މި ޚިދުމަތުގައި ބޭނުންކުރާ ސްޕީޑް ފެރީތަކަކީ 50 މީހުންގެ ޖާގައިގެ ފެރީތަކެކެވެ. އެ ސްޕީޑް ފެރީތަކަކީ ދަތުރުވެރިންނަށް ހިތްފަސޭހަކަމާއިއެކު ދަތުރުކުރެވޭނެގޮތަށް ފަރުމާކޮށްފައިވާ ފެރީތަކެއްވެސްމެއެވެ.
Ads by STO
